LEKSYON 28
Ipakita ro Apresasyon sa Gin-obra ni Jehova ag ni Jesus Para Kimo
Ano ing batyagon kon taw-an ka it manami nga regalo it imong amigo? Sigurado nga masadyahan ka gid sa anang regalo ag gusto mo nga pasaeamatan imaw. Gintaw-an kita ni Jehova ag ni Jesus it pinakamanami nga regalo nga pwede natong mabaton. Ano ra, ag paano naton mapakita nga ginaapresyar naton ra?
1. Ano ro sangka paagi nga mapakita naton ro apresasyon sa gin-obra it Dyos ag it Cristo para katon?
Nagpromisa ro Biblia nga ro “kada nagatuo [kay Jesus]” hay mabuhi sa owa’t katapusan. (Juan 3:16) Ano ro buot hambaeon it nagatuo? Owa eang kita basta nga nagapati kay Jesus. Kundi ginapakita naton nga may pagtuo kita paagi sa ginapili naton nga desisyon ag sa atong mga ginaobra. (Santiago 2:17) Kon ipakita naton nga nagatuo kita paagi sa atong ginaobra ag ginahambae, mapabakud naton ro atong relasyon kay Jesus ag sa anang Ama, nga si Jehova.—Basaha ro Juan 14:21.
2. Ano ro espesyal nga okasyon nga makabulig katon para mapakita ro apresasyon sa gin-obra ni Jehova ag ni Jesus?
Ku gabii bago mamatay si Jesus, ginhambaean na ro anang mga sumoeunod it sangka paagi nga mapakita nanda ro andang apresasyon sa anang sakripisyo. Ginsugo na sanda nga magtipon sa espesyal nga okasyon nga ginatawag sa Biblia nga “ro Paihapon ku Ginuo,” nga ginatawag man Memoryal ku Kamatayon it Cristo. (1 Corinto 11:20) Gusto ni Jesus nga dumdomon ku anang mga apostoles ag ku tanan nga matuod nga mga Cristyano ro anang gintao nga kabuhi para katon. Parti sa rayang okasyon, nagsugo si Jesus: “Himoa ninyo raya sa handumanan nakon.” (Lucas 22:19) Kon mag-attend ka it Memoryal, ginapakita mo nga nagapasaeamat ka sa mabahoe nga pagpalangga ni Jehova ag ni Jesus para katon.
TUN-I PA GID
Sayura ro iba pang paagi nga mapasaeamatan mo ro mabahoe nga pagpalangga nga ginpakita ni Jehova ag ni Jesus. Tun-i kon ham-an importante ro Memoryal ku kamatayon it Cristo.
3. Ano ro obrahon naton para mapakita nga nagapasaeamat kita?
Imadyina nga sangkiri ka eang maeumos, pero may nagtabang kimo. Kalipatan mo eang baea ro pagtabang kimo it ratong tawo? O mausoy ka baea it paagi agud pasaeamatan imaw sa anang gin-obra?
Utang naton ro atong kabuhi kay Jehova. Basaha ro 1 Juan 4:8-10, ag talakaya rayon rayang mga pangutana:
-
Ham-an espesyal nga regalo ro sakripisyo ni Jesus?
-
Ano ing nabatyagan sa gin-obra ni Jehova ag ni Jesus para kimo?
Paano naton mapakita ro atong apresasyon sa gin-obra ni Jehova ag ni Jesus para katon? Basaha ro 2 Corinto 5:15 ag 1 Juan 4:11; 5:3. Pagkatapos basahon ro kada teksto, talakaya rayang pangutana:
-
Base sa rayang teksto, ano ro atong obrahon para mapakita nga nagapasaeamat kita?
4. Tueara si Jesus
Ro sangka paagi pa gid nga mapakita naton ro atong apresasyon hay paagi sa pagtuead kay Jesus. Basaha ro 1 Pedro 2:21, ag talakaya rayon rayang pangutana:
-
Paano mo matuead it mayad si Jesus?
Palangga ni Jesus ro Bisaea it Dyos, ginwali na ro mayad nga balita, ag ginbuligan ro iba
5. Mag-attend sa Memoryal ku kamatayon it Cristo
Agud masayran mo ro natabo sa unang Paihapon ku Ginuo, basaha ro Lucas 22:14, 19, 20. Talakaya rayon rayang mga pangutana:
-
Ano ro natabo sa Paihapon ku Ginuo?
-
Ano ro ginarepresentar it tinapay ag aeak?—Tan-awa ro bersikulo 19 ag 20.
Gusto ni Jesus nga iselebrar it anang mga disipulo ro Paihapon ku Ginuo sang beses sa sang dag-on sa anibersaryo it anang kamatayon. Ngani, nagatipon kada dag-on ro mga Saksi ni Jehova agud dumdomon ro kamatayon ni Cristo sa paagi nga ginsugo na. Para masayran ro parti sa rayang importante nga okasyon, tan-awa ro VIDEO. Talakaya rayon rayang pangutana.
-
Ano ro ginaobra sa Memoryal?
Ro tinapay ag aeak hay mga simbolo. Ro tinapay hay nagarepresentar sa perpektong eawas ni Jesus nga ginsakripisyo para katon. Ro aeak hay nagarepresentar sa anang dugo
KON MAY MAGHAMBAE: “Basta magpati ka eang kay Jesus, maeuwas ka eon.”
-
Paano mo gamiton ro Juan 3:16 ag Santiago 2:17 para ipakita nga may kinahang-ean pa imaw obrahon?
SUMARYO
Mapakita naton ro atong apresasyon sa gin-obra ni Jesus para katon paagi sa pagtuo naton kana ag sa pag-attend it Memoryal ku anang kamatayon.
Review
-
Ano ro buot hambaeon nga nagatuo kita kay Jesus?
-
Paano mo mapakita ing apresasyon sa gin-obra ni Jehova ag ni Jesus para kimo?
-
Ham-an importante nga mag-attend sa Memoryal ku kamatayon it Cristo?
SAYURA
Tungod sa kamatayon it Cristo, ano ro dapat natong obrahon?
Tun-i pa gid ro parti sa pagtuo ag kon paano mo ra maobra.
“Magtuo sa mga Promisa ni Jehova” (Ang Lalantawan, Oktubre 2016)
Basaha ro istorya nga “Malipayon Na Ako kag Wala Na Nangil-ad sa Akon Kaugalingon,” tan-awa ro epekto sa sangka bayi it kamatayon ni Jesus.
Ang Biblia Nagapabag-o sang Kabuhi” (Ang Lalantawan, Agosto 1, 2011)
Tan-awa kon ham-an it sangkiri ro nagakaon it tinapay ag nagainom it aeak sa Memoryal.
