LEKSYON 11

Kon Paano Ka Makabenepisyo it Mayad sa Pagbasa it Biblia

I-PLAY

May ginaplano ka baea nga mabahoe nga proyekto pero owa ka kasayod kon paano ra umpisahan? Agud indi ka malisdan, pwede mo tunga-tungaon ro dapat mong obrahon. Makaron man sa pagbasa it Biblia. Basi mangutana ka, ‘Paano ko ra umpisahan?’ Sa rayang leksyon, matun-an mo ro pwede mong obrahon nga makabulig kimo nga ma-enjoy ro pagbasa ag pagtuon it Biblia.

1. Ham-an dapat naton basahon it regular ro Biblia?

Ro tawo nga regular nga nagabasa it Biblia, o “ku himpit nga kasugoan” ni Jehova hay mangin masadya ag madinaeag-on. (Basaha ro Santiago 1:25.) Pwede mo umpisahan ro pagbasa maskin pilang minuto eang kada adlaw. Habang mas nangin pamilyar ka sa Bisaea it Dyos, mas ma-enjoy mo ro pagbasa it Biblia.

2. Ano ro makabulig katon agud makabenepisyo sa pagbasa it Biblia?

Agud makabenepisyo it mayad sa pagbasa it Biblia, kinahang-ean naton magpundo ag mag-isip sa atong ginabasa. Dapat naton ra basahon ag “pamaeandungan.” (Josue 1:8, footnote) Habang nagabasa, pangutan-a ing sarili: ‘Ano ro ginasugid kara kakon parti kay Jehova nga Dyos? Paano ko ra magamit sa ang kabuhi? Paano ko magamit rayang teksto agud buligan ro iba?’

3. Ano ro pwede mong obrahon agud makabasa it Biblia?

Nalisdan ka baea magtao it oras agud makabasa it Biblia? Tanan man kita. Tinguhai nga ‘himuslan ro tanan nga tyempo.’ (Efeso 5:16) Maobra mo raya kon magtao ka it oras sa pagbasa it Biblia kada adlaw. Ro iba nagabasa it Biblia pagbugtaw sa agahon. Ro iba mat-a hay kon truadlaw. Ro iba pa gid hay nagabasa it Biblia kon gabii bago sanda magtueog. Kon kimo, ano ro pinakamanami nga oras sa pagbasa?

TUN-I PA GID

Sayura kon paano ka mag-enjoy sa pagbasa it Biblia. Tun-i kon paano ka makahanda agud makabenepisyo it mayad sa pagtuon it Biblia.

Ma-enjoy mo nga basahon ro Biblia, kon paanong ma-enjoy mo eon ro mga pagkaon nga owa mo dati nailaan

4. Mag-enjoy sa pagbasa it Biblia

Malisud umpisahan ro pagbasa it Biblia. Pero, ma-enjoy mo ro pagbasa kara kapareho it pag-enjoy mo sa pagkaon nga bag-o mo paeang nasamitan. Basaha ro 1 Pedro 2:2, ag talakaya rayon rayang pangutana:

Kon adlaw-adlaw mo nga basahon ro Biblia, ma-enjoy mo gid baea ra ag gustuhon mo pa gid nga basahon ra?

Tan-awa ro VIDEO agud makita mo kon paano naga-enjoy ro iba sa pagbasa it Biblia. Ag talakaya rayon rayang mga pangutana.

VIDEO: Mga Bataon nga Nanamian Magbasa it Biblia (5:33)

Sa video, ham-an nalisdan ro mga bataon nga basahon ro Biblia?
Ano ro nakabulig kanda agud regular nga mabasa ro Biblia?
Ano ro gin-obra nanda agud ma-enjoy ro pagbasa it Biblia?

Mga tip sa pagbasa it Biblia:

Magpili it masaligan nga translation nga maintindihan mo. Gamita ro Bag-ong Kalibutan nga Badbad kon available ra sa inyong linggwahe.
Unaha it basa ro mga parte nga magustuhan mo. Para may ideya ka, tan-awa ro chart nga “Umpisahi ro Pagbasa it Biblia.”
Tandai kon ano eon ro ing habasa. Gamita ro chart nga “Ro Akong Habasa Eon sa Biblia” sa rayang libro.
Gamita ro JW Library^®app. Gamit ro cellphone o gadyet, pwede mo mabasa ag mapamatian ro Biblia maskin siin ka.
Gamita ro mga apendise sa Bag-ong Kalibutan nga Badbad. Makabulig kimo ro mga mapa, chart, ag glossary para ma-enjoy mo ro pagbasa.

5. Handai ro inyong pagtuon sa Biblia

Basaha ro Salmo 119:34, ag talakaya rayon rayang pangutana:

Ham-an manami nga magpangamuyo ka anay bago magbasa it Biblia o maghanda sa inyong pagtuon?

Paano ka makabenepisyo it mayad sa inyong pagtuon? Habang gahanda ka nga tun-an rayang leksyon, testingi rayang mga paagi:

Basaha ro unang parte it rayang leksyon.
Basaha ro mga teksto, ag isipa kon paano ra naangot sa topiko.
I-highlight ro sabat sa mga pangutana; makabulig ra kimo kon ginatalakay eon ninyo ro leksyon.

Sayod mo baea?

Nagagamit it iba-ibang translation it Biblia ro mga Saksi ni Jehova. Pero, mas gusto namong gamiton ro Bag-ong Kalibutan nga Badbad sang Balaan nga Kasulatan tungod insakto ra, klaro, ag ginagamit ro ngaean it Dyos.—Tan-awa ro Artikulo sa website “May Sarili Baea nga Biblia ro mga Saksi ni Jehova?”

KON MAY MAGHAMBAE: “Owa ako’t oras magtuon it Biblia. Masako ako, abu akong obra.”

Ano ing isabat?

SUMARYO

Agud makabenepisyo ka it mayad sa pagtuon it Biblia, magtao it oras sa pagbasa kara. Magpangamuyo agud maintindihan mo ra, ag handai ro inyong pagtuon.