Lɛta ci yí so dɔjikpɔha gbɔ
“Mí a nyi enukplamɛtɔwo dru.” (Ebre. 5:12) Bui kpɔ! Yehowa ci yí nyi Enukplamɛtɔ nywitɔ gangantɔ xexegbɛ lɔ tɔ, yɔkɔ mì nɔ mìakpla nu mɛbuwo kudo nu! Edɔdoashi ɖekpokpui ci yí kudo nyɔnɔnwi lɔ kplakpla amɛwo so Yehowa nu, le xomu mɛ, le hamɛ lɔ mɛ, alo le kunuɖeɖedɔ lɔ mɛ nyi mɔnukpɔkpɔ vevi koɖo agbannɔamɛji gangan ɖeka. Lé mìawɛ asun jiɔ?
Ðoŋci lɔ le nyɔ ciwo yí apostolo Pɔlu ŋwlɛn ɖaɖa Timɔte mɛ. Énu mɔ: ‘Kpɔtɔ ado vevi enuhlɛnhlɛn le jugbaja, ado ŋsɛn lanmɛ nɔ amɛwo yí akpla nu wo.’ Énu kpi mɔ: “Hwehunnɔ nu ɔ, nà hwlɛn eoɖeki koɖo amɛ ciwo yí ɖo eto ao nukplamuwo gan.” (1 Tim. 4:13, 16) Ŋɛdu ci yí ahwlɛn amɛwo gbe gan yí èdrakɔ. Eyi taɖo ele veviɖe mɔ àje agbla nɔ ao nuhlɛnhlɛn koɖo lé èkplanɔ nu amɛwo do anyɔ doji. Wowa wemagbaja cɛ nɔ akpedo eo nu le yi wawa mɛ. Kpɔ yi mɛ nyɔ ɖewo ɖa.
Kpukpui ciwo yí woyɔ le kpashi ɖekaɖeka ji tɛnŋ nyi Bibla gɔnmɛɖose ɖe ci yí kudo enukplakpla mɔnu lɔ nu alo tɛnŋ nyi kpɔwɛ nɔ lé woazan nukplakpla mɔnu lɔ do
Yehowa yí nyi “Enukplamɛtɔ Gangantɔ lɔ.” (Ezai. 30:20, nwt) Nɔ wemagbaja cɛ kpedo eo nu yí èvabi le enuhlɛnhlɛn koɖo enukplakpla amɛwo mɛ can ɔ, ŋgbeŋlɔnbe gbeɖe mɔ Yehowa gbɔ yí mìwo ŋɛdu lɔ so o. Ðonɔ ŋwi hɛnnɛ mɔ eyi dɔnkɔ amɛwo va yiɖeki gbɔ. (Ʒan 6:44) Eyi taɖo donɔ gbe ɖaɖa kabakaba yí abiɔ gbɔngbɔn kɔkɔɛ. Zannɔ Mawu Nyɔ lɔ blaŋblaŋ. Dɔnnɔ amɛwo susu yi Yehowa ji, ŋgbenyi eoŋtɔ ji gbeɖe o. Je agbla akpedo ao nyɔsetɔwo nu nɔ woalɔn Mawu so ji mɛ.
Mɔnukpɔkpɔ gangan enyi mɔ àkpla nyɔnɔnwi vevitɔ ci yí wu ɖekpokpui amɛwo le nyigban lɔ ji. Mìkando ji mɔ àsun ji, nɔ èwɛkɔ to “ŋsɛn ci Mawu” nanɔ amɛ ji—1 Piɛ. 4:11.
Ao kpena nukplamɛtɔwo,
Yehowa Kunuɖetɔwo dɔjikpɔha
