Yehowa nyi ɖoɖo Mawu. (1 Korɛntitɔwo 14:33, 40) Eyi taɖo mìakpɔ emɔ mɔ yi hamɛ lɔ anɔ ɖoɖonu. Lé Kristotɔwo hamɛ lɔ le ɖoɖonu doɔ? Lé mìakpe ashi do toto cɛ nu do nɔ nuwo asɔ afɔ le hamɛ lɔ mɛɔ?

1.Mi yí nyi eta nɔ hamɛ lɔɔ?

“Kristo nyi eta nɔ Mawu habɔbɔ.” (Efezitɔwo 5:23) Ékpɔkɔ edɔ ci Yehowa mɛwo wakɔ le xexeɛ keŋkeŋ mɛ ji so keke jeŋkwimɛ. Yesu sɔ “hwashi egbejinɔtɔ koɖo ŋɖɛnyatɔ” sɔ ɖo nu nɔ dɔ lɔ. Mɛ ciwo yí shin le gbɔngbɔnmɛ, ciwo yí nyi hamɛmɛshinshinwo gbɛbɔbɔ hwɛhwɛ ɖeka yí nyi hwashi egbejinɔtɔ koɖo ŋɖɛnyatɔ lɔ. Wogbeyɔnɔ gbɛbɔbɔ lɔ mɔ Edɔjikpɔha. (Hlɛn Matie 24:45-47.) Edɔjikpɔha lɔ nanɔ mɔdasɛnamɛ hamɛwo le xexeɛ pleŋ mɛ shigbe lé exwe sanŋdi ŋkɔtɔ mɛ apotru koɖo hamɛmɛshinshin ciwo yí le Ʒerusalɛmu wɛni sa nɛ. (Edɔwawawo 15:2) Vɔ de ŋsu cɛwo yí kplɔkɔ mìwo habɔbɔ lɔ o. Wojinɔ ŋciwo Yehowa ji mɔ wo le wa kpɔ le yi Nyɔ lɔ mɛ yí gbelɔn faa yí wanɔ do Yesu ci yí nyi ta nɔ hamɛ lɔ mɔdasɛnamɛwo ji.

2.Edɔ ci hamɛmɛshinshinwo wanɔɔ?

Hamɛmɛshinshinwo nyi Kristotɔ ŋsu ciwo yí shin le gbɔngbɔnmɛ. Wozannɔ Enuŋwlɛŋwlɛ lɔwo yí sɔ kplanɔ nu Yehowa mɛwo, kpenɔdo wo nu yí gbesɔ donɔ ŋsɛn wo. Wodecunɔ ho nɔ wo nɔ dɔ lɔ ci wowanɔ o. Vɔ ‘wodewɛni shigbe wotɛ do wo ji nɛ o, wowɛni koɖo edro wowotɔ, toto edro Mawutɔ ji. Denyi ele xoɖyi ŋci yɔ o.’ (1 Piɛ 5:1, 2) Sumɔsumɔdɔwatɔwo kpenɔdo hamɛmɛshinshinwo nu. Le yiyimɛɔ, woatɛnŋ awa ŋciwo woji so wo gbɔ keŋ avanyi hamɛmɛshinshinwo.

Edɔjikpɔha lɔ sɔnɔ hamɛmɛshinshin ɖewo yí wonyinɔ ekán lɔ mɛ hamɛwo jikpɔtɔwo. Woyi jinɔ hamɛ vovovowo kpɔ yí danasɛ mɔ nɔ wo yí gbedonɔ ŋsɛn nɔviŋsu koɖo nɔvinyɔnuwo. Ekán lɔ mɛ hamɛwo jikpɔtɔwo yí sɔnɔ nɔviŋsuwo yí wonyinɔ sumɔsumɔdɔwatɔ abi hamɛmɛshinshinwo. Gbɔxwe woasɔ woɔ, wozannɔ Bibla keŋ yí sɔ kpɔnɔ mɔ nɔviŋsu lɔwo sɔgbe koɖo nyɔ ciwo yí Bibla nu so nɛnɛmɛwo nu ma.—1 Timɔte 3:1-10, 12; Titu 1:5-9.

3.Edɔ ci Yehowa Kunuɖetɔ ɖekaɖeka wanɔɔ?

Hamɛ lɔ mɛ tɔwo pleŋ wanɔ ɖe le hamɛ lɔ bɔbɔwo mɛ yí gbeɖenɔ kunu lé woakpe ji do yí sɔ ‘kannɔfu Yehowa ŋkɔ.’—Hlɛn Ehajiji Wema 148:12, 13.

 JI DWI NI KPƆ DOJI

4.Yesu nyi amɛkplɔtɔ ci yí fa xomɛ

Yesu sɔ xomɛfafa yɔkɔ mì mɔ mìwo le va nɔ yeakplɔ mì. Hlɛn Matie 11:28-30, keŋ agbeje nyɔbiɔse ciwo yí gbɔgbɔ mɛ:

• Amɛkplɔtɔ ciŋmɛ Yesu nyiɔ, yí lé ejijiɛ mɔ le wanɔ nɔ mì nɔ yekplɔkɔ mìɔ?

5. Hamɛmɛshinshinwo ɖonɔ kpɔwɛ yí sɔ kplanɔ nu amɛ

1. Hamɛmɛshinshinwo kpɔtɔ donɔ ŋsɛn kacaca ci yí le wowo koɖo Yehowa gblamɛ yí gbekpenɔdo wowo xomumɛtɔwo nu yí wowo can wɛni ahan

2. Hamɛmɛshinshinwo lenɔ bu nɔ mɛshiamɛ le hamɛ lɔ mɛ

3. Hamɛmɛshinshinwo ɖenɔ kunu blaŋblaŋ

4. Hamɛmɛshinshinwo kplanɔ nu amɛ. Wocucunɔ Fyɔɖuxuxɔ mɛ yí gbewanɔ dɔ buwo

 6. Mìawa dɔ alɔlealɔmɛ koɖo hamɛmɛshinshinwo dru

Bibla nu susu vevi ɖeka ci yí taɖo mìawa dɔ koɖo hamɛmɛshinshinwo alɔlealɔmɛ. Hlɛn Ebretɔwo 13:17, keŋ agbeje biɔse ciwo yí gbɔgbɔ mɛ:

• Ci Bibla mɔ mìwo le se tonu nɔ mɛ ciwo yí dadasɛ mɔ nɔ mì yí agbena bubu wo ɖe, esɔgbea? Nyi yí taɖo esɔgbe alo desɔgbeɔ?

Hlɛn Luiki 16:10 yí agbeje biɔse cɛ mɛ:

• Nyi yí taɖo ele veviɖe mɔ mìasenɔ hamɛmɛshinshinwo tɔ hweshiahwenu nɔ egbenyi enu hwɛhwɛwo mɛ yɔ can ɔ?

 ENU CI ÈKPLA

Yesu yí nyi ta nɔ hamɛ lɔ. Mìsɔ jijɔ wanɔ dɔ alɔlealɔmɛ koɖo hamɛmɛshinshin ciwo yí Yesu dadasɛ emɔ nɔ, ɖo wofanɔ akɔn nɔ mì yí gbekplanɔ nu mì to wowoŋtɔwo kpɔwɛwo ji.

Enumɛtoto

• Mí yí nyi ta nɔ hamɛ lɔɔ?

• Lé hamɛmɛshinshinwo kpenɔdo hamɛ lɔ nu doɔ?

• Edɔ ci Yehowa sɛntɔ ɖekaɖeka wanɔɔ?