LEKSYON 17

Ano ro mga Ugali ni Jesus?

I-PLAY

Habang ginatun-an naton ro mga ginhambae ag gin-obra ni Jesus kat iya imaw sa eugta, masayran naton ro anang mga ugali. Tungod karon, mas magaeapit pa gid kita kana ag sa anang Ama nga si Jehova. Ano ro manami nga mga ugali nana? Ag paano naton matuead si Jesus sa atong kabuhi?

1. Ano ro pareho nga mga ugali ni Jesus sa anang Ama?

Binilyon nga dag-on nga nakaibahan ni Jesus ro anang Ama sa eangit ag nakatuon gid imaw kana. Ngani, pareho ro andang ginaisip, ginabatyag, ag ginaobra. (Basaha ro Juan 5:19.) Hatuead it mayad ni Jesus ro ugali it anang Ama. Ngani, nakahambae imaw: “Ro nakakita kakon nakakita sa Ama.” (Juan 14:9) Habang ginatun-an mo ro personalidad ni Jesus, mas makilaea mo pa gid si Jehova. Halimbawa, ro pagpalangga ni Jesus sa mga tawo nagapakita nga palangga ka man ni Jehova.

2. Paano ginpakita ni Jesus nga palangga na si Jehova?

Naghambae si Jesus: “Kinahang-ean makasayod ro kalibutan nga ako nagahigugma sa Ama. Ngani ginahimo ko ro tanan nga anang ginasugo kakon.” (Juan 14:31) Kat iya imaw sa eugta, ginpakita ni Jesus ro ana nga pagpalangga sa anang Ama paagi sa pagtuman kana, maskin malisud ra obrahon. Gusto na pirme iistorya sa iba ro parti sa anang Ama ag gusto na sanda buligan nga mangin amigo Nana.—Juan 14:23.

3. Paano ginpakita ni Jesus nga palangga na ro mga tawo?

Ginhambae it Biblia nga “espesyal para [kay Jesus] ro mga unga it tawo.” (Hulubaton 8:31) Ginpakita na nga palangga na ro mga tawo ag nagsakripisyo imaw para buligan sanda. Ro pag-obra nana it milagro hay nagpakita it anang gahum ag mas eabi eon gid it anang kaeuoy. (Marcos 1:40-42) Mabuot imaw sa mga tawo ag owa imaw it pinaeabi. Nagtao it paumpaw ag pag-eaum ro anang mga ginturo sa mga tawo nga nagpamati kana. Handa si Jesus mag-antus ag mamatay tungod palangga na ro mga tawo. Pero mas palangga na ro mga nagasunod sa anang mga ginaturo.—Basaha ro Juan 15:13, 14.

TUN-I PA GID

Sayura ro mga ugali ni Jesus, ag kon paano naton matuead ro anang pagpalangga ag pagkamaatag.

4. Palangga ni Jesus ro anang Ama

Ginatur-an kita it halimbawa ni Jesus kon paano ipakita ro pagpalangga sa Dyos. Basaha ro Lucas 6:12 ag Juan 15:10; 17:26. Pagkatapos mabasa ro mga teksto, talakaya rayang pangutana:

Paano naton matuead si Jesus sa pagpakita it pagpalangga kay Jehova?

Palangga ni Jesus ro anang Ama sa eangit ag pirme na imaw ginaistorya sa pangamuyo

5. Nagakabaeaka si Jesus sa mga nagakinahang-ean

Gin-una ni Jesus ro kinahang-eanon it iba kaysa sa anang sarili. Maskin gaoy imaw, gingamit na ro anang panahon ag kusog agud buligan ro mga tawo. Basaha ro Marcos 6:30-44, ag talakaya rayon rayang mga pangutana:

Sa rayang teksto, paano ginpakita ni Jesus ro anang kabaeaka sa iba?—Tan-awa ro bersikulo 31, 34, 41, ag 42.
Ano ro nagpahueag kay Jesus nga buligan ro mga tawo?—Tan-awa ro bersikulo 34.
Tungod gintuead ni Jesus ro mga ugali ni Jehova, ano ro ginaturo kara katon parti kay Jehova?
Paano naton matuead si Jesus sa pagpakita it kabaeaka sa iba?

6. Maatag sa pagtao si Jesus

Maatag si Jesus maskin bukon imaw it manggaranon, ag gusto na man nga mangin maatag kita. Basaha ro Binuhatan 20:35, ag talakaya rayon rayang pangutana:

Base kay Jesus, paano kita mangin masadya?

Tan-awa ro VIDEO, ag talakaya rayon rayang pangutana.

VIDEO: “Mas Masadya ro Nagatao”—Porsyon sa Video (4:00)

Paano kita makatao sa iba maskin bukon kita it manggaranon?

Sayod mo baea?

Ginatur-an kita it Biblia nga magpangamuyo kay Jehova sa ngaean ni Jesus. (Basaha ro Juan 16:23, 24.) Kon magpangamuyo kita sa ruyong paagi, ginapakita naton ro pag-apresyar sa gin-obrang sakripisyo ni Jesus para mangin amigo kita ni Jehova.

KON MAY MAGHAMBAE: “Owa man nahakat ro Dyos sa atong pag-antus.”

Paano ginpamatud-an it mga gin-obra ni Jesus nga nagakabaeaka si Jehova katon?

SUMARYO

Palangga ni Jesus si Jehova, ag palangga na man ro mga tawo. Hatuead gid ni Jesus ro ugali it anang Ama. Ngani kon makilaea naton imaw, mas makilaea pa gid naton si Jehova.