Mìkando ji mɔ Bibla gɔnmɛjeje nukplakpla cɛwo na yí ao lɔnlɔn nɔ Yehowa sɛnŋ doji. Eӡan mɔ àkpɔtɔ adokɔ ŋsɛn lɔnlɔn lɔ gashiagamɛ. (1 Piɛ 2:2) Nɔ agbe mavɔ mɔkpɔkpɔ asun eo shiɔ, ele mɔ àyi ji ateteɛ gogo Yehowa to Bibla nukplakpla ji.—Hlɛn Ӡan 17:3; Ӡuda 21.

Nɔ ao Mawu jejeshi va shinkɔ dojiɔ, ao xɔse can asɛnsɛnŋ doji. Xɔse cɛ ana ao nu ajɔ ji nɔ Mawu. (Ebretɔwo 11:1, 6) Ána yí nàtrɔ jimɛ yí agbewa ashitrɔtrɔ nywiwo le ao gbenɔnɔ nu.—Hlɛn Edɔwawawo 3:19, nwt.

Le jɔjɔmɛɔ, àji mɔ yeaxo nuxu so enu ciwo yí èkpla nu nɔ mɛbuwo: ejɔnɔ ji nɔ mì pleŋ mɔ mìanu eŋɛnywiwo nɔ amɛwo. Nɔ èkpɔtɔ le Bibla nukplakpla lɔ jiɔ, àvanya lé àzan Bibla do yí asɔ ɖe lé èxɔ Yehowa koɖo eŋɛnywi lɔwo ji se do mɛ nɔ amɛwo.—Hlɛn Rɔmatɔwo 10:13-15.

Amɛ sugbɔtɔ tɔɛni ji koɖo eŋɛnywi lɔwo nunu nɔ wowo xlɔwo koɖo wowo xomumɛtɔwo. Vɔ éӡan ayejeje. Ŋgbegbanɔli wowo sɛnsɛnhawo o, xonɔ nuxu so Mawu gbeɖuwo nu nɔ wo. Ðoŋwi mɔ le nɔnɔmɛ sugbɔtɔ mɛɔ, ao xomɛvu wawa yí awa dɔ do amɛwo ji wu ao nuxuwo.—Hlɛn 2 Timɔte 2:24, 25.

Mawu Nyɔ lɔ kplakpla akpedo eo nu yí àshin le gbɔngbɔnmɛ. Nɔ azan lɔwo vayikɔɔ, eo koɖo Yehowa xlɔnyinyi  asakɔn doji. Le nyɔnɔnwi mɛɔ, ànyi yi tɔ yí agbenyi yi xomumɛtɔ ɖeka.—Hlɛn 2 Korɛntitɔwo 6:18.

Àtɛnŋ awa ŋkɔyiyi le gbɔngbɔnmɛ nɔ èyi Bibla nukplakpla lɔ ji. (Ebretɔwo 5:13, 14) Biɔ mɔ Yehowa Kunuɖetɔ ɖeka le vakpla Bibla koɖo ye koɖo wema ci yí nyi Nyi yí Bibla kpla miɔ? Ao gbenɔnɔ anyɔkɔ doji nɔ èkpɔtɔ kplakpla Mawu Nyɔ lɔ doji.​—Hlɛn Ehajiji Wema 1:1-3; 73:27, 28.

Eŋɛnywi lɔwo so Yehowa, jijɔ Mawu gbɔ. Àtɛnŋ ate gogwi nɔ èdonɔ eha koɖo yi sɛntɔwo. (Ebretɔwo 10:24, 25) Nɔ èkpɔtɔ yí dokɔ gbla mɔ ye nu ajeŋ nɔ Yehowaɔ, ao lɔ avasun agbe ŋtɔŋtɔ lɔ, ci yí nyi agbe mavɔ ji. Ate gogo Mawu nyi enu adodwitɔ ci yí àtɛnŋ awa.—Hlɛn 1 Timɔte 1:11; 6:19.