Yehowa Kunuɖetɔwo zannɔ Bibla gɔnmɛɖeɖe vovovo nɔ wokplakɔ Bibla. Vɔ ejɔnɔ ji nɔ mì sugbɔ mɔ, mìazan Ŋɔŋlɔ Kɔkɔeawo—Xexe Yeye Gɔmeɖeɖe nɔ ele egbe ci mìdokɔ mɛ, ɖo yɛzannɔ Mawu ŋkɔ lɔ, esɔgbe pɛpɛpɛ yí yi nyɔwo mɛ kɔ petii.

•   Mawu ŋkɔ lɔ zanzan. Bibla gɔnmɛɖetɔ ɖewo dekanfu mɛ ci tɔ Bibla lɔ nyi le shiniwo ele mɔ woawɛ le o. Le kpɔwɛ mɛ, woŋwlɛ mɛ ciwo yí wu 70 ŋkɔ do Bibla gɔnmɛɖeɖe ɖeka mɛ, ɖo mɛ ŋnɔwo yí wa dɔ doju yí woɖe Bibla lɔ ti. Gan le Bibla ŋtɔ́ lɔ ke mɛɔ, wodeŋwlɛ Yehowa Mawu ci tɔ Bibla lɔ nyi ŋkɔ do mɛ o!

   To akpo nɔ Bibla ŋtɔ́woɔ, Xexe Yeye Gɔmeɖeɖe yɛŋwlɛ Mawu ŋkɔ lɔ do texwe kotokun nɛniɖe ciwo yí ele le enuŋwlɛŋwlɛ ŋkɔtɔ lɔwo mɛ. Gan wodeŋwlɛ gbɛbɔbɔ ci yí ɖe Bibla lɔ gɔnmɛ tɔ ɖe ŋkɔ do fiɖe ni o.

•   Enyɔ lɔwo sɔgbe pɛpɛpɛ. De Bibla gɔnmɛɖeɖewo pleŋ yí nu ŋɛdu ci yí le Bibla ŋkɔtɔ lɔ mɛ pɛpɛpɛ o. Le kpɔwɛ mɛ, ahan yí Bibla gɔnmɛɖetɔ ɖekawo ɖe Matie 5:22 mɛ ke: “Amɛ ci yí a nu nɔ nɔviɛ mɔ, ‘Sukunɔ yí e nyi’ ɔ, yi kpaxwe a nyi ezomavɔ mɛ.” Vɔ enyɔgbe ci enuŋwlɛŋwlɛ ŋkɔtɔ lɔ zan yí nyi “Gehena,” de “ezomavɔ” yɔ o. Taŋfuin egbegɔnmɛɖetɔ lɔwo zan “ezomavɔ,” ɖo woxɔɛ se mɔ woado agbeya nɔ amɛvwinwo tɛgbɛɛ le ezovamɔ ɖe mɛ. Vɔ susu ŋtɔ́ deso Bibla mɛ o. Eyi taɖo Xexe Yeye Gɔmeɖeɖe yɛŋwlɛ enu ci yí sɔgbe pɛɛ. Emɔ: “Mɛ ci yí anu mɔ, ‘Elan ènyi!’ɔ, esɔgbe mɔ woasɔ do Gehena zo mɛ.”

•   Enyɔ lɔwo mɛ kɔ petii. Enyɔ ciwo yí le Bibla gɔnmɛɖeɖe ci yí nyɔ mɛ sɔnɔgbe. Gbesɔ kpe niɔ, yi nyɔwo mɛ gbekɔnɔ petii yí womɔnɔŋje wo mɛ bɔbɔɛɖe. Mìasɔ kpɔwɛ ɖeka. Le Matie 5:3 mɛɔ, Yesu zan nyɔgbe ɖeka ci gɔnmɛ woatɛnŋ aɖe tiin mɔ, “jijɔ mɛwo yí nyi mɛ ciwo yí nyi woamɛnɔwo le gbɔngbɔn mɛ.” Ci yí nyɔgbe ŋnɔwo gɔnmɛsese agbɔnnu hwɛɖeka le egbɛ mɛɔ, Xexe Yeye Gɔmeɖeɖe yɛɖe kpukpui lɔ mɛ yí yi gɔnmɛsese vale bɔbɔɛɖe sɔwu. Enu mɔ “jijɔ mɛwo yí nyi mɛ ciwo yí nya mɔ gbɔngbɔnmɛnuwo wudo yewo.”

 Xexe Yeye Gɔmeɖeɖe zan Mawu ŋkɔ lɔ, esɔgbe pɛpɛpɛ yí wogbemɔnɔŋje yi nyɔwo mɛ fafɛɖe. Sɔ kpe nɔ cɛwoɔ, nubu gbeli ci yí na eto akpo: womini eho maxɔ. Ecɛ wɛ mɔ amɛ miliɔn nɛniɖe tɛnŋ hlɛnkɔ Bibla le wowoŋtɔwo gbe mɛ, nɔ eho dele wo shi yí woaxwle Bibla wowoŋtɔwo can.