ENUKPLAKPLA 50
Lé ao xomu awɛ akpɔnɔ jijɔɔ?—Akpaxwe 2
Enunana yí ɖeviwo nyi so Yehowa gbɔ. Éji mɔ jilawo awa ɖaŋ alenɔ bu nɔ enunana cɛ. Yehowa na enukplamu ciwo mɛ nunya le yí woakpedo jilawo nu woasun ji awɛ. Enukplamu lɔwo atɛnŋ akpedo ɖeviwo nu hɛnnɛ yí woawanɔ enu ciwo yí adɔ jijɔ anɔ xomu lɔ mɛ.
1. Enukplamu ci Yehowa na vidawo koɖo vinɔwoɔ?
Yehowa ji mɔ jilawo alɔn wowo viwo yí azan gamɛ sugbɔ asɔ nɔnɔ ju koɖo wo lé woakpe ji do. Éji mɔ jilawo aglɔnnɔ ta nɔ wowo viwo nɔ ŋɖe ŋgbewa wo o, yí agbezannɔ Bibla gɔnmɛɖose veviwo asɔ kplanɔ nu wo. (Elododo Wema 1:8) Énu nɔ vidawo mɔ: “Mí hɛn [míwo viwo] yí a nana wo enukplamu koɖo ese ji nɔ̀nɔ nɔ [Yehowa].” (Hlɛn Efezitɔwo 6:4.) Ejɔnɔ ji nɔ Yehowa nɔ jilawo ŋtɔwo zan yi mɔdasɛnamɛwo yí sɔ kplakpla nu wowo viwo yí wodesɔ xu kɔ nɔ mɛbuɖe mɔ yɛ le wɛ o.
2. Enukplamu ci Yehowa na ɖeviwoɔ?
Yehowa kpla nu ɖeviwo mɔ: “Mí bunɔ míwo jilawo.” (Hlɛn Kolosetɔwo 3:20.) Nɔ ɖeviwo bubuɔ wowo dawo koɖo wowo nɔwo yí seseɛ tonu nɔ woɔ, ejɔnɔ ji nɔ Yehowa yí gbejɔnɔ ji nɔ jila lɔwo hɛnnɛ. (Elododo Wema 23:22-25) Hwenu Yesu nyi vihwɛɔ, éɖo kpɔwɛ nywi ɖeka ɖɛ. Ci yi jilawo nyi amɛmakpemakpewo yí yiŋtɔ nyi amɛmaɖoafɛn can ɔ, ése tonu nɔ wo yí gbena bubu wo.—Luiki 2:51, 52.
3. Lé eɔ koɖo ao xomu awɛ ate gogo Mawuɔ?
Nɔ jila ènyiɔ, kankandoji li mɔ, èji mɔ ye viyewo le lɔn Yehowa shigbe eye hannɛ. Lé àwɛ do keke anyi ahan ɔ? Ele mɔ àwa do enyɔ cɛ ci Bibla nu ji mɔ: “Mí je agbla yí akpla [Yehowa sewo] míwo viwo. Mí xo nuxu so ese lɔwo nu hwecinu mí le anyinɔ̀nɔ le míwo xwe mɛ, koɖo hwecinu mí le esa ɖyikɔ le emɔ ji.” (2 Ese Wema 6:7) Enyɔgbe “je agla yí akpla” nu amɛ gɔnmɛ yí nyi mɔ, woatrɔnɔ to enyɔ lɔ ji ni. Ahanke ele mɔ eɔ can àtrɔnɔ to enyɔ ci ènukɔ nɔ viowo ji nɔ woatɛnŋ ali ɖɛ do susu mɛ avaɖonɔ ŋwi yi. Enyɔ ci kpukpui lɔ nukɔ yí nyi mɔ, èɖo ajinɔ emɔ ciwo yí hun nɔ eo kpɔ le ŋkeke ɖeshiaɖe mɛ keŋ asɔ xonɔ nuxu so Yehowa nu nɔ ao viwo blaŋblaŋ. Nɔ xomu lɔ ɖo gamɛ ɖe ɖɛ le kwɛshila ɖeshiaɖe mɛ yí sɔ nɔnɔ ju keŋ yí kplanɔ nu so Yehowa nu le Bibla mɛɔ, enyɔnɔ sugbɔ. Nɔ ɖeviwo dele mí shiɔ, míasɔ hwenu ɖe ɖɛ le kwɛshila ɖeshiaɖe mɛ yí asɔ kplanɔ nu le Mawu Nyɔ lɔ mɛ. Ecɛ adɔ míakpɔtɔ aɖuɖuɔ le nɔ enu ci míkplakɔ le xomu lɔ mɛ.
JI DWI NI KPƆ DOJI
Kpɔ emɔdasɛnamɛ ŋtɔŋtɔ ciwo yí akpedo xomu ɖe nu yí ale vofamɛ yí agbekpɔkɔ jijɔ.
4. Sɔ lɔnlɔn na kpla viowo
Ekplanana ɖevi ɖe atɛnŋ agbɔnnu. Lé Bibla atɛnŋ akpedo amɛ nu doɔ? Hlɛn Ʒaki 1:19, 20, keŋ agbeje biɔse cɛwo mɛ:
-
Lé jilawo atɛnŋ adasɛ do mɔ yewolɔn yewo viwo nɔ wole seŋ kankɔ koɖo woɔ?
-
Nyi yí taɖo nɔ dɔmɛzi le jila ɖe jiɔ, deɖo atekpɔ gbeɖe mɔ yeana kpla ye viyewoɔ? a
5. Glɔn ta nɔ viowo
Nɔ àglɔn ta nɔ viowoɔ, ele veviɖe mɔ àxonɔ nuxu so gbɔdɔndɔn nyɔwo nu nɔ ɖevi ɖekaɖeka. Ecɛ wawa tɛnŋ gbɔnnu nɔ eo. Xo VIDEO lɔ, keŋ agbeje biɔse ciwo yí gbɔgbɔ mɛ.
-
Nyi yí taɖo egbɔnnɔnu nɔ jila ɖewo mɔ woaxo nuxu so gbɔdɔndɔn nu nɔ wowo viwoɔ?
-
Lé jila ɖewo wɛ do yí xo nuxu so gbɔdɔndɔn nu nɔ wowo viwoɔ?
Shigbe lé wonui ɖɛ nɛɔ, Satana xexe lɔ fɔn yí nyinakɔ doji. Hlɛn 2 Timɔte 3:1, 13, keŋ agbeje biɔse cɛ mɛ:
-
Amɛvɔn ciwo nu woxo nuxu so le kpukpui 13 tɔ lɔ mɛ ɖewo dɔnnɔ ɖeviwo gbɔ koɖo akpasɛnsin. Nyi yí taɖo ele veviɖe mɔ, jilawo akplanɔ nu wowo viwo so gbɔdɔndɔn nuɔ, yí lé woawɛ aglɔn ta nɔ wowoɖekiwo nɔ tamɛsɛntɔ cɛwo ŋgbewa nu koɖo woɔ?
Ènyaa?
Yehowa Kunuɖetɔwo wa wema sugbɔ ɖɛ ciwo yí atɛnŋ akpedo jilawo nu woakpla nu wowo viwo so gbɔdɔndɔn nyɔwo nu yí aglɔn ta nɔ wo. Le kpɔwɛ mɛ, kpɔ:
-
Glɔn ta nɔ viowo (video)
-
“Kpla nu viowo so gbɔdɔndɔn nu” (Nyɔ! No. 5 2016)
6. Bunɔ ao jilawo
Ðeviwo koɖo jajɛwo atɛnŋ ato lé woxonɔ nuxu nɔ wowo jilawo ji yí asɔ dasɛ mɔ yewonana bubu wo. Xo VIDEO lɔ, keŋ agbeje biɔse ciwo yí gbɔgbɔ mɛ.
-
Nyi yí taɖo ele veviɖe mɔ ɖevi ɖe alo jajɛ ɖe abunɔ yi jilawo nɔ éxoxoɔ nuxu nɔ woɔ?
-
Lé jajɛ ɖe axo nuxu nɔ yi jilawo do yí asɔ dasɛ mɔ yenana bubu woɔ?
Hlɛn Elododo Wema 1:8, keŋ agbeje biɔse cɛ mɛ:
-
Nɔ jilawo nunuɔ enu ci jajɛ ɖe ɖo awa ni ɖe, lé eɖo awa nu doɔ?
7. Eo koɖo ao xomu le nɔ ju akpla Bibla
Yehowa Kunuɖetɔwo xomuwo ɖonɔ hwenu ɖe ɖɛ koŋ le kwɛshila ɖeshiaɖe mɛ yí sɔ wanɔ sɛnsɛn xomumɛtɔ. Lé sɛnsɛn xomumɛtɔ lɔ yinɔ doɔ? Xo VIDEO lɔ, keŋ agbeje biɔse ciwo yí gbɔgbɔ mɛ.
-
Lé xomu ɖe awɛ awanɔ sɛnsɛn xomumɛtɔ lɔ yí dagliniɔ?
-
Nyi jila ɖe awa keŋ nɔ sɛnsɛn xomumɛtɔ lɔ anyinɔ enu ŋtɔŋtɔ yí agbevivinɔɔ?—Kpɔ foto ci yí le tɔtɔmɛ nɔ nukplakpla cɛ.
-
Taŋfuin nyi yí adɔ yí agbɔnnu nɔ ao xomu lɔ mɔ mìanɔ ju akpla nu do ɖekɛɔ?
Sasa le Izraɛliɔ, Yehowa ji mɔ xomuwo le nɔnɔ ju keŋ akannɔ seŋ so Enuŋwlɛŋwlɛ lɔwo nu blaŋblaŋ. Hlɛn 2 Ese Wema 6:6, 7, keŋ agbeje biɔse cɛ mɛ:
-
Lé àwa do gɔnmɛɖose cɛ ji doɔ?
Ŋɖewo ciwo àwanɔ le sɛnsɛn xomumɛtɔ lɔ mɛ ke:
-
Dranɔ hamɛ lɔ bɔbɔwo do.
-
Hlɛnnɔ Bibla mɛ xolɔlɔ ciwo yí avivi nɔ ao xomu yí agbekannɔ seŋ so wo nu.
-
Nɔ evi hwɛhwɛwo le eo shiɔ, wa kɔpi nɔ ɖeviwo dɔwo le jw.org ji.
-
Nɔ evi ciwo yí shin hwɛɖeka yí le eo shiɔ, gbejenɔ nyɔci ciwo wowa nɔ jajɛwo koŋ le jw.org ji mɛ koɖo wo.
-
Sɔ Bibla mɛ xolɔlɔwo wanɔ sɛni koɖo viowo.
-
Kpɔ video ɖe le jw.org ji yí akan seŋ so nu.
MƐÐEWO NUNƆ MƆ: “Bibla mɛ mɔmɔŋje gbɔnnɔnu nɔ mɛganxuwo hweɖowonu, ci yí vanyi vihwɛwo tɔɔ?”
-
Nyɔ ci ànu asɔ ɖo ŋci nɔ woɔ?
ENU CI ÈKPLA
Yehowa ji mɔ vida koɖo vinɔwo alɔn wowo viwo, ananɔ kpla wo yí aglɔnnɔ ta nɔ wo; éji mɔ ɖeviwo le bunɔ wowo jilawo, yí asenɔ tonu nɔ wo; égbeji mɔ xomuwo anɔ ju asɛnnɔ ye do ɖekɛ.
Enumɛtoto
-
Lé jilawo awɛ ananɔ kpla wowo viwo yí agbeglɔnnɔ ta nɔ woɔ?
-
Lé ɖeviwo adasɛ do mɔ yewonana bubu yewo jilawoɔ?
-
Nɔ woɖo hwenu ɖe ɖɛ koŋ le kwɛshila ɖeshiaɖe mɛ yí sɔ wanɔ sɛnsɛn xomumɛtɔ ɖe, nyɔna ciwo yí le mɛɔ?
KPƆ ŊCƐWO KPƆ
Nyiwo àkpla vio ɖɛ gbɔxwe avashin ɔ?
Kpɔ enukplamu ŋtɔŋtɔ ciwo Bibla na mɛ ciwo yí leleɛ bu nɔ wowo jila shinshinwo ɖa.
“Lé Bibla nu so ebulele nɔ jila shinshinwo nuɔ?” (Àkpɔɛ le siti lɔ ji)
Kpɔ lé ŋsu ɖeka ci yí denya lé awɛ ahɛn eviɛwo vanyi evida nywi do ɖa.
Kpɔ lé vidawo awɛ ado ŋsɛn ekacaca ci yí le gblamɛ nɔ wo koɖo wowo vi ŋsuviwo.
“Lé vidawo awɛ ate gogo wowo vi ŋsuviwoɔ?” (Jutakpɔxɔ 1er novembre 2011)
a Le Bibla mɛɔ, enyɔgbe “ekplanana” hɛn susu yi woakpla nu amɛ, woadasɛ emɔ nɔ amɛ koɖo woagbe enyɔ nɔ amɛ ji. Dedasɛ gbeɖe mɔ woasɛn tamɛ alo ave xomɛ do amɛ o.—Elododo Wema 4:1.
