LEKSYON 07

Ano nga Klasi it Dyos si Jehova?

I-PLAY

Ano ro maisip mo kon ginasambit si Jehova nga Dyos? Nagadayaw ka baea kana pero matsa kaeayo-eayo imaw, pareho it mga bituon sa eangit? O ginaimadyin mo baea imaw nga gamhanan pero owa it baeatyagon, pareho it mabaskog nga bagyo? Ano gid nga klasi it Dyos si Jehova? Paagi sa anang Bisaea, ro Biblia, ginapakita ni Jehova ro anang mga ugali, ag interesado gid imaw kimo.

1. Ham-an indi naton makita ro Dyos?

“Ro Dyos Espiritu.” (Juan 4:24) Si Jehova hay owa it pisikal nga eawas pareho katon. Espiritu imaw nga nagaestar sa eangit, ro sangka lugar nga indi naton makita.

2. Ano ro pila sa mga ugali ni Jehova?

Maskin indi makita si Jehova, matuod imaw nga Persona nga may mga ugali nga nanamian it mga nakakilaea kana. Naghambae ro Biblia: “Si Jehova mapinalanggaon sa katarungan, ag indi nana pag-aywanan ro mga mainunongon kana.” (Salmo 37:28) Imaw man hay “maeueo [o, mapinalanggaon] ag maeueoy-on,” eabi eon gid sa mga tawo nga nagaantus. (Santiago 5:11) “Maeapit si Jehova sa mga tagipusuon nga nagaantus; ginaeuwas nana ro mga naeuyahan it buot.” (Salmo 34:18, footnote) Ag sayod mo baea nga naapektuhan si Jehova sa kon ano ro atong ginaobra? Nasubuan si Jehova kon nagaobra it maeain ro mga tawo. (Salmo 78:40, 41) Pero nasadyahan imaw kon nagaobra sanda it mayad.—Basaha ro Hulubaton 27:11.

3. Paano ginpakita ni Jehova nga palangga nana kita?

Ro panguna nga ugali ni Jehova hay ro gugma. Ro matuod, “ro Dyos gugma.” (1 Juan 4:8) Ginpakita ni Jehova ro anang pagpalangga bukon eang sa Biblia kundi paagi man sa anang gin-obra. (Basaha ro Binuhatan 14:17.) Halimbawa, kon paano nana kita gin-obra. Makakita kita it manami nga mga kulay, makabati it manami nga kanta, ag makalasa it manami nga pagkaon. Gusto nana nga mag-enjoy kita sa atong kabuhi.

TUN-I PA GID

Sayura kon ano ro gingamit ni Jehova sa pag-obra it manami nga mga bagay. Ag tan-awa kon paano nana ginpakita ro anang manami nga mga ugali.

4. Baeaan nga espiritu—ro aktibo nga pwersa it Dyos

Kapareho nga ginagamit naton ro atong alima sa pag-obra, ginagamit man ni Jehova ro anang baeaan nga espiritu. Ginahambae it Biblia nga ro anang baeaan nga espiritu hay buko’t persona, kundi aktibo raya nga pwersa it Dyos nga gingamit nana sa pag-obra it mga bagay. Basaha ro Lucas 11:13 ag Binuhatan 2:17, ag talakaya rayon rayang mga pangutana:

‘Ginabubo’ it Dyos ro anang baeaan nga espiritu sa mga nagapangayo kara. Kon kimo, persona baea ro baeaan nga espiritu, o aktibo nga pwersa it Dyos? Ham-an ruyon ing sabat?

Ginagamit ni Jehova ro anang baeaan nga espiritu sa pag-obra it manami nga mga bagay. Basaha ro Salmo 33:6 ag 2 Pedro 1:20, 21, ag talakaya rayon rayang pangutana:

Sa ano nga paagi gingamit ni Jehova ro anang baeaan nga espiritu?

5. May manami nga mga ugali si Jehova

Matutom nga alagad it Dyos si Moises, pero gusto na pa gid masayran ro parti sa anang Manogtuga. Ginhambae ni Moises sa Dyos: “Ipasayod mo kakon ro imong mga daean, agud makilaea ko ikaw.” (Exodo 33:13) Ngani, ginhambae ni Jehova kay Moises ro Anang mga ugali. Basaha ro Exodo 34:4-6, ag talakaya rayon rayang mga pangutana:

Ano ro mga ugali ni Jehova nga ginhambae na kay Moises?
Ano ing pinakananamian sa mga ugali ni Jehova?

6. Nagakabaeaka si Jehova sa mga tawo

Ro katawhan it Dyos kato, ro mga Hebreo, hay gin-ulipon sa Ehipto. Ano ro ginbatyag ni Jehova sa andang pag-antus? Pamatii ro AUDIO ag sundi, o basaha ro Exodo 3:1-10. Ag talakaya rayon rayang mga pangutana.

AUDIO: Si Jehova Nakahibalo sang Ila Pag-antos (2:45)

Ano ro ginasugid it teksto kimo sa kon ano ro ginabatyag ni Jehova sa pag-antus it mga tawo?—Tan-awa ro bersikulo 7 ag 8.
Kon kimo, gusto gid baea ni Jehova nga buligan ro mga tawo ag kaya na gid baea nga obrahon ra? Ham-an ruyon ing sabat?