ENUKPLAKPLA 11

Lé àwɛ akpɔ ale sugbɔ le Bibla mɛ

Xui

Èjikɔ atɔ edɔ gangan ɖe ji kpɔ yí kpɔɛ mɔ, edɔ lɔ gbɔnnu sugbɔa? Nɔ dɔ lɔ anya wawa nɔ eoɔ, taŋfuin àtɔ wɛwɛ kpɛɛkpɛɛ. Ahanke enyinɔ nɔ Bibla hlɛnhlɛn can nɛ. Ètɛnŋ biɔkɔ se mɔ, ‘Shini age natɔ wema gangan cɛ hlɛnhlɛn soɔ?’ Le enukplakpla cɛ mɛɔ, mìakpɔ enu kleŋ ɖewo ciwo àtɛnŋ awa yí woakpedo eo nu nasenɔ vivi nɔ Bibla hlɛnhlɛn koɖo yi kplakpla.

1. Nyi yí taɖo ele mɔ mìaɖo gamɛ ɖe ɖɛ yí asɔ hlɛnnɔ Biblaɔ?

Nɔ mɛɖe ɖo gamɛ ɖe ɖɛ koŋ yí sɔ hlɛnnɔ Bibla alo “enukplakpla [Yehowa]” tɔwoɔ, eji ajɔɛni yí enuwo agbemlɛnɔ ni. (Hlɛn Ehajiji Wema 1:1-3.) Nɔ èji mɔ yeatɔ Bibla hlɛnhlɛn ɔ, tekpɔ asɔ minici kankin ahlɛnnɔ hwɛɖeka gbeɖeka duu. Lé èvamɔmɔŋje Mawu Nyɔ lɔ mɛ sɔwu doɔ, ahanke yi hlɛnhlɛn ajɔnɔ ji nɔ eo doji nɛ.

2. Nyi yí akpedo eo nu yí naɖu ale nɔ Bibla hlɛnhlɛn ɔ?

Gbɔxwe mìaɖu ale sugbɔ nɔ Bibla hlɛnhlɛn ɔ, ele mɔ mìacinɔ te yí abunɔ tamɛ so enu ci mìhlɛnhlɛn nu. Ele mɔ mìakplɛni “kede koɖo zan” yí agbebunɔ tamɛ kpɔ so nu. (Ʒozue 1:8) Nɔ èhlɛnkɔ Biblaɔ, biɔnɔ nyɔ cɛwo eoɖeki se: ‘Nyi yí nyɔ cɛ kplaŋ so Yehowa Mawu nuɔ? Lé nazin do le anyi gbemɛɔ? Lé natɛnŋ azan ŋci ŋhlɛn asɔ kpedo mɛbuwo nu doɔ?’

3. Hwenu àɖo ɖɛ yí asɔ hlɛnnɔ Biblaɔ?

Egbɔnnɔnu nɔ eo mɔ àkpɔ gamɛ ci àsɔ hlɛn Biblaa? Ewanɔ ahan nɔ amɛ sugbɔ le mì mɛ. Tekpɔ “a nya gamɛ zanzan.” (Efezitɔwo 5:16) Àsun ji awɛ nɔ èɖonɔ gamɛ ɖe ɖɛ koŋ yí sɔ hlɛnnɔ Bibla gbeɖeka duu. Mɛɖewo sɔ nyidin fɔnfɔnmɛ ɖɛ yí sɔ hlinni. Mɛbuwo sɔ hwenu ɖe ɖɛ le ŋkekeɛ mɛ yí hlinni, taŋfuin hwenu wojikɔ aɖu nu. Vɔ mɛbuwo hlɛnnɔ Bibla lɔ le fiɛfimɛ gbɔxwe ayi mlɔ anyi. Hwenu èkpɔ mɔ yɛanyɔ nɔ yeɔ?

JI DWI NI KPƆ DOJI

Kpɔ lé àwɛ nɔ Bibla hlɛnhlɛn avivinɔ nɔ eo doji. Gbekpɔ lé àdranɔdo nywiɖe keŋ akpɔ ekpla nywiwo le ao Bibla kplakpla mɛ.

Mìatɛnŋ akpla lé mìawɛ ahlɛnnɔ Bibla yí asenɔ vivi ni shigbe lé mìkplanɔ ŋɖuɖu vovovo yí ɖunɔ nɛ

4. Kpɔ lé àwɛ nɔ Bibla hlɛnhlɛn avivinɔ nɔ eo

Taŋfuin danɔ fafɛɖe mɔ woatɔ Bibla hlɛnhlɛn o. Ele ahan gan, mìatɛnŋ “akpla” lé mìahlɛnnɔ Bibla yí asenɔ vivi ni shigbe lé mìkplanɔ ŋɖe ci mìdeɖu kpɔ ɖuɖu yí vasenɔ vivi ni nɛ. Hlɛn 1 Piɛ 2:2, keŋ agbeje biɔse ci yí gbɔgbɔ mɛ:

Èkpɔɛ mɔ nɔ èhlɛnkɔ Bibla gbeɖeka duu ɖe, yi hlɛnhlɛn avajɔkɔ ji nɔ eo yí kpakpa asɔkɔ eo mɔ yeahlin dojia?

Xo VIDEO lɔ keŋ akpɔ lé mɛɖekawo wɛ do yí Bibla hlɛnhlɛn vajɔkɔ ji nɔ wo. Yi goduɔ, gbeje nyɔbiɔse ciwo yí gbɔgbɔ mɛ.

VIDEO: Jajɛ ɖekawo kpla lé woawɛ alɔn Mawu Nyɔ lɔ (5:33)

Le video lɔ mɛ ɖe, nyiwo yí ɖe fun nɔ jajɛ lɔwo yí wotekpɔ yí ɖu wo jiɔ?
Nyi yí kpedo wo nu wovatɔ Bibla hlɛnhlɛn shigbe lé woɖui mɔ yewoawɛ nɛɔ?
Lé wowɛ do yí Bibla hlɛnhlɛn vavivikɔ nɔ wo dojiɔ?

Ŋɖewo ciwo yí akpedo eo nu natɔ ji ke:

Sɔ Bibla gɔnmɛɖeɖe yoyu ci yí sɔgbe pɛpɛpɛ. Sɔ Xexe Yeye Gɔmeɖeɖe nɔ ele egbe ci èhlɛnnɔ mɛ abi egbe bu tɔ ci ènya hlɛnhlɛn ɖɛ nywiɖe asɔ ti kpɔ.
Tɔ hlinhlin so akpaxwe ciwo yí jɔ ji nɔ eo sɔwu. Nɔ àkpɔ susu buwoɔ, kpɔ dakavi ci yí nyi “Wa toto atɔ Bibla hlɛnhlɛn.”
Ŋwlɛ ŋciwo èhlɛn ɖɛ. Zan dakavi ci yí nyi “Ŋwlɛ ŋciwo èhlɛn le Bibla mɛ ɖɛ” ci yí le wema cɛ mɛ.
Zan JW Library^®dɔwanu lɔ. Àtɛnŋ azan JW Library ci yí le ao telefonu, tablɛti alo ɔdinatɛɛ ji keŋ asɔ hlɛnnɔ Bibla alo asɔ xonɔ odio Bibla tɔ yí asini le fiɖekpokpui ci èle.
Zan enyɔ ciwo yí le vɔvɔnu kpaxwe ci yí le Xexe Yeye Gɔmeɖeɖe mɛ. Àkpɔ nyigbantatawo, dakaviwo koɖo enyɔgbe veviwo gɔnmɛɖeɖe le mɛ. Enu cɛwo adɔ enuhlɛnhlɛn lɔ avivinɔ nɔ eo doji.

5. Dranɔ do nɔ Bibla nukplakpla lɔ

Hlɛn Ehajiji Wema 119:34, keŋ agbeje biɔse cɛ mɛ:

Nyi yí taɖo enyɔ mɔ, woado gbe ɖaɖa gbɔxwe atɔ Bibla hlɛnhlɛn alo gbɔxwe adra do nɔ Bibla nukplakplaɔ?

Lé àwɛ akpɔ ale sugbɔ sɔwu le Bibla nukplakpla ɖekaɖeka mɛɔ? Nɔ èdradra enukplakpla ɖe do le wema cɛ mɛɔ, wa ŋcɛwo kpɔ:

Hlɛn mamamɛ ciwo àkpɔ gbɔxwe akpɔ “Ji dwi ni kpɔ doji.”
Ji kpukpui lɔwo kpɔ yí ahlɛn wo keŋ akpɔ lé enyɔ ciwo yí le mamamɛ lɔwo mɛ ba koɖo kpukpui lɔwo do.
Do jeshi enyɔ vevi alo enyɔfɔkpe ciwo yí ɖo enyɔbiɔse ɖekaɖeka ŋci; ecɛ akpedo eo nu natɛnŋ avakan seŋ koɖo mɛ ci yí kplakɔ Bibla koɖo eo so enukplakpla lɔ nu.

Ènyaa?

Yehowa Kunuɖetɔwo zan Bibla gɔnmɛɖeɖe vovovowo vayi. Ele ahan gan, Ŋɔŋlɔ Kɔkɔeawo—Xexe Yeye Gɔmeɖeɖe zanzan jɔnɔ ji nɔ mì sugbɔ, ɖo esɔgbe pɛpɛpɛ, yi nyɔgbewo gɔnmɛ sese degbɔnnu o yí wogbezan Mawu ŋkɔ lɔ le mɛ.—Yi siti lɔ ji yí akpɔ “Yehowa Kunuɖetɔwo ɖo wowoŋtɔwo Bibla do akpoa?”

MƐÐEWO NUNƆ MƆ: “Edɔ gangan ŋtɔ teŋ yí Bibla kplakpla nyi. Nyɛŋdevo o; kpɔ ŋdeɖo ŋsɛn ci nasɔ kplɛ o.”

Lé èkpɔɛ doɔ?

ENU CI ÈKPLA

Nɔ àkpɔ ale sugbɔ le Bibla mɛɔ, ɖo gamɛ ɖɛ asɔ hlinni, donɔ gbe ɖaɖa yí abiɔnɔ Mawu mɔ yi le kpedo ye nu nɔ yeamɔŋje ŋci yejikɔ ahlɛn mɛ yí agbedranɔ do ɖɛ nɔ Bibla nukplakpla lɔwo.