LEKSYON 06
Paano Nag-umpisa ro Kabuhi?
Naghambae ro Biblia parti sa Dyos: “Gintuga mo ro tanan nga mga butang.” (Pahayag 4:11, NWT) Nagapati ka baea karon? Para sa iba owa it manogtuga. Kon matuod ron, basta eang kita nga nagtuhaw. Pero kon gintuga ni Jehova nga Dyos ro kabuhi, may katuyuan gid ra, indi baea? a Sayura ro mga nasueat sa Biblia parti sa ginhalinan it kabuhi ag kon ham-an rasonable nga magpati kara.
1. Paano nag-umpisa ro uniberso?
Naghambae ro Biblia: “Ku umpisa gintuga it Dyos ro eangit ag ro eugta.” (Genesis 1:1) Eaban nga mga scientist hay nagapati nga may gin-umpisahan ro uniberso. Paano ra gintuga it Dyos? Gingamit na ro anang “aktibo nga pwersa”—anang baeaan nga espiritu—agud obrahon ro uniberso, kaibahan ro mga galaksiya, mga bituon, ag mga planeta.—Genesis 1:2.
2. Ham-an gintuga it Dyos ro eugta?
Si Jehova hay “owa nagtuga [it eugta] sa owa it pueos, kundi ginporma ra agud estaran.” (Isaias 45:18) Gin-obra na ro atong planeta agud mangin komportable ag permanente nga ieistaran it mga tawo. (Basaha ro Isaias 40:28; 42:5.) Ginapakita it syensya nga espesyal gid ro eugta. Raya eamang ro planeta nga makatao it tanan nga kinahang-eanon it tawo para mabuhi.
3. Ano ro kinaiba it tawo sa mga sapat?
Pagkatapos obrahon ni Jehova ro eugta, gintuga na ro mga nagakabuhi kara. Una, ginpuno na ro eugta it mga tanum ag mga sapat. Rayon, “gintuga it Dyos ro tawo base sa anang larawan.” (Basaha ro Genesis 1:27.) Ham-an iba gid ro mga tawo? Tungod gintuga kita sa larawan it Dyos, mapakita naton ro anang mga ugali, pareho it gugma ag hustisya. Gintuga man nana kita nga may abilidad nga makatuon it mga linggwahe, mag-apresyar it manami nga mga bagay, ag mag-enjoy sa musika. Ag buko’t kapareho sa mga sapat, masimba naton ro atong Manogtuga.
TUN-I PA GID
Tun-i ro mga ebidensya nga may nagdisenyo it kabuhi ag ro nakasueat sa Biblia parti sa pagtuga hay mapatihan gid. Sayura kon ano ro ginaturo katon it mga ugali ku tawo parti sa Dyos.
4. May nagdisenyo it kabuhi
Ginadayaw ro mga tawo tungod sa mga disenyo nga ginkopya nanda sa mga tinuga. Sin-o ro dapat dayawon sa orihinal nga mga disenyo? Tan-awa ro VIDEO, ag talakaya rayon rayang pangutana.
-
Ano nga mga disenyo ro ginkopya it tawo halin sa mga tinuga?
Ro kada baeay hay may nagdisenyo ag nagpatindog. Pero sin-o ro nagdisenyo ag nag-obra sa tanan nga mga bagay? Basaha ro Hebreo 3:4, ag talakaya rayon rayang mga pangutana:
-
Ano ro mga disenyo sa palibot nga nanamian mo?
-
Tama baea nga magpati nga may nagdisenyo sa uniberso ag tanan nga una kara? Ham-an?
Sayod mo baea?
Makita mo ro mga artikulo ag mga video parti sa rayang topiko sa jw.org sa serye nga “Gindesinyo Bala Ini?” ag “Pagpati Parte sa Ginhalinan sang Kabuhi.”
“Matuod gid nga ro kada baeay may nagpatindog nga tawo—ag ro Dyos imaw ro naghimo it tanan nga mga butang”
5. Mapatihan ro ginahambae it Biblia parti sa pagtuga
Sa Genesis kapitulo 1, ginasugid it Biblia kon paano gin-obra ro eugta ag ro kabuhi iya. Masaligan mo baea ra, o ueoistorya malang ra? Tan-awa ro VIDEO, ag talakaya rayon rayang mga pangutana.
-
Ginaturo baea it Biblia nga ro eugta ag ro mga kabuhi kara hay gintuga sa sueod it an-um nga adlaw nga may tig-24 nga oras?
-
Kon kimo, mapatihan baea ro ginahambae it Biblia parti sa pagtuga? Ham-an ruyon ing sabat?
Basaha ro Genesis 1:1, ag talakaya rayon rayang pangutana:
-
Nagahambae ro mga scientist nga may gin-umpisahan ro uniberso. Ano ro pagkapareho kara sa bag-o mo eang nabasa nga teksto?
Ginaisip it ibang tawo kon naggamit baea ro Dyos it ebulosyon sa pagtuga it kabuhi. Basaha ro Genesis 1:21, 25, 27, ag talakaya rayon rayang mga pangutana:
-
Ginaturo baea it Biblia nga ro Dyos hay nag-obra it sangka klase it kabuhi, rayon nag-evolve ag nangin mga isda, sapat ag tawo? O gintuga na ro tanan nga “klase” it kabuhi? b
6. Ro mga tawo hay espesyal nga tinuga it Dyos
Bukon kita it pareho sa mga sapat nga gintuga ni Jehova. Basaha ro Genesis 1:26, ag talakaya rayon rayang pangutana:
-
Tungod gin-obra kita sa larawan it Dyos, ag mapakita naton ro gugma ag kaeuoy, ano ro ginaturo kara katon parti sa anang ugali?
KON MAY MAGHAMBAE: “Ueoistorya malang ro ginahambae it Biblia parti sa pagtuga.”
-
Ano kon kimo? Ham-an?
SUMARYO
Gintuga ni Jehova ro uniberso ag tanan nga kabuhi.
Review
-
Ano ro ginaturo it Biblia sa kon paano nag-umpisa ro uniberso?
-
Ginpabay-an baea it Dyos nga mag-evolve ro sangka klase it kabuhi agud mangin iba-iba nga klase it kabuhi, o gintuga na ra tanan?
-
Ham-an espesyal ro mga tawo?
SAYURA
Sayura ro mga disenyo nga makita sa mga tinuga.
“Ano ang Ginatudlo sang Kinaugali?” (Magmata!, Septiembre 2006)
Tan-awa kon paano ipaathag it tatay sa anang unga ro nakasueat sa Biblia parti sa pagtuga.
Tun-i kon baea nagasinanto ro ebulosyon sa Biblia.
“Naggamit Baea ro Dyos it Ebulosyon sa Pagtuga it Iba-ibang Klase it Kabuhi?” (Artikulo sa website)
Sayura kon ano ro ginapakita it mga fossil record o mga scientific experiment parti sa ginhalinan it kabuhi.
a Talakayon sa Leksyon 25 ro katuyuan it Dyos para sa mga tawo.
b Sa Biblia, ro “klase” hay nagatukoy sa maeagko nga grupo it buhi nga mga tinuga.
