LEKSYON 04
Sin-o ro Dyos?
Halin kato ro mga tawo hay nagasimba sa abu nga mga dyos. Pero, ginapakilaea it Biblia ro sambato eang nga Dyos imaw ro “mas gamhanan kaysa sa ibang mga dyos.” (2 Cronica 2:5) Sin-o imaw? Ag ham-an mas gamhanan imaw kaysa sa ibang mga dyos nga ginasimba it mga tawo? Sa rayang leksyon, matun-an mo kon paano ginapakilaea it Dyos ro anang sarili kimo.
1. Ano ro ngaean it Dyos, ag paano kita makasigurado nga gusto na nga masayran naton ra?
Ginapakilaea it Dyos ro anang ngaean sa Biblia. Naghambae imaw: “Ako si Jehova. Ruyon ro akong ngaean.” (Basaha ro Isaias 42:5, 8.) Ro ngaean nga “Jehova” hay translation it Hebreo nga ngaean nga nagakahueogan “Mangin Ako Kon Ano ro Ginpili Ko.” Gusto ni Jehova nga masayran naton ro anang ngaean. (Exodo 3:15) Paano kita makasigurado karon? Ginpasueat na sa Biblia ro anang ngaean it sobra 7,000 nga beses! a Ro ngaean nga Jehova hay para sa “matuod ag buhi nga Dyos.”—1 Tesalonica 1:9.
2. Ano ro ginasugid it Biblia parti kay Jehova?
Nagahambae ro Biblia nga sa tanan nga mga dyos nga ginsimba it mga tawo, si Jehova eang ro matuod nga Dyos. Ham-an? Abu ro mga rason. Si Jehova ro may pinakamataas nga awtoridad, ag imaw eamang “ro Eabing Mataas sa bilog nga eugta.” (Basaha ro Salmo 83:18.) Imaw ro “Makagagahum,” buot hambaeon may gahum imaw nga obrahon kon ano ro anang ginpili. Imaw ro nagtuga it “tanan nga mga butang”—ro uniberso ag tanan nga may kabuhi sa eugta. (Pahayag 4:8, 11, NWT) Bukon imaw it pareho katon, tungod si Jehova hay owa it gin-umpisahan ag owa man it katapusan.—Salmo 90:2.
TUN-I PA GID
Sayura ro kinaiba ku mga titulo it Dyos sa anang personal nga ngaean nga owa’t kapareho. Matun-an man naton kon paano ag ham-an ginpakilaea nana ro anang ngaean kimo.
3. Ro Dyos hay abu it titulo, pero sambato eang ro anang ngaean
Agud makita ro kinaiba ku titulo it sangka tawo sa anang ngaean, tan-awa ro VIDEO, ag talakaya rayon rayang pangutana.
-
Ano ro kinaiba it titulo, pareho it “Ginuo,” sa personal nga ngaean?
Nagahambae ro Biblia nga ro mga tawo hay nagasimba sa abu nga mga dyos ag mga ginuo. Basaha ro Salmo 136:1-3, ag talakaya rayon rayang pangutana:
-
Sin-o ro “Dyos ku mga dyos” ag “Ginuo ku mga ginuo”?
4. Gusto ni Jehova nga masayran mo ro anang ngaean ag gamiton ra
Paano mo nasayran nga gusto ni Jehova nga masayran mo ro anang ngaean? Tan-awa ro VIDEO, ag talakaya rayon rayang mga pangutana.
-
Kon kimo, gusto gid baea it Dyos nga masayran mo ro anang ngaean? Ham-an?
Gusto ni Jehova nga gamiton it mga tawo ro anang ngaean. Basaha ro Roma 10:13, ag talakaya rayon rayang mga pangutana:
-
Ham-an importante nga gamiton ro ngaean it Dyos nga Jehova?
-
Ano ing mabatyagan kon matandaan it sangka tawo ro imong ngaean ag gamiton ra?
-
Ano baea ro mabatyagan ni Jehova kon gamiton mo ro anang ngaean?
5. Gusto ni Jehova nga mangin amigo ka
Ro bayi nga taga-Cambodia nga si Soten hay nasadyahan gid kat hasayran na ro ngaean it Dyos. Tan-awa ro VIDEO, ag talakaya rayon rayang pangutana.
-
Sa video, ano ro epekto kay Soten kat hasayran na ro ngaean it Dyos?
Bago ka mangin amigo it sangka tawo, kinahang-ean mo anay masayran ro anang ngaean. Basaha ro Santiago 4:8a, ag talakaya rayon rayang mga pangutana:
-
Ano ro gusto ni Jehova nga obrahon mo?
-
Ham-an mas gaeapit ka pa gid sa Dyos kon sayod mo ag ginagamit mo ro anang ngaean?
KON MAY MAGHAMBAE: “Sambato malang ro Dyos, bukon man it importante kon ano ro pagtawag mo kana.”
-
Nagapati ka baea nga ro ngaean it Dyos hay Jehova?
-
Paano mo ipaathag nga gusto it Dyos nga gamiton mo ro anang ngaean?
SUMARYO
Ro ngaean it eamang matuod nga Dyos hay Jehova. Gusto nana nga masayran ag gamiton naton ro anang ngaean agud mangin amigo naton imaw.
Review
-
Ano ro kinaiba ni Jehova sa ibang mga dyos nga ginasimba it mga tawo?
-
Ham-an dapat gamiton naton ro ngaean it Dyos?
-
Ano ro nagapakita nga gusto ni Jehova nga mangin amigo ka?
SAYURA
Sayura ro limang makapakumbinsi nga ebidensya nga may Dyos.
Tun-i kon ham-an rasonable nga magpati nga ro Dyos owa it gin-umpisahan ag owa it katapusan.
“Sin-o ro Nag-obra sa Dyos?” (The Watchtower, August 1, 2014)
Sayura kon ham-an dapat gamiton naton ro ngaean it Dyos maskin owa kita kasayod kon paano ra ginamitlang kato.
Importante gid baea kon paano naton tawgon ro Dyos? Tan-awa kon ham-an makahambae kita nga sambato eang ro personal nga ngaean it Dyos.
a Sa dugang nga impormasyon parti sa kahueogan ku ngaean it Dyos ag kon ham-an ginpaea ra sa pila nga translation it Biblia, tan-awa ro Apendise A4 sa Bag-ong Kalibutan nga Badbad sang Balaan nga Kasulatan.
