LEKSYON 09

Magpaeapit sa Dyos Paagi sa Pangamuyo

I-PLAY

Nabatyagan mo baea nga kinahang-ean mo it giya sa ing kabuhi? May importante ka baea nga mga pangutana nga gusto mo masabat? Kinahang-ean mo baea it paumpaw o kasiguraduhan? Gusto mo baea nga mangin maeapit kay Jehova? Makabulig kimo ro pangamuyo. Pero paano dapat magpangamuyo? Ginapamatian baea it Dyos ro tanan nga pangamuyo? Ano ing dapat obrahon agud pamatian nana ro imong mga pangamuyo? Tan-awon naton.

1. Kanyo kita dapat magpangamuyo, ag ano ro pwede natong ipangamuyo?

Ginturo ni Jesus nga dapat magpangamuyo eang kita sa atong Ama sa eangit. Nagpangamuyo imaw kay Jehova. Naghambae imaw: “Ngani dapat kamo magpangamuyo it pareho kara: ‘Ama namon nga una sa eangit. . .’” (Mateo 6:9) Kon nagapangamuyo kita kay Jehova, mangin mas maeapit kita kana.

Pwede natong ipangamuyo maskin alin. Pero, agud sabton it Dyos ro atong mga pangamuyo, kinahang-ean nga base ra sa anang kabubot-on. “Nagapamati [ro Dyos] katon, kon magpangayo kita it bisan ano nga butang nga suno sa kabubot-on it Dyos.” (1 Juan 5:14) Nagtao it mga halimbawa si Jesus kon ano ro pwede natong ipangamuyo. (Basaha ro Mateo 6:9-13.) Pwede naton ipangamuyo ro atong mga problema, pero dapat man naton pasaeamatan ro Dyos sa tanan nga gintao nana katon. Ag ipangamuyo man naton ro iba.

2. Paano kita dapat magpangamuyo?

Ginapalig-on kita it Biblia nga “magpaeapit kita sa Dyos, nga may sinsero nga tagipusoon.” (Hebreo 10:22) Ngani dapat halin sa tagipusuon ro atong mga pangamuyo. Makapangamuyo kita it mabaskog o mahinay maskin ano nga posisyon basta may pagtahod sa Dyos. Makapangamuyo man kita maskin ano nga oras ag maskin siin.

3. Paano ginasabat it Dyos ro atong mga pangamuyo?

Abu imaw nga paagi. Gintao ni Jehova ro anang Bisaea, ro Biblia, para makita naton ro mga sabat sa atong mga pangutana. Ro pagbasa kara hay “nagapaaeam sa tawo nga kueang it kaaeam.” (Salmo 19:7; basaha ro Santiago 1:5.) Mataw-an na kita it malinong nga isip kon nagaatubang it mga problema. Ag pwede na pahueagon ro anang mga katawhan para buligan kita.

TUN-I PA GID

Tun-i kon paano ka makapangamuyo sa paagi nga nailaan it Dyos, ag sayura kon paano ka makabenepisyo sa pagpangamuyo.

4. Mga pangamuyo nga ginapamatian it Dyos

Ano nga klasi it pangamuyo ro ginapamatian it Dyos? Tan-awa ro VIDEO.

VIDEO: Ginapamatian Baea it Dyos ro Tanan nga Pangamuyo?—Porsyon sa Video (2:42)

Gusto ni Jehova nga magpangamuyo kita kana. Basaha ro Salmo 65:2, ag talakaya rayon rayang mga pangutana:

Kon kimo, gusto baea ku “Manogpamati it pangamuyo” nga magpangamuyo ka kana? Ham-an ruyon ing sabat?

Dapat kita magkabuhi base sa gusto it Dyos agud pamatian nana ro atong mga pangamuyo. Basaha ro Miqueas 3:4 ag 1 Pedro 3:12, ag talakaya rayon rayang pangutana:

Paano kita makasigurado nga ginapamatian ni Jehova ro atong mga pangamuyo?

Kon may inaway, ginapangamuyo it kada grupo nga magdaug sanda. Sabton baea it Dyos rayang klasi it pangamuyo?

5. Dapat halin sa tagipusuon ro atong mga pangamuyo

Gintur-an ro iba nga pwede nanda kabisaduhon o pauman-umanon ro andang mga pangamuyo. Pero ruyon gid man baea ro gusto it Dyos? Basaha ro Mateo 6:7, ag talakaya rayon rayang pangutana:

Paano mo malikawan nga pauman-uman ro imong pangamuyo?

Kada adlaw, isipa ro sangka grasya o pagpakamayad nga nabaton mo ag pasaeamati rayon si Jehova. Obraha raya adlaw-adlaw sa sueod it sang domingo, agud iba-iba rayon ro imong mahambae sa ing pangamuyo.

Gusto it tatay nga hambaeon it anang unga kon ano gid ro anang ginabatyag. Gusto man ni Jehova nga ipangamuyo naton kana ro atong ginabatyag

6. Espesyal nga regalo halin sa Dyos ro pangamuyo

Paano makabulig ro pangamuyo kon una kita sa malisud nga sitwasyon? Tan-awa ro VIDEO.

VIDEO: Mabuligan Ka it Pangamuyo Agud Makaya ro mga Problema (1:32)

Nagpromisa ro Biblia nga mabuligan kita it pangamuyo agud mangin malinong ro atong isip. Basaha ro Filipos 4:6, 7, ag talakaya rayon rayang mga pangutana:

Maskin indi pirme maduea it pangamuyo ro atong mga problema, paano ra makabulig katon?
Ano ro mga gusto mong ipangamuyo?

Sayod mo baea?

Ro “amen” hay nagakahueogan nga “kabay pa.” Halin pa ku panahon it Biblia, ro “amen” hay ginasambit sa katapusan it pangamuyo.—1 Cronica 16:36.

7. Magpangamuyo pirme

Kon amat tungod sa kasakuon, nalipatan eon naton magpangamuyo. Mauno ka importante kay Jesus ro pagpangamuyo? Basaha ro Mateo 14:23 ag Marcos 1:35, ag talakaya rayon rayang mga pangutana: