LEKSYON 12

Paano Mo Mapadayon ro Imong Pagtuon sa Biblia?

I-PLAY

Ro pagtuon sa Biblia hay makaaeayaw gid. Pero, bukon ra pirme it maeumo obrahon. Kon amat, basi nagaisip ka kon kaya mo baea padayunon ing pagtuon sa Biblia. Ham-an sulit nga magpadayon? Ano ro makabulig kimo nga magpadayon maskin may mga kalisdanan?

1. Ham-an importante ro pagtuon it Biblia?

“Ro bisaea it Dyos buhi ag gamhanan.” (Hebreo 4:12) Importante ro Biblia tungod ginapakita kara ro kaisipan ag baeatyagon it Dyos para kimo. Owa eang ra nagadugang it imong nasayran kundi nagatao man ra it matuod nga kaaeam ag pag-eaum. Ag ro pinakaimportante, nagabulig ro Biblia nga mangin amigo ka ni Jehova. Kon tun-an mo ro Biblia, mabuligan ka kara nga mangin mas mayad ro imong kabuhi.

2. Ham-an importante ro kamatuoran sa Biblia?

Ro mga kamatuoran sa Biblia hay pareho sa maeahaeon nga mga manggad. Ngani, ginapalig-on kita it Biblia nga ‘bak-eon ro kamatuoran ag indi ra pag-ibaligya.’ (Hulubaton 23:23) Kon sayod naton nga importante ro kamatuoran sa Biblia, makapadayon kita sa pagtuon maskin pa may mga kalisdanan.—Basaha ro Hulubaton 2:4, 5.

3. Paano ka mabuligan ni Jehova nga makapadayon sa pagtuon?

Bilang imong Manogtuga ag Amigo, gusto ni Jehova nga buligan ka nga magtuon parti kana. Buligan ka nana para ‘magustohan ag masarangan mo ro pagtuman.’ (Basaha ro Filipos 2:13.) Ngani, kon nalisdan ka nga magtuon o iaplikar ro imong hatun-an, mabuligan ka nana. Ag kon may mga problema o pagkontra sa imong pagtuon, taw-an ka nana it kusog agud makaya ra. Magpangamuyo it regular kay Jehova nga buligan ka nga mapadayon ro imong pagtuon sa Biblia.—1 Tesalonica 5:17.

TUN-I PA GID

Sayura kon paano ka makapadayon sa pagtuon it Biblia maskin pa masako ka o ginakontra ka it iba. Ag tun-i kon paano ka mabuligan ni Jehova nga mapadayon ing pagtuon.

4. Unaha ro pagtuon sa Biblia

Kon amat tungod sa kasakuon, owa eon kita it oras sa pagtuon it Biblia. Ano ro makabulig kimo? Basaha ro Filipos 1:10, ag talakaya rayon rayang mga pangutana:

Kon kimo, ano ro mas importante nga mga bagay sa kabuhi?
Paano mo unahon ro imong pagtuon sa Biblia?

Kon unahon mo it butang ro baeas sa balde, indi eon mag-igo ro mga bato
Pero kon unahon mo it butang ro mga bato, maigo pa ro baeas. Kon unahon mo man ro mas importanteng mga bagay sa imong kabuhi, abu ro ing matapos ag may oras ka pa sa ibang bagay

Matao it pagtuon sa Biblia ro atong espiritwal nga kinahang-eanon—ro atong kinahang-eanon nga makilaea ag masimba ro Dyos. Basaha ro Mateo 5:3, ag talakaya rayon rayang pangutana:

Paano kita makabenepisyo kon unahon naton ro pagtuon sa Biblia?

5. Magpadayon maskin may nagakontra

Kon amat, pwede ka paeuyahon it iba sa imong pagtuon sa Biblia. Tan-awa ro halimbawa ni Francesco. Tan-awa ro VIDEO, ag talakaya rayon rayang mga pangutana.

VIDEO: Ginpakamayad Tungod Nagpadayon (5:22)

Sa video, ano ro reaksyon it mga amigo ag nanay ni Francesco kat ginsugid na ro anang hatun-an?
Ano nga mga pagpakamayad ro anang nabaton tungod nagpadayon imaw?

Basaha ro 2 Timoteo 2:24, 25, ag talakaya rayon rayang mga pangutana:

Ano ro reaksyon it imong pamilya ag mga amigo kat hasayran nanda nga nagatuon ka?
Base sa rayang teksto, ano ing isabat kon owa naila ro iba nga nagatuon ka it Biblia? Ham-an?

6. Magsalig sa bulig ni Jehova

Habang nagaeapit kita kay Jehova, mas gustuhon naton nga dayawon imaw. Pero, basi nalisdan ka mag-obra it mga pagbag-o para masunod si Jehova. Kon makaruyon ing ginabatyag, indi magpundo. Buligan ka ni Jehova. Tan-awa ro VIDEO, ag talakaya rayon rayang mga pangutana.

VIDEO: Buligan Kita ni Jehova nga Mag-obra it mga Pagbag-o (3:56)

Sa video, ano nga mga pagbag-o ro gin-obra ni Jim agud mapasadya si Jehova?
Ano ing nailaan sa anang halimbawa?

Basaha ro Hebreo 11:6, ag talakaya rayon rayang mga pangutana:

Ano ro obrahon ni Jehova sa mga “nagausoy kana”—ratong mga nagatinguha nga makilaea ag mapasadya imaw?
Ano ro nabatyagan ni Jehova kon makita na nga nagatinguha ka sa pagtuon it Biblia?

KON MAY MAGPANGUTANA: “Ham-an nagatuon ka it Biblia?”

Ano ing isabat?

SUMARYO

Maskin malisud kon amat, buligan ka it pagtuon sa Biblia nga mangin masadya sa owa’t katapusan. Padayon nga magsalig kay Jehova, ag premyohan ka nana.