ENUKPLAKPLA 16

Nyi Yesu wa hwenu ele nyigban jiɔ?

Xui

Amɛ sugbɔ kpɔnɔ Yesu do vifin ci mɛɖe deli aglɔn ta nɔ ji. Wogbekpɔɛni do enyɔnuɖɛtɔ ci yí nya ŋɖɛ alo ŋsu ɖe ci yí le ekudunu ji. Vɔ mìatɛnŋ agbejeshi enu sugbɔ so Yesu nu nɔ mìgbeje lé enɔ agbe do le nyigban ji mɛa? Le enukplakpla cɛ mɛɔ, mìakpɔ enuvevi ɖewo ciwo Yesu wa koɖo lé ekan eo do.

1.Edɔ ci yí nyi edɔ vevitɔ ci Yesu waɔ?

Edɔ vevitɔ ci Yesu wa yí nyi mɔ, “[é]dra eŋɛnywi ci yí xo nuxu so Efyɔɖuxu Mawutɔ lɔ nu.” (Hlɛn Luiki 4:43.) Édra eŋɛnywi ci yí nyi mɔ, Mawu aɖo Fyɔɖuxu alo acɛkpakpa ɖeka ci yí avakpɔ enu ciwo pleŋ jɔjɔ do agbetɔwo ji gbɔ. a Yesu wa dɔ sɛnŋsɛnŋɖe exwe amɛtɔn koɖo fan yí dra eŋɛnywi cɛ ci yí do ŋsɛn amɛwo.—Matie 9:35.

2.Nyi koŋ yí dɔ Yesu wa enujiŋwoɔ?

Bibla nu so Yesu nu mɔ: “Mawu sɔ dasɛ nɔ mí toto enudaʒiwo, enujiŋwo koɖo jeshidu nuwo ji. Mawu wa enu lɔwo toto Yesu ji.” (Edɔwawawo 2:22) Mawu na ŋsɛn Yesu yí etɛnŋ ɖo te jihɔntwi blabla, na ŋɖuɖu agbetɔ kotokun nɛniɖe, da dɔ̀ nɔ dɔ̀nɔwo yí gbefɔn amɛkukuwo so ku ŋtɔkpu. (Matie 8:23-27; 14:15-21; Maki 6:56; Luiki 7:11-17) Enujiŋ ciwo Yesu wa dasɛ petii mɔ Mawu yí dɔɛ ɖaɖa. Wogbedasɛ mɔ Yehowa ɖo ŋsɛn yí akpɔ mìwo nyɔwo pleŋ gbɔ.

3.Nyi mìatɛnŋ akpla so lé Yesu nɔ agbe do mɛɔ?

Yesu se tonu nɔ Yehowa le nɔnɔmɛ ɖekpokpui mɛ. (Hlɛn Ʒan 8:29.) Ci amɛwo trɔ kpe Yesu can ɔ, énɔ gbeji nɔ Dalɔ yí wa enu ci emɔ yi le wa keke sɔyi ku mɛ. Édasɛ mɔ, agbetɔwo atɛnŋ asɛn Mawu le egbejinɔnɔ mɛ nɔ nuwo gbɔngbɔnnu can. Yesu “gbé kpɔwɛ ɖɛ nɔ [mì] nɔ [mì] a kplɔ Yi teshiwo do.”—1 Piɛ 2:21.

JI DWI NI KPƆ DOJI

Kpɔ lé Yesu dra eŋɛnywi lɔ yí gbewa enujiŋwo do.

4.Yesu dra eŋɛnywi lɔ

Yesu zɔn afɔ to afizɔmɔwo ji yí wa kpeci sanŋdi nɛniɖe yí dra eŋɛnywi lɔ nɔ amɛ sugbɔ lé akpe ji do. Hlɛn Luiki 8:1, keŋ agbeje biɔse ciwo yí gbɔgbɔ mɛ:

Mɛ ciwo yí bɔnɔ doju aɖokɔ to Yesu ɖekɛwo yí eɖenɔ kunu nɔa?
Egbla ci Yesu do gbɔxwe yí kpɔnɔ amɛwoɔ?

Mawu nu ɖɛ mɔ Mɛsia lɔ adra eŋɛnywi nɔ amɛwo. Hlɛn Ezai 61:1, 2, keŋ agbeje biɔse ciwo yí gbɔgbɔ mɛ:

Lé Yesu wɛ yí enyɔnuɖɛ cɛ vamɛɔ?
Èkpɔ mɔ amɛwo ɖo ase eŋɛnywi cɛwo gbɛa?

5.Yesu kpla nyɔnɔnwi veviwo amɛwo

Sɔ kpe nɔ Mawu Fyɔɖuxu ŋɛnywi lɔ dradraɔ, Yesu na ekpla nywiwo amɛwo. Kpɔ ɖowo le Etojinuxu yi tɔ ci amɛ sugbɔ jeshi mɛ. Hlɛn Matie 6:14, 34 koɖo 7:12, keŋ agbeje biɔse ciwo yí gbɔgbɔ mɛ:

Enukplamu nywi ci Yesu kpla amɛwo le kpukpui cɛwo mɛɔ?
Èkpɔɛ mɔ nukplamu cɛ agbetɛnŋ akpedo amɛwo nu le egbɛmɛa?

6. Yesu wa enujiŋwo

Yehowa na ŋsɛn Yesu yí esɔ wa enujiŋ sugbɔ. Nɔ àkpɔ ɖekaɔ, hlɛn Maki 5:25-34 alo xo VIDEO lɔ. Yi goduɔ, gbeje nyɔbiɔse ciwo yí gbɔgbɔ mɛ.

VIDEO: Edɔ̀ mi nɔ nyɔnu dɔ̀nɔ lɔ (5:10)

Le video lɔ mɛ ɖe, nyi ji nyɔnu dɔ̀nɔ lɔ kandoɔ?
Nyi yí jɔ ji nɔ eo le enujiŋ cɛ mɛɔ?

Hlɛn Ʒan 5:36, keŋ agbeje biɔse cɛ mɛ:

Nyi yí enujiŋ ciwo Yesu wa nyi “ɖashifu” nɔ alo dasɛ so nuɔ?

Ènyaa?

Eŋɛnywiwema amɛnɛ ciwo yí nyi Matie, Maki, Luiki koɖo Ʒan mɛ yí enu sugbɔtɔ ci mìjeshi ɖɛ so Yesu nu le. Eŋɛnywiwemaŋwlɛtɔ ɖekaɖeka na enumɛɖeɖe vovovo so Yesu nu. Nɔ mìsɔ enumɛɖeɖe cɛwo xocaɔ, mìkpɔnɔ Yesu gbenɔnɔ nyakpɔkpɔ lɔ.

MATIE

eyi ŋwlɛ Eŋɛnywiwema ŋkɔtɔ. Yesu nukplakplawo ji koŋ etɛ gbe do, taŋtaŋ ŋciwo ekpla amɛwo kudo Mawu Fyɔɖuxu lɔ nu.
MAKI

eyi ŋwlɛ Eŋɛnywiwema ci yí kpokpo wu kpɛtɛwo. Exo nuxu so enujɔjɔ sugbɔ ciwo yí do jijɔ nɔ amɛ nu.
LUIKI

énu lé gbedodoɖa le veviɖe nɔ Yesu koɖo lé esɔ xomɛfafa wanɔ nu ɖaɖa nyɔnuwo gbɔ do.
ƷAN

yɛnu seŋ sugbɔtɔ ci Yesu kan koɖo yi xlɔ vevi lɔwo sɔ kpe nɔ mɛbuwo. Ecɛ dɔ mìkpɔ mɛ ci teŋ Yesu nyi.