“Ham-an?” Raya ro pirmeng ginapangutana it mga tawo kon may maeain nga nagakatabo. Pero masadya kita nga may klaro nga sabat ro Biblia sa rayang pangutana!

1. Paano gin-umpisahan ni Satanas ro kaeainan sa kalibutan?

Nagrebelde si Satanas nga Yawa sa Dyos. Gusto ni Satanas nga gamhan ro iba, ngani gin-impluwensyahan na ro unang mga tawo, sanday Adan ag Eba, nga magrebelde man kaibahan nana. Gin-obra ra ni Satanas kat nagpinuril imaw kay Eba. (Genesis 3:1-5) Ginpapati na si Eba nga may ginatago si Jehova nga mayad kana. Ginpaguwa na nga mangin mas masadya ro mga tawo kon indi sanda magtuman sa Dyos. Ginhambae ni Satanas ro unang kapurilan kat ginsugid na kay Eba nga indi imaw mamatay. Ngani, gintawag it Biblia nga “purilon [si Satanas] ag ama it tanan nga kapurilan.”—Juan 8:44.

2. Ano ro ginpili nga obrahon nanday Adan ag Eba?

Gintao gid ni Jehova ro tanan kanday Adan ag Eba. Ginhambae na kanda nga pwede nanda kan-on ro bunga it tanan nga puno sa hardin it Eden pwera eang sa sambato. (Genesis 2:15-17) Pero ginkaon gihapon nanda ro bunga it ratong puno. “Nag-ipo [si Eba] it bunga ag ginkaon ra.” Rayon, “nagkaon man” si Adan. (Genesis 3:6) Pareho sanda nga owa nagtuman sa Dyos. Tungod perpekto sanday Adan ag Eba, obrahon kunta nanda ro tama. Pero hungod sanda nga owa nagtuman, nagpakasaea, ag nagsikway sa pagdumaea it Dyos. Ngani nag-antus gid sanda.—Genesis 3:16-19.

3. Paano nakaapekto katon ro gin-obra nanday Adan ag Eba?

Kat nagkasaea sanday Adan ag Eba, nangin buko’t perpekto sanda, ag napasa raya sa tanan nanda nga mga inunga. Parti kay Adan, naghambae ro Biblia: “Ro saea nagsueod sa kalibutan paagi sa sambatong ka tawo, ag ro anang saea nagdaea it kamatayon. Tungod kara ro kamatayon nag-abot sa tanan nga mga tawo.”—Roma 5:12.

Abung rason kon ham-an nagaantus kita. Kon amat, nagaantus kita tungod sa saea natong desisyon o tungod sa saea nga desisyon it iba. Ag nagaantus man kita tungod una kita sa lugar nga may maeain nga natabo ag naapektuhan kita.—Basaha ro Manugwali 9:11.

 TUN-I PA GID

4. Ro rason it atong pag-antus

Nagapati ro abung tawo nga ro Dyos ro nagagahum sa bilog nga kalibutan. Matuod baea ron? Tan-awa ro VIDEO.

Basaha ro Santiago 1:13 ag 1 Juan 5:19, ag talakaya rayon rayang pangutana:

• Ro Dyos baea ro rason it pag-antus ag kaeainan?

5. Ano ro nangin resulta it paggahum ni Satanas?

1. Perpekto sanday Adan ag Eba ag nag-estar sa paraiso. Pero namati sanda kay Satanas ag nagrebelde kay Jehova

2.   Tungod sa andang pagrebelde, gakasaea, gaantus, ag gakamatay ro mga tawo

3. Dueaon ni Jehova ro saea, pag-antus, ag kamatayon. Mangin perpekto eon it uman ro mga tawo ag magaestar sa Paraiso

6. Nagakabaeaka si Jehova kon nagaantus kita

Nagakabaeaka gid baea ro Dyos kon nagaantus kita? Tan-awa kon ano ro ginsueat ni Haring David ag ni apostol Pedro. Basaha ro Salmo 31:7 ag 1 Pedro 5:7, ag talakaya rayon rayang pangutana:

• Ano ing nabatyagan kat nasayran mo nga nakikita ag nagakabaeaka si Jehova kon nagaantus kita?

 SUMARYO

Si Satanas nga Yawa, ag sanday Adan ag Eba ro baeasueon kon ham-an may mga kaeainan sa kalibutan. Nagakabaeaka gid si Jehova kon nagaantus kita, ag maeapit na eon dueaon ra.

Review

• Anong kapurilan ro ginsugid ni Satanas nga Yawa kay Eba?

• Paano nakaapekto katon ro gin-obra nanday Adan ag Eba?

• Paano naton nasayran nga nagakabaeaka si Jehova kon nagaantus kita?