1. Nyi mìɖo awa gbɔxwe akando ji mɔ mìwo sɛnsɛn jɔkɔ ji nɔ Yehowaɔ, yí nyi yí taɖoɔ?

YESU nu mɔ: “Mawusɛntɔ adodwitɔwo a sɛn Eda lɔ le gbɔngbɔn koɖo nyɔnɔnwi mɛ, ɖo Mawusɛntɔ huntɔwo yí Eda lɔ jinɔ nɛ.” (Ʒan 4:23; 6:44) Mɛɖekaɖeka le mì mɛ ɖo “[a]tekpɔ a nya enu ci yí jɔnɔji nɔ Axwetɔ.” (Efezitɔwo 5:10) Ecɛ wawa denɔnɔ fafɛɖe gashiagamɛ o. Satana tenɔkpɔ mɔ yeable mì nɔ mìŋgbejeshi vovototo ci yí le enunywi koɖo enuvwin gblamɛ o keŋ awa enu ci yí dado jijɔ nɔ Yehowa.—Enyɔdasɛ 12:9.

2. Dre enu ci yí jɔ le Sinai To lɔ gbɔ.

² Lé Satana tenɔkpɔ mɔ yeable mì doɔ? Emɔ ɖeka ci ji eto yí wɛni yí nyi mɔ, écakanɔ mì nɔ mìŋgbenya vovototo ci yí le gblamɛ nɔ enunywi koɖo enuvwin o. Kpɔ enu ci yí jɔ do Izraɛli jukɔn lɔ ji hwenu wobɔ do Sinai To lɔ gbɔ. Moizi yi eto lɔ ji yí jukɔn lɔ nɔ te kpɔɛ mɔ yɛatrɔ gbɔ. Wonɔ te kpɔɛ keke ecikɔ nɔ wo yí wovanu nɔ Arɔn mɔ yi le wa mawu ɖeka nɔ yewo. Arɔn zan shika yí sɔ mɛ nyibuvi nɔnɔmɛ. Eyi jukɔn lɔ ɖu azan. Woɖu we trɔdo  nyibuvi lɔ yí do ŋdo ni. Wosɔɛ mɔ ci yewodokɔ ŋdo nɔ nyibuvi lɔɔ, Yehowa yí yewosɛnkɔ. Vɔ denyi ci jukɔn lɔ sɔ azan cɛ mɔ yɛnyi ‘exwegbe nɔ Yehowa,’ eyi enu ci wowakɔ nyi enunywi o. Yehowa kpɔɛ mɔ voju wosɛnkɔ yí amɛ sugbɔ ku le wo mɛ. (Hunhun 32:1-6, 10, 28) Nyi mìakpla so mɛɔ? Ŋgbelɔn woable eo domɛ o. “Ŋgbe tɔ alɔ̀ enu ci yí de kɔ o” yí ana Yehowa akpla vovototo ci yí le gblamɛ nɔ enunywi koɖo enuvwin eo.—Ezai 52:11; Ezekiɛli 44:23; Galatitɔwo 5:9.

3, 4. Nyi yí taɖo enyɔ mɔ mìagbeje fini azan ciwo amɛ sugbɔ ɖunɔ jɔ so mɛɔ?

³ Hwenu Yesu le nyigban jiɔ, éna kpla apotru yi tɔwo mɔ wo le ɖo kpɔwɛ nywi le sɛnsɛn adodwitɔ lɔ mɛ. Le yi ku goduɔ, apotru lɔwo kpɔtɔ kplakpla Yehowa gɔnmɛɖosewo enukplavi yoyuwo. Vɔ ci apotru lɔwo ku vɛɔ, ŋsukankan nukplamɛtɔwo tɔ susu trofitrofiwo, vujusɛnsɛn kɔnuwo koɖo azanɖuɖuwo hɛnhɛn va hamɛ lɔ mɛ. Wotrɔ ŋkɔ nɔ vojusɛntɔwo zanɖuɖu ɖewo hɛnnɛ, nɔ woaze shigbe mɔ Kristotɔwo zanɖuɖuwo wonyi nɛ. (2 Tɛsalonikitɔwo 2:7, 10; 2 Ʒan 6, 7) Sugbɔ le azanɖuɖu ŋtɔ́wo mɛ kpɔtɔ li yí amɛ sugbɔ ɖuɖuɔ gbɛ. Azanɖuɖu lɔwo kannɔfu ŋsukankan jixɔsewo koɖo gbɔngbɔnvɔnwo sɛnsɛn hɛnnɛ. *—Enyɔdasɛ 18:2-4, 23.

⁴ Le xexeɛ pleŋ mɛ gbɛɔ, azanɖuɖu koɖo exweɖuɖuwo nyi akpaxwe vevi ɖeka le agbemɛ nɔ amɛwo.  Vɔ nɔ èkpɔtɔ yí kplakpla lé Yehowa kpɔnɔ azanɖuɖuwo doɔ, àtɛnŋ avakpɔ mɔ yeɖo ami ɖewo ɖuɖu. Ecɛ wawa atɛnŋ agbɔnnu nɔ eo, vɔ kando ji mɔ Yehowa akpedo ye nu. Na mìakpɔ fini azan alo exwe ɖewo ciwo amɛ sugbɔ ɖunɔ jɔ so keŋ akpɔ lé Yehowa kpɔnɔ wo do.

5. Nyi yí dasɛ mɔ denyi 25 décembre yí woji Yesuɔ?

⁵ Le texwe sugbɔ nɔ xexe lɔɔ, woɖunɔ Nɔwɛli le 25 décembre, azan ci ji amɛ sugbɔtɔ bunɔ mɔ woji Yesu le. Bibla denu azan ci ji woji Yesu le alo wleci ci mɛ woji le kpetii nɔ mì o, vɔ enu nyɔ ɖeka nɔ mì kudo hwenu woji nu. Luiki ŋwlɛ mɔ hwenu woji Yesu le Bɛtɛlɛxɛmuɔ, “lɛngbɔkplɔtɔ ɖowo le botuwo” yí kpɔkpɔ wowo lankuwo ji. (Luiki 2:8-11) Le décembre wleci mɛ le Bɛtɛlɛxɛmuɔ, fafa nini, eshi janɔ yí eshikpe can janɔ sugbɔ. Eyi taɖo lɛngbɔkplɔtɔwo datɛnŋ anɔ xexenu koɖo wowo lɛngbɔwo zanmɛ hwenɔnu o. Nyi mìkpla so mɛɔ? Ayamɛ nɔnɔmɛ nywi hwenu yí woji Yesu, denyi décembre wleci mɛ woji le o. Exolɔlɔ koɖo Bibla mɛ kpeɖojiwo dasɛ mɔ hwenu ɖe le wleci ciwo mìyɔnɔ gbɛ mɔ septembre koɖo octobre gblamɛ yí woji le.

6, 7. (a) Lé Nɔwɛli kɔnu ciwo yí amɛ sugbɔ wanɔ tɔ ji doɔ? (b) Susu ci yí taɖo ele mɔ mìananɔ nu mɛbuwoɔ?

⁶ Lé Nɔwɛli tɔ ji doɔ? Eso vojusɛnsɛn zanɖuɖuwo mɛ shigbe mɔ Rɔmatɔwo xwe Saturnales hannɛ. Enyi exwe ɖeka ci woɖunɔ nɔ Saturne ci yí nyi agbledede mawu. Wema ɖeka (The Encyclopedia Americana) nu mɔ: “Saturnales nyi exwe ɖeka ci  yí Rɔmatɔwo ɖunɔ le dodomɛ nɔ décembre wleci. Eyi ji wocu Nɔwɛli jijɔkpɔkpɔ kɔnu sugbɔ do. Le kpɔwɛ mɛ, agɔɖuɖu ganganwo, enunana amɛ nɔnɔwo, koɖo buʒiwo tɔtɔ jɔ so exwe ŋtɔ́ ɖuɖu mɛ.” Gbesɔ kpe niɔ, Mithra ci yí nyi ewe mawu Pɛsitɔwo tɔ jigbezan ji woɖunɔ 25 décembre le.

⁷ Vɔ amɛ sugbɔtɔ ciwo yí ɖunɔ Nɔwɛli gbɛ susu denɔnɔ vojusɛnsɛn ci mɛ ejɔ so ji o. Enu ci wowanɔ kpoŋ yí nyi mɔ, wokpɔnɔ Nɔwɛli ɖuɖu mɔ yɛnyi  hwenu ɖeka ci yewoanɔ ju le xomu mɛ, aɖu ŋɖuɖu nywiwo yí ana nu yewonɔnɔwo. Le nyɔnɔnwi mɛɔ, mìlɔn mìwo xomumɛtɔwo koɖo mìwo xlɔwo, yí Yehowa ji hɛnnɛ mɔ ye sɛntɔwo le nɔ ju akpɔ jijɔ. Shigbe lé 2 Korɛntitɔwo 9:7 nui nɛɔ, “Mawu lɔnnɔ amɛ ci yí nanɔ enu jijɔmɛtɔ.” Yehowa deji mɔ mìwo le nɔ te kpɔ azan vevi ɖewo gbɔxwe ana nu amɛwo o. Yehowa mɛwo nanɔ nu amɛ koɖo jijɔ, yí nɔnɔ ju koɖo wowo xlɔwo koɖo wowo xomumɛtɔwo le azan ɖekpokpui ji le xwe lɔ mɛ, yí wodesɔ efidodo susu wɛni mɔ amɛwo avawɛ nɔ yewo o. Ci wolɔn mɛbuwo yí dɔ wonanɔ nu amɛ.—Luiki 14:12-14.

8. Wlecivimɛfankantɔwo hɛn enunanawo yi nɔ Yesu hwenu enyi vifin a? Ðe mɛ.

⁸ Enyɔ ci amɛ sugbɔ nunɔ yí nanɔ nu amɛ le Nɔwɛli hwenu yí nyi mɔ, ŋsu ŋɖɛnyatɔ amɛtɔn hɛn enunana vɛ nɔ Yesu hwecinu enyi vifin le elanwo kpu mɛ. Mɛɖekawo yi yɔ Yesu kpɔ yí hɛn enuwo yi ni nyao. Le Bibla hwenuɔ, woyinɔ amɛ veviwo gbɔ yí nanɔ nu wo. (1 Efyɔwo 10:1, 2, 10, 13) Vɔ ènya mɔ Bibla nu mɔ ŋsu lɔwo nyi wlecivimɛfankantɔ ciwo yí wanɔ maʒiki yí wodesɛnnɔ Yehowaa? Gbesɔ kpe niɔ, denyi hwenu Yesu nyi vifin le elanwo kpu mɛ yí woyi yɔɛ kpɔ o. Vɔ hwenu enyi ‘ɖevihwɛ’ le axwe ɖeka mɛ yí wovayi gbɔ.—Matie 2:1, 2, 11.

9. Jigbezan ciwo nu Bibla xo nuxu soɔ?

⁹ Gbecigbe woji ɖevi ɖe nyinɔ jijɔ ŋkeke. (Ehajiji Wema 127:3) Gan ecɛ dedasɛ mɔ mìɖo aɖunɔ jigbezan o. Bu nyɔ cɛ kpɔ: jigbezanɖuɖu amɛve kpaŋ nu  Bibla xo nuxu so. Ðeka nyi Eʒipti Fyɔ Faraɔn jigbezan yí ɖetɔ lɔ nyi Efyɔ Erodi Antipa jigbezan. (Hlɛn Gɔnmɛjeje 40:20-22; Maki 6:21-29.) Efyɔ ŋtɔ́wo denyi Yehowa sɛntɔ o. Le nyɔnɔnwi mɛɔ, mìdehlɛn le Bibla mɛ gbeɖe mɔ Yehowa sɛntɔ ɖe ɖu yi jigbezan o.

10. Lé Kristotɔ ŋkɔtɔwo kpɔnɔ jigbezanɖuɖu doɔ?

¹⁰ The World Book Encyclopedia wema nu mɔ Kristotɔ ŋkɔtɔwo “kpɔnɔ jigbezanɖuɖu mɔ yinyi vojusɛnsɛn kɔnu.” Ŋsukankan jixɔsewo ji wocu kɔnu ŋtɔ́wo do. Le kpɔwɛ mɛ, blema Grɛkitɔwo xɔɛ se mɔ gbɔngbɔn ɖeka kpɔnɔ amɛ ɖekaɖeka jiji tɔxu, yí gbɔngbɔn lɔ glɔnnɔ ta nɔ amɛ lɔ. Wogbenunɔ mɔ gbɔngbɔn ŋtɔ́ ca ka koɖo mawu ci woji le azan ɖekɛ lɔ ji koɖo mɛ lɔ. Sɔ kpe nɔ ŋsukankan jixɔse cɛwoɔ, jigbezanɖuɖu ca ka koɖo wlecivimɛfankankan alo jɔgbezanwo hɛnnɛ.

11. Lé Yehowa ji mɔ mìwo le nanɔ nu amɛwo doɔ?

¹¹ Amɛ sugbɔ kpɔnɔ mɔ yewo jigbezan nyi azan vevi ɖeka ci ji amɛwo ɖo akpɔ jijɔ do yewo nu yí alɔn yewo le. Vɔ mìatɛnŋ adasɛ nɔ mìwo xomumɛtɔwo koɖo mìwo xlɔwo mɔ mìlɔn wo le xwe lɔ pleŋ mɛ yí danyi azan vevi ɖe koŋ ji mìawɛ le o. Yehowa ji mɔ mìwo le wanɔ xomɛvu yí ananɔ nu amɛ hweɖekpokpuinu. (Hlɛn Edɔwawawo 20:35.) Ŋkeŋkeɔ, mìdonɔ akpe nɔ Yehowa nɔ agbe ci ena mì, denyi azan ci gbe woji mì ɖekɛ ji yɔ o.—Ehajiji Wema 8:3, 4; 36:9.

12. Lé mìwo kuzangbe atɛnŋ anyɔ wu mìwo jigbezan doɔ?

¹² Ŋununyatɔ 7:1 (NWT) nu mɔ: “Ŋkɔ nywi nyɔ  wu ami eho vevi, yí ekuzangbe nyɔ wu jigbezan.” Lé mìwo kuzangbe atɛnŋ anyɔ wu mìwo jigbezan doɔ? Gbecigbe woji mìɔ, mìdewa enunywi alo enuvwin ɖe le agbemɛ hɔɖo o. Vɔ nɔ mìsɛn Yehowa le agbemɛ yí wa enywi nɔ mɛbuwoɔ, mìwa “ŋkɔ nywi” nɔ mìwoɖekiwo yí Yehowa aɖo ŋwi mì nɔ mìku can. (Job 14:14, 15) Yehowa mɛwo deɖunɔ wowo jigbezanwo abi Yesu tɔ hɛnnɛ o. Enu ci ɖekɛ  Yesu mɔ mìwo le wanɔ yí nyi Eŋwiɖoɖo yi ku lɔ ji.—Luiki 22:17-20; Ebretɔwo 1:3, 4.

13, 14. Nyi yí Paki ca ka koɖoɔ?

¹³ Amɛ sugbɔ buini mɔ Yesu fɔnfɔnsokuzan yí nyi Paki ci yewoɖunɔ. Vɔ Yesu nu nɔ yi dokplɔtɔwo mɔ wo le ɖu fɔnfɔnsokuzan nɔ yea? Oo. Denu ahan o. Exolɔlɔ wemawo nu nɔ mì mɔ Kristotɔ ŋkɔtɔwo deɖu Yesu fɔnfɔnsokuzan o yí blema voju kɔnuwo ji wocui do. The Encyclopœdia Britannica wema nu mɔ: “Fiɖe dele Grɛki Nuŋwlɛŋwlɛ lɔwo mɛ yí dasɛ mɔ woɖu Yesu fɔnfɔnsokuzan o.”

¹⁴ Ci Yehowa kpɔ amɛwo yí wosɔ ŋsukankan sɛnsɛn kɔnuwo bakakɔ koɖo fɔnfɔnsoku Eviɛ tɔ ɖe, ekpekɔ nia? Oo, dekpekpeɛ ni o. (2 Korɛntitɔwo 6:17, 18) Yehowa denu gbeɖe mɔ mìwo le ɖu Yesu fɔnfɔnsokuzan o.

15. Nyi yí taɖo Kristotɔ adodwiwo dewanɔ kɔnu ɖewoɔ?

¹⁵ Kɔnu sugbɔ li ciwo Kristotɔ adodwiwo dewanɔ o. Nɔ amɛ kuɔ, ejɔnɔ blaŋblaŋ mɔ wodrɔnɔ zan ni. Le yɔdu lɔ tuɔ, amɛkuku lɔ xomumɛtɔ vevi ɖekaɖeka lɔnɔ ekɔ do alɔmɛ yí sɔ kɔnɔ do daka lɔ ji alo sɔnɔ flawawo danɔ do ji gbɔxwe ekɔ ayi ji. Kɔnu ɖewo li ciwo yí wogbewanɔ le ŋkeke, wleci alo exwe ɖewo godu nɔ mɛ lɔ ku ɖegbɔ. Wowanɔ kɔnu cɛwo pleŋ ɖo woxɔɛ se mɔ mɛ ciwo yí ku agbetɛnŋ akpedo amɛleagbuwo nu alo awa nu vevi koɖo wo. Vɔ Bibla nu mɔ amɛkukuwo “degbenya ŋɖekpokpui o.” Eyi  taɖo mɛ ciwo yí ji mɔ yewoakpɔtɔ anɔ Mawu lɔnlɔn lɔ mɛ dewanɔ kɔnu ɖekpokpui ci yí ca ka koɖo amɛkukuwo sɛnsɛn o.—Ŋununyatɔ 9:5, 10, NWT.

16, 17. Nyi nu ele mɔ mìabu tamɛ kpɔ so nɔ mìwawa toto nɔ alɔleleɔ?

¹⁶ Alɔlelezan nyinɔ jijɔ hwenu. Woɖunɔ alɔlelezan to alɔkpa vovovowo ji le xexeɛ pleŋ mɛ. Ci amɛwo desɔnɔ ɖe le fini alɔlelezan kɔnuwo jɔ so jiɔ, eyi na wodenya mɔ yi kɔnu ɖewo jɔ so vojusɛnsɛn mɛ o. Vɔ Kristotɔ ciwo yí wakɔ toto nɔ alɔlele jinɔ mɔ yewo lɔlele lɔ le do jijɔ nɔ Yehowa. Nɔ wokpla nu so fini alɔlele kɔnuwo jɔ so nuɔ, woakpe ji asɔ gbeta nywiwo.—Maki 10:6-9.

¹⁷ Amɛwo buini mɔ alɔlele kɔnu ɖewo nanɔ alɔletɔ yoyu lɔwo ɖonɔ ‘tanywi.’ (Ezai 65:11) Le kpɔwɛ mɛ le texwe ɖewoɔ, amɛwo hlɛnnɔ mɔlu alo nubuwo kɔ do alɔletɔ yoyu lɔwo ji. Wobuini mɔ ahan wawa ana woakpɔ vi sugbɔ aji, akpɔ jijɔ yí anɔ agbe jinjin. Wogbenunɔ mɔ yɛna enuvwin dejɔnɔ do wo ji o. Vɔ Kristotɔwo nɔnɔ zanŋte yí gbenɔ kɔnu ɖekpokpui ci yí ca ka koɖo ŋsukankan sɛnsɛn.—Hlɛn 2 Korɛntitɔwo 6:14-18.

18. Bibla gɔnmɛɖose bu ciwo ji woɖo awa do le alɔlele hwenuɔ?

¹⁸ Kristotɔwo jinɔ mɔ yewo lɔlelezan le nyi yɛyi koɖo jijɔ hwenu ɖeka ci yí ana mɛ ciwo pleŋ ava, akpɔ jijɔ. Mɛ ciwo woyɔ va Kristotɔwo lɔlele wana tɔxu deɖo anu enyɔ masɔgbe ciwo yí afɔn gbɔdɔndɔn susu do amɛ mɛ alo ciwo yí dado bubu asu koɖo ashi lɔwo alo mɛbuwo nu o. (Elododo Wema  26:18, 19; Luiki 6:31; 10:27) Le Kristotɔwo lɔlele tɔxuɔ, dele mɔ woawa nu asɔ dasɛ “egoyìyì agbemɛtɔwo” o. (1 Ʒan 2:16) Nɔ èwakɔ toto nɔ alɔleleɔ, kando ji mɔ nɔ yevaɖoɖoɔ ŋwi azan lɔ kpɔɔ, yeakpɔtɔ akpɔkɔ jijɔ.—Kpɔ enumɛɖeɖe buwo 28.

19, 20. Fini kɔnkpuwo kɔkɔ yi ji jɔ soɔ?

¹⁹ Enu ci wowanɔ le alɔlelewo hwenu koɖo jijɔ hwenu buwo yí nyi ahakɔnkpuwo kɔkɔ yi ji. Le yi wawa hwenuɔ, mɛ ɖeka biɔnɔ ɖagbe yí mɛkpɛtɛwo kɔnɔ wowo kɔnkpuwo yi ji. Lé Kristotɔwo kpɔnɔ kɔnkpuwo kɔkɔ yi ji doɔ?

²⁰ Wema ci yí nyi The International Handbook on Alcohol and Culture nu mɔ, ewa mɔ blema vojusɛnsɛn kɔnu ɖeka mɛ yí kɔnkpuwo kɔkɔ yi ji jɔ so. Le “kɔnu cɛ wawa hwenuɔ, wokɔnɔ eshi kɔkɔɛ ɖe do nyigban nɔ voju lɔwo.” Nɔ wowɛkɔɔ, “woxonɔ ɖe yí biɔnɔ ɖagbe yí nunɔ enyɔwo shigbe mɔ, ‘agbe jinjin!’ alo ‘edɔ̀ dele mɛ o!’” Le blemaɔ, amɛwo kɔnɔ kɔnkpuwo yi ji yí sɔ biɔnɔ ɖagbe wowo mawuwo. Vɔ de ahan Yehowa cunɔ shi nɔ amɛ nɛ o.—Ʒan 14:6; 16:23.

21. Azanɖuɖu bu ci hanciwo Kristotɔwo ɖo agbeɔ?

²¹ Nɔ èjikɔ asɔ gbeta mɔ yeaɖu azan ɖe alo yedaɖuiɔ, bu tamɛ kpɔ so enu ciwo wowanɔ le azan lɔ ɖuɖu hwenu nu. Le kpɔwɛ mɛ, le azanɖuɖu koɖo ehunxoxo to emɔ ji ɖewo hwenuɔ, woɖunɔ ewe ciwo yí fɔnnɔ gbɔdɔndɔn susuwo do  amɛ mɛ, wonunɔ aha mu, yí gbewanɔ gbɔdɔndɔn masɔkoɖosenuwo. Hweɖewonuɔ, wana ŋtɔ́wo kannɔfu ŋsu koɖo ŋsu gbɔdɔndɔn alo nyɔnu koɖo nyɔnu gbɔdɔndɔn abi ejulɔnlɔn. Nɔ mìwa ɖe le azanɖuɖu ŋtɔ́ hanwo mɛ ɖe, mìgbe enu ci Yehowa gbe nyaoa?—Ehajiji Wema 1:1, 2; 97:10; 119:37.

22. Nyi yí atɛnŋ akpedo Kristotɔ ɖe nu yí asɔ gbeta mɔ yeaɖu azan ɖe alo yedaɖuiɔ?

²² Ele mɔ Kristotɔwo anɔ zanŋte nywiɖe gbɔxwe agbe azanɖuɖu ciwo yí dedonɔ bubu Mawu nu o. Apotru Pɔlu ŋwlɛ mɔ: “Nɔ́ mí a ɖu enu alo nɔ́ mí a nu enu alo nɔ́ mí a wa enu ɖekpokpwi ɔ, mí a wa wo pleŋ sɔ ɖaɖa Mawu kanfukanfu mɛ.” (1 Korɛntitɔwo 10:31; kpɔ enumɛɖeɖe buwo 29.) Vɔ denyi azanɖuɖuwo pleŋ yí ca ka koɖo gbɔdɔndɔn masɔkoɖose, ŋsukankan sɛnsɛn alo ejulɔnlɔn o. Nɔ azanɖuɖu ɖe deda le Bibla gɔnmɛɖosewo jiɔ, mìwoŋtɔwo yí ɖo asɔ gbeta mɔ mìaɖui alo mìdaɖui o. Mìgbeji mɔ mìabu lé mìwo gbetasɔsɔwo awanɔ nɔ mɛbuwo do kpɔ.

23, 24. Lé mìawɛ aɖe gbeta ci mìsɔ kudo azanɖuɖu ɖewo nu mɛ nɔ mìwo xomumɛtɔ ciwo yí denyi Kunuɖetɔwoɔ?

²³ Taŋfuin èmi azan ciwo yí dedonɔ bubu Yehowa nu ɖuɖu. Vɔ ao xomumɛtɔ ciwo yí denyi Yehowa Kunuɖetɔ ɖewo tɛnŋ kpɔɛ mɔ, eɔ degbelɔn yewo o alo eɔ tɔ zeze nɔ yewo yɔ. Wotɛnŋ kpɔɛ mɔ azanɖuɖu hwenuwo ɖekɛ yí nyi hwenu ciwo yí xomu lɔ anɔ ju. Nɔ evanyi ahan ɖe, lé àwɛɔ? Enu sugbɔ li ciwo yí àtɛnŋ awa asɔ dasɛ nɔ wo mɔ yelɔn  wo yí wogbenyi amɛ veviwo nɔ ye. (Elododo Wema 11:25; Ŋununyatɔ 3:12, 13) Ètɛnŋ yɔ wo mɔ wo le va nɔ ju koɖo ye gabuwo mɛ.

²⁴ Nɔ ao mɛwo ji mɔ yewoanya susu ci yí na azan ɖewo ɖuɖu degbejɔkɔ ji nɔ eoɔ, àtɛnŋ awa enumɛkuku le mìwo wemawo mɛ koɖo jw.org ji keŋ akpɔ enumɛɖeɖe ciwo yí akpedo eo nu naɖe susu lɔwo mɛ nɔ wo. Ŋgbena nɔ woakpɔɛ mɔ èteteɛkpɔ mɔ yeaɖu yewo ji le enyɔ ci mínukɔ mɛ o. Alo ŋgbena nɔ awa nɔ wo shigbe mɔ èʒinkɔ wo ji mɔ wo le kpɔ enuwo shigbe ye hannɛ o. Kpedo ao xomu nu nɔ akpɔɛ mɔ eɔ bu enu sugbɔ kpɔ nywiɖe gbɔxwe yí sɔ gbeta eoŋtɔ. Xo nuxu blɛwu yí ao “nuxuwo le nyɔnɔ tɛgbɛɛ, nɔ [na]sɔ dɔnnɔ” wo.—Kolosetɔwo 4:6.

25, 26. Lé jilawo atɛnŋ akpedo wowo viwo nu woawanɔ do Yehowa sewo ji doɔ?

²⁵ Ele veviɖe mɔ mɛɖeka mɛɖeka amɔŋje susu ciwo yí taɖo deɖunɔ azan ɖewo mɛ petii. (Ebretɔwo 5:14) Mìwo tajinu yí nyi mɔ mìado jijɔ nɔ Yehowa. Nɔ mìnyi jilawoɔ, mìɖo aji gamɛ akpenɔdo mìwo viwo nu nɔ woamɔŋje Bibla gɔnmɛɖosewo mɛ yí agbewanɔ do wo ji. Nɔ Yehowa vanyi amɛ ŋtɔŋtɔ nɔ woɔ, woavaji mɔ yewo nu le jɔ ji ni.—Ezai 48:17, 18; 1 Piɛ 3:15.

²⁶ Ejɔnɔ ji nɔ Yehowa nɔ ékpɔ mìwakɔ ci ji mìkpe keŋ asin mɛmiɖe so jimɛ. (Ʒan 4:23) Vɔ amɛ sugbɔ buini mɔ agbetɔ datɛnŋ ato nyɔnɔnwi le xexe cɛ ci yí ɖɔ koɖo ŋsukankan mɛ o. Nyɔnɔnwi yɔa? Eyi nu mìaxo nuxu so le eta ci yí gbɔgbɔ mɛ.