ENUKPLAKPLA 09

Gogo Mawu to gbedodoɖa ji

Xui

Ewa nɔ eo kpɔ mɔ yeʒan mɔdasɛnamɛ le agbemɛa? Èjijiɛ ɖoŋci nɔ nyɔbiɔse vevi ɖewoa? Èjijiɛ mɔ yeavo alo yeaɖo kandojia? Èjijiɛ mɔ yeagbegogo Mawu sɔwua? Gbedoɖa atɛnŋ akpedo eo nu le ŋcɛwo pleŋ mɛ. Vɔ lé woado gbe ɖaɖa nywiɖe doɔ? Mawu ɖonɔ to gbedodoɖawo pleŋ a? Nyi àtɛnŋ awa yí akando ji mɔ yɛase ye gbedodoɖawoɔ? Mìakpɔ ɖoŋci lɔwo.

1. Mi ele mɔ mìado gbe ɖaɖa nɔɔ, yí nyi nu mìatɛnŋ ado gbe ɖaɖa soɔ?

Yesu kpla mì mɔ mìɖo ado gbe ɖaɖa nɔ mìwo Da ci yí le jeŋkwimɛ ɖekɛ. Yesu ŋtɔ do gbe ɖaɖa nɔ Yehowa. Énu mɔ: “Le hanci yí mí a dogbe ɖaɖa do ke: ‘Mìwo Da ci yí le jeŋkwi mɛ . . .’” (Matie 6:9) Nɔ mìdokɔ gbe ɖaɖa nɔ Yehowaɔ, anyi mìdokɔ ŋsɛn exlɔ ci mìnyi koɖi.

Mìatɛnŋ ado gbe ɖaɖa so enu sugbɔ nu. Vɔ gbɔxwe Mawu aɖo gbedoɖa cɛwo nuɔ, ele mɔ woasɔgbe koɖo edro yi tɔ. “Nɔ mì byɔ enu ɖe toto edro [Mawu tɔ] mɛ ɔ, É ɖonɔ eto mì.” (1 Ʒan 5:14) Yesu na kpɔwɛ ciwo yí dasɛ enu ci hanciwo nu mìado gbe ɖaɖa so. (Hlɛn Matie 6:9-13.) Mìɖo adonɔ gbe ɖaɖa so enu ciwo yí kan mì nu. Sɔ kpe nɔ yɛɔ, mìɖo aɖonɔ ŋwi adonɔ akpe nɔ Mawu nɔ enu ciwo ewa nɔ mì yí agbedonɔ gbe ɖaɖa mɔ yɛ le kpedo mɛbuwo nu.

2. Lé mìɖo adonɔ gbe ɖaɖa doɔ?

Bibla nu nɔ mì mɔ, “mí nu míwo nyɔwo pleŋ nɔ Mawu.” (Ehajiji Wema 62:8) Eyi taɖo nyɔ ciwo mìanunɔ le gbedodoɖa mɛ ɖo aso mìwo jimɛ. Nɔ mìdokɔ gbe ɖaɖaɔ, mìatɛnŋ akɔ gbe yi ji anukɔ nyɔ lɔwo alo anukɔ wo le jimɛ. Mìatɛnŋ anɔ nyinɔnɔ, anɔ te abi anɔ nɔnɔmɛ bu ɖekpokpui mɛ, vɔ mìɖo awɛ le bubu mɛ. Mìatɛnŋ ado gbe ɖaɖa hweɖekpokpuinu le fiɖekpokpui.

3. Lé Mawu ɖonɔ mìwo gbedodoɖawo nu doɔ?

Étonɔ emɔ vovovo ji yí ɖonɔ mìwo gbedoɖawo nu. Yehowa na yi Nyɔ Bibla mì yí mìkpɔnɔ ɖoŋci nɔ mìwo nyɔbiɔsewo le mɛ. Mawu Nyɔ lɔ hlɛnhlɛn atɛnŋ “[akpedo] sukunu watɔwo nu yí wo a trɔsun amɛ nyaŋunuwo.” (Ehajiji Wema 19:7; hlɛn Ʒaki 1:5.) Mawu atɛnŋ ana susumɛ afa nɔ mì nɔ mìtokɔ cukaɖawo mɛ. Átɛnŋ agbewɛ yí yi sɛntɔwo avakpedo mì nu nɔ mìle ʒan mɛ.

JI DWI NI KPƆ DOJI

Kpɔ lé àwɛ adonɔ gbe ɖaɖa so jimɛ yí ajɔnɔ ji nɔ Mawu koɖo nyɔna ciwo àkpɔ nɔ èdonɔ gbe ɖaɖa.

4. Mawu mɔ mìwo le wa ŋɖewo gbɔxwe yease mìwo gbedoɖawo

Nyiwo yí adɔ Mawu ase mìwo gbedoɖawo alo dase woɔ? Xo VIDEO lɔ.

VIDEO: Mawu ɖonɔ to gbedoɖawo pleŋ a?—Akpaxwe kleŋ (2:42)

Yehowa ji mɔ mìwo le donɔ gbe ɖaɖa nɔ ye. Hlɛn Ehajiji Wema 65:2 yí akan seŋ so nyɔbiɔse cɛwo nu:

Èkpɔ mɔ ‘Mɛ ci yí senɔ gbedodoɖawo’ ji mɔ eɔ le donɔ gbe ɖaɖa nɔ yea? Nyi yí taɖo ènu ahan ɔ?

Nɔ mìji mɔ Mawu le se egbe ciwo mìdonɔ ɖaɖaɔ, ele mɔ mìanɔ agbe asɔ koɖo yi sewo. Hlɛn Mishe 3:4 koɖo 1 Piɛ 3:12 yí akan seŋ so nyɔbiɔse cɛ nu:

Lé mìawɛ akando ji mɔ Yehowa ase mìwo gbedoɖawoɔ?

Hweɖewonu le ahwa hwenuɔ, akpaxwe ve lɔwo donɔ gbe ɖaɖa mɔ yewoaɖu ji. Esɔgbe mɔ mìakpɔ emɔ mɔ, Mawu ase gbedoɖa cɛwoa?

5. Jimɛnyɔwo mìɖo anunɔ le gbedodoɖa mɛ

Wokpla mɛɖewo mɔ enyɔ ɖekɛŋmɛwo yí woanunɔ le gbedodoɖa mɛ. Vɔ ahan Mawu ji mɔ mìwo le donɔ gbe ɖaɖa nɔ ye nɛa? Hlɛn Matie 6:7 yí akan seŋ so nyɔbiɔse cɛ nu:

Lé àwɛ yí dagbe “trɔnɔ toto enyɔ” ɖekɛŋmɛwo ji le ao gbedoɖawo mɛɔ?

Gbeɖeka duuɔ, àtɛnŋ abunɔ tamɛ kpɔ so nunywi ɖe koŋ ci Yehowa wa nɔ eo nu keŋ adonɔ akpe ni. Nɔ èwa cɛ kwɛshila ɖekaɔ, àkpɔ mɔ àdo gbe ɖaɖa so enu vovovo amadrɛ nu yí danukɔ enyɔ ɖekɛŋmɛ lɔwo tɛgbɛɛ o.

Evida nywi jinɔ mɔ ye viye le nunɔ yi jimɛnyɔwo nɔ ye. Ahanke Yehowa ji mɔ mìwo le nunɔ mìwo jimɛnyɔwo nɔ ye nɛ

6. Gbedodoɖa nyi enu ci Mawu na mì

Lé gbedoɖa atɛnŋ akpedo mì nu do le hwenu nywiwo koɖo le cukaɖawo mɛɔ? Xo VIDEO lɔ.

VIDEO: Gbedodoɖa kpedo mì nu mìdonɔ ji (1:32)

Bibla ɖo gbe nɔ mì mɔ, gbedodoɖa atɛnŋ akpedo mì nu yí susumɛ afa nɔ mì ŋtɔŋtɔ. Hlɛn Filipitɔwo 4:6, 7 yí akan seŋ so nyɔbiɔse cɛwo nu:

Ci gbedodoɖa deɖenɔ mìwo cukaɖawo si gashiagamɛ ɖe, lé ekpenɔdo mì nu doɔ?
Nyiwo nu àji mɔ yeado gbe ɖaɖa soɔ?

Ènyaa?

Enyɔgbe “amen” gɔnmɛ yí nyi “le vamɛ” alo “dandandan.” So keke Bibla hwenu yí wonunɔ “amen” le vɔvɔnu nɔ gbedoɖawo.—1 Kronika 16:36.

7. Ðo gamɛ ɖɛ koŋ adonɔ gbe ɖaɖa

Hweɖewonuɔ, mìjannɔ keke yí ŋlɔnɔbe mɔ mìado gbe ɖaɖa. Lé gbedodoɖa nɔ veviɖe nɔ Yesu doɔ? Hlɛn Matie 14:23 koɖo Maki 1:35 yí akan seŋ so nyɔbiɔse cɛwo nu: