LEKSYON 14

Paano Batunon it Dyos ro Atong Pagsimba?

I-PLAY

Ku nagtaliwan nga leksyon, natun-an naton nga buko’t tanan nga relihiyon hay ginabaton it Dyos. Pero, pwede naton masimba ro atong Manogtuga sa paagi nga nailaan na. Ano nga klasi it pagsimba o relihiyon ro ginabaton nana? (Santiago 1:27) Tun-i kon ano ro ginaturo it Biblia.

1. Sa ano dapat nabase ro atong pagsimba?

Nabase dapat ro atong pagsimba sa Biblia. Ginhambae ni Jesus sa Dyos: “Ro imong bisaea kamatuoran.” (Juan 17:17) Sayod it mga relihiyon ro kamatuoran nga una sa Bisaea it Dyos, ro Biblia. Ginbayluhan nanda ra it mga pagturo ag tradisyon ku mga tawo. Pero owa naila si Jehova sa mga tawo nga ‘nagasikway ku ginapatuman it Dyos.’ (Basaha ro Marcos 7:9.) Sa kabaliskaran, mapasadya naton imaw kon nabase sa Biblia ro atong pagsimba ag kon sundon naton ro mga sugo kara.

2. Paano naton dapat simbahon si Jehova?

Dapat eang naton simbahon si Jehova tungod imaw ro atong Manogtuga. (Pahayag 4:11, NWT.) Dapat imaw eang ro atong palanggaon ag simbahon. Ag indi kita maggamit it maskin ano nga estatwa, imahen, o santos sa pagsimba kana.—Basaha ro Isaias 42:8.

Dapat ro atong pagsimba hay “baeaan ag nagapahamuot” kay Jehova. (Roma 12:1) Dapat natong sundon ro anang mga sugo. Halimbawa, ratong mga nagapalangga kay Jehova hay nagatuman sa anang mga sugo sa pag-asawa. Ag owa sanda it bisyo pareho it pagpanigarilyo, pagdroga o pagpahilong. a

3. Ham-an dapat naton simbahon si Jehova kaibahan it mga nagasimba kana?

Sa mga miting kada domingo, ‘madayaw naton si Jehova sa kongregasyon.’ (Salmo 111:1, 2) Maobra naton ra paagi sa pagkanta para dayawon ro Dyos. (Basaha ro Salmo 104:33.) Gusto ni Jehova nga mag-attend kita sa mga miting tungod palangga nana kita ag sayod na nga makabulig ra agud mangin masadya kita sa owa’t katapusan. Sa pag-attend it miting mapalig-on kita ag mapalig-on man naton ro iba.

TUN-I PA GID

Sayura kon ham-an owa naila si Jehova nga maggamit kita it mga imahen sa pagsimba kana. Tun-i ro mga paagi nga madayaw naton ro Dyos.

4. Indi kita dapat maggamit it imahen sa pagsimba

Paano naton nasayran nga owa ginabaton it Dyos ro paggamit kara? Tan-awa ro VIDEO, ag talakaya rayon rayang pangutana.

VIDEO: Ginabaton Baea it Dyos ro Paggamit it mga Imahen sa Pagsimba? (3:26)

Ano ro natabo sa katawhan it Dyos ku panahon it Biblia kat naggamit sanda it estatwa sa pagsimba kana?

Ginaisip it iba nga mangin mas maeapit sanda sa Dyos kon maggamit sanda it mga imahen sa pagsimba. Pero ro matuod, mas nagaeayo lang ngani imaw kanda. Basaha ro Exodo 20:4-6 ag Salmo 106:35, 36, ag talakaya rayon rayang mga pangutana:

Ano ro mga bagay o mga imahen nga nakita mo nga ginagamit it mga tawo sa andang pagsimba?
Ano ro ginabatyag ni Jehova sa paggamit it mga imahen?
Ano ing pagtan-aw sa paggamit it mga imahen?

5. Kon si Jehova eang ro atong ginasimba mangin hilway kita sa saea nga mga pagturo

Mangin hilway kita sa saea nga mga pagturo kon simbahon naton si Jehova sa tama nga paagi. Tan-awa ro VIDEO.

VIDEO: Ginhilway it Kamatuoran (5:16)

Basaha ro Salmo 91:14, ag talakaya rayon rayang pangutana:

Ano ro ginpromisa ni Jehova katon kon imaw eang ro atong palanggaon ag simbahon?

6. Ginasimba naton ro Dyos sa mga miting sa kongregasyon

Madayaw naton si Jehova ag mapalig-on ro kada isaea paagi sa pagkanta ag pagkomento sa mga miting sa kongregasyon. Basaha ro Salmo 22:22, ag talakaya rayon rayang mga pangutana:

Nasadyahan ka baea magpamati it mga komento sa miting?
Gusto mo man baea maghanda agud makakomento?

7. Nasadyahan si Jehova kon ginasugid naton sa iba ro atong natun-an

Abu nga mga paagi agud masugid naton sa iba ro kamatuoran sa Biblia. Basaha ro Salmo 9:1 ag 34:1, ag talakaya rayon rayang pangutana:

Ano ing hatun-an sa Biblia nga gusto mo isugid sa iba?

KON MAY MAGHAMBAE: “Bukon man it importante kon paano naton ginasimba ro Dyos, basta nagatuo ka eang kana.”

Ano kon kimo?

SUMARYO

Mapasadya naton ro atong Manogtuga kon imaw eang ro atong simbahon, dayawon imaw sa mga miting sa kongregasyon, ag isugid sa iba kon ano ro atong natun-an.