LEKSYON 16
Ano ro Gin-obra ni Jesus Kat iya Imaw sa Eugta?
Para sa abu nga tawo si Jesus hay sangka eapsag, maaeam nga propeta, o tawo nga madali lang mamatay. Pero makilaea pa gid naton imaw kon tun-an naton ro anang kabuhi kat iya imaw sa eugta. Sa rayang leksyon, matun-an naton ro pinakaimportante nga mga bagay nga gin-obra ni Jesus ag kon paano raya makabulig kimo.
1. Ano ro pinakaimportante nga gin-obra ni Jesus?
Ro pinakaimportante nga gin-obra ni Jesus hay ro ‘pagwali it mayad nga balita ku Ginharian it Dyos.’ (Basaha ro Lucas 4:43.) Ginwali nana ro mayad nga balita nga magatukod ro Dyos it ginharian o gubyerno, nga makasulbar sa tanan nga problema it mga tawo. a Rayang manami nga mensahe hay padayon nga ginsugid ni Jesus sa sueod it tatlong dag-on ag tunga.—Mateo 9:35.
2. Ham-an nag-obra si Jesus it mga milagro?
Ginhambae it Biblia nga abu ro “mga milagro ag makangawa-ngawa nga mga buhat ag mga tanda nga ginhimo it Dyos paagi [kay Jesus].” (Binuhatan 2:22) Paagi sa gahum it Dyos, nakontrol ni Jesus ro bagyo, nagpakaon imaw it linibo, nagpamayad it may sakit, ag nagbuhi it mga patay. (Mateo 8:23-27; 14:15-21; Marcos 6:56; Lucas 7:11-17) Ginpakita it mga milagro ni Jesus nga ginpadaea imaw it Dyos. Nagapakita man ra nga may gahum si Jehova sa pagduea it tanan nga problema.
3. Ano ro atong matun-an sa paagi it pagkabuhi ni Jesus?
Ginasunod pirme ni Jesus si Jehova. (Basaha ro Juan 8:29.) Maskin abung pagkontra, padayon nga ginsunod ni Jesus ro tanan nga sugo it anang Ama hasta sa anang kamatayon. Ginpamatud-an nana nga makaalagad ro mga tawo sa Dyos, maskin may mga kalisdanan. Si Jesus hay “nagbilin it sueondan, agud nga magsunod man kamo sa anang inagihan.”—1 Pedro 2:21.
TUN-I PA GID
Tun-i kon paano ginsugid ni Jesus ro mayad nga balita sa mga tawo ag kon paano imaw nag-obra it mga milagro.
4. Ginsugid ni Jesus ro mayad nga balita
Nagtikang si Jesus it ginatos nga kilometro sa tapu-tapuhon nga daean, agud isugid ro mayad nga balita sa mas abu nga tawo. Basaha ro Lucas 8:1, ag talakaya rayon rayang mga pangutana:
-
Nagwali eang baea si Jesus sa mga tawo nga nagpaeapit kana agud pamatian imaw?
-
Ano ro gin-obra ni Jesus agud mawalihan ro mga tawo?
Ginhula it Dyos nga iwali it Mesias ro mayad nga balita. Basaha ro Isaias 61:1, 2, ag talakaya rayon rayang mga pangutana:
-
Paano gintuman ni Jesus rayang hula?
-
Kon kimo, importante baea nga mabatian it mga tawo rayang mayad nga balita?
5. Nagturo si Jesus it importante nga mga leksyon
Owa eang nagwali si Jesus it mayad nga balita parti sa Ginharian it Dyos, kundi nagturo man imaw it praktikal nga mga leksyon. Tan-awa ro pila kara sa anang Sermon sa Bukid. Basaha ro Mateo 6:14, 34 ag 7:12, ag talakaya rayon rayang mga pangutana:
-
Ano ro mga eaygay ni Jesus nga mabasa naton sa rayang mga bersikulo?
-
Kon kimo, makabulig pa baea katon ra makaron?
6. Nag-obra si Jesus it mga milagro
Gintaw-an ni Jehova si Jesus it gahum agud makaobra it abu nga milagro. Tan-awa ro sangka halimbawa, basaha ro Marcos 5:25-34 o tan-awa ro VIDEO. Talakaya rayon rayang mga pangutana.
-
Sa video, ano ro ginapatihan it masakiton nga bayi?
-
Ano ro nailaan mo sa milagro nga gin-obra ni Jesus?
Basaha ro Juan 5:36, ag talakaya rayon rayang pangutana:
-
Ano ro ginpamatud-an it mga milagro nga gin-obra ni Jesus parti kana?
Sayod mo baea?
Kaeabanan sa mga nasayran naton parti kay Jesus hay mabasa sa ap-at nga libro it Biblia nga ginatawag mga Ebanghelyo—Mateo, Marcos, Lucas, ag Juan. Iba-ibang detalye ro ginsueat it mga manogsueat ku Ebanghelyo parti kay Jesus. Pero kon impunon raya tanan, masayran mo ro manami nga kabuhi ni Jesus.
-
MATEO
Imaw ro unang nagsueat it Ebanghelyo. Ginasugid kara ro abu nga ginturo ni Jesus eabi eon gid ro parti sa Ginharian it Dyos.
-
MARCOS
Imaw ro nagsueat it pinakamatag-od nga Ebanghelyo. Mabasa naton iya ro exciting o makahawat-hawat nga natabo sa kabuhi ni Jesus.
-
LUCAS
Ginsueat nana kon mauno ka importante kay Jesus ro pagpangamuyo ag kon paano na gintratar ro mga bayi.
-
JUAN
Ginasugid nana ro mga ugali ni Jesus ag kon paano imaw mag-istorya sa anang mga amigo ag sa iba.
KON MAY MAGHAMBAE: “Mayad malang nga tawo si Jesus.”
-
Ano ing isabat?
SUMARYO
Nagwali si Jesus parti sa Ginharian it Dyos, nag-obra it mga milagro, ag nagtuman pirme kay Jehova.
Review
-
Ano ro pinakaimportante nga gin-obra ni Jesus kat iya imaw sa eugta?
-
Ano ro ginpamatud-an it mga milagro nga gin-obra ni Jesus?
-
Ano ro praktikal nga mga leksyon nga ginturo ni Jesus?
SAYURA
Ano ro pirmeng ginaistorya ni Jesus?
“Ginharian sang Dios—Ngaa Importante Ini kay Jesus?” (Ang Lalantawan, Oktubre 1, 2014)
Tan-awa kon ham-an makasalig kita nga matuod gid nga natabo ro mga milagro ni Jesus.
“Mga Milagro ni Jesus—Ano ang Matun-an Mo?” (Ang Lalantawan, Hulyo 15, 2004)
Basaha kon paano nagbag-o ro kabuhi it eaki kat hatun-an na ro gin-obra nga pagsakripisyo ni Jesus.
“Sarili Ko Eang Ang Ginaisip” (The Watchtower, October 1, 2014)
Tan-awa ro pagkasunod-sunod it gin-obra ni Jesus sa anang ministeryo.
a Talakayon sa Leksyon 31-33 ro dugang nga mga detalye parti sa Ginharian it Dyos.
