Oo. Yehowa Kunuɖetɔwo degbenɔ mɔ yewodashi abɔta o. Mìkpɔnɔ mɔ Kristotɔ ɖekaɖeka yí asɔ gbeta yiŋtɔ. Mìjinɔ edɔ̀dada mɔnu nywi le dotoxwe, yí ŋkɔyiyi sugbɔ ci wowakɔ le edɔ̀dada mɔnuwo mɛ yí asɔ ɖe edɔ̀lele sɛnŋsɛnŋwo kpɔtɔ jɔnɔ ji nɔ mì.

 Mìdo akpe nɔ dotowo nɔ dɔ sɛnsin ciwo wakɔ wole, vevitɔ le hwenu sɛnŋsɛnŋwo mɛ.

 Yehowa Kunuɖetɔwo wanɔ nu sɔgbe koɖo axɔsudɔwatɔ ciwo yí kpɔnɔ lanmɛsɛn nyɔwo gbɔ. Le kpɔwɛ mɛ, ci COVID-19 dɔ̀bamɛ lɔ toɔ, Yehowa Kunuɖetɔwo kpɔtɔ le nu ŋwlɛkɔ yí sɔ ɖoɖoɔ ŋwi nu amɛwo le gbe sanŋdi nɛniɖe mɛ le siti cɛ ji, yí sɔ dokɔ ŋsɛn amowo nɔ woase tonu nɔ emɔdasɛnamɛ ciwo yí wona kudo etaglɔnnɔamɛɖeki nu le wo gbɔ ji. Emɔdasɛnamɛ lɔwo kan azɔge nɔnɔ nɔ amowo koɖo wawa do ese ci yí kudo bɔbɔ doju nu ji, amɛxoxo do xɔ, alɔklɔklɔ, enucɔncɔn ŋɔci koɖo nu koɖo nubu ciwo acɛkpɔtɔwo mɔ wo le wa wo hɛnnɛ.—Rɔmatɔwo 13:1, 2.

 So exwe nɛniwo keɔ, Yehowa Kunuɖetɔwo wemawo tɛtɛ gbe do mɔdasɛnamɛ ciwo yí gbɔgbɔ:

•   Mɛɖekamɛɖeka yí asɔ gbeta kudo yi lanmɛsɛn nyɔwo nu.—Galatitɔwo 6:5.

   “[Enyɔdrawema cɛ] dedrenɔ cike ɖe alo dɔ̀damɔnu ɖe nɔ mɛɖe o, ahanke yí denanɔ emɔdasɛnamɛwo kudo dɔ̀danyɔwo nu nɛ. Yi tajinu kpoŋ yí nyi mɔ, anu nyɔnɔnwi ci yí kudo nɔnɔmɛ ɖe nu, eyi enuhlɛntɔ lɔ ŋtɔ asɔ gbeta yiŋtɔ.”—Nyɔ! 8 février 1987 le Flansegbe mɛ

   “Eoŋtɔ yí asɔ gbeta nɔ enyi mɔ eo koɖo ao viwo ashi abɔta.”—Nyɔ! 22 août 1965 le Flansegbe mɛ

•   Ci agbe nyi nu vevi nɔ mì yí taɖo mìjinɔ edɔ̀dadamɔnu le dotowo gbɔ.—Edɔwawawo 17:28.

   “Nɔ Yehowa Kunuɖetɔwo lekɔ dɔ̀ɔ, woyinɔ dotowo gbɔ keŋ nɔ woakpedo wo nu. Wolɔn agbe lɔ yí gbewanɔ ŋɖekpokpui ci yí sɔgbe koɖo ŋwlɛŋwlɛ lɔwo keŋ anɔ agbe jinjin mɔ.”—Jutakpɔxɔ, 1^er juillet 1975 le Ŋlɛshigbe mɛ

   “Ejɔnɔ ji nɔ Yehowa Kunuɖetɔwo mɔ yewoazan cike koɖo dɔ̀dadamɔnuwo le dotoxwe. Wojinɔ mɔ yewoanɔ nywiɖe le lanmɛsɛn mɛ keŋ anɔ agbe jinjin. Le nyɔnɔnwi mɛɔ, shigbe exwe sanŋdi ŋkɔtɔ Kristotɔ Luiki nɛɔ, Yehowa Kunuɖetɔ ɖewo nyi dotowo. . . . Yehowa Kunuɖetɔwo kpɔnɔ jijɔ do edɔ sɛnsin koɖo amɛɖekisɔsɔna dotoxwe dɔwatɔwo tɔ nu. Wogbekpɔnɔ jijɔ nɔ dotoxwe dɔwatɔ cɛwo kpedo wo nu yí wokpɔ wowoɖekiwo mɛ nywiɖe.”—Jutakpɔxɔ, 1^er avril 2011 le Evegbe mɛ