Namatyan ka eon baea it pinalangga sa kabuhi? Sa ruyong malisud nga sitwasyon, basi makaisip ka: ‘Ano ro matabo kon mamatay kita? Makita pa baea naton it uman ro atong namatay nga pinalangga sa kabuhi?’ Sa rayang leksyon ag sa masunod, talakayon naton ro manami nga sabat it Biblia.

1. Ano ro matabo kon mamatay kita?

Ginkompara ni Jesus ro kamatayon sa hamuok nga tueog. Kon mahamuok ro tueog it sangka tawo indi na mapan-uhan ro nagakaeatabo sa anang palibot. Paano ro kamatayon pareho sa pagtueog? Kon ro sangka tawo hay mamatay, owa eon imaw it mabatyagan nga kasakit. Indi eon imaw makabatyag it kasubo, maskin pinalangga pa nana ro anang mga amigo ag pamilya. “Ro mga patay hay owa eon it nasayran,” hambae it Biblia.—Basaha ro Manugwali 9:5.

2. Ano ro benepisyo kon masayran naton ro kamatuoran parti sa kamatayon?

Abung tawo ro nahadlok mamatay—ag pati man sa mga patay! Pero maumpawan ka sa ginahambae it Biblia parti sa kamatayon. Ginhambae ni Jesus: “Ro kamatuoran magahilway kinyo.” (Juan 8:32) Ginaturo it ibang relihiyon nga kon mamatay ro sangka tawo, may kaeag nga nagaguwa kana nga padayon gihapon nga nagakabuhi pero buko’t ruyon ro ginaturo it Biblia. Ngani, owa eon nagaantus ro mga patay. Tungod owa eon kasayod ro mga patay it nagakaeatabo sa palibot, indi eon nanda kita kayang sakiton. Ngani indi eon kinahang-ean nga simbahon ag pangamuyuan ro mga patay agud magtawhay sanda.

Nagahambae ro iba nga pwede nanda maistorya ro mga patay. Pero imposible ron. Base sa atong hatun-an, ro mga patay hay “owa eon it nasayran.” Ginaisip it iba nga nakakaistorya nanda ro andang namatay nga pinalangga sa kabuhi pero ro matuod, mga demonyo ro andang ginaistorya nga nagapakuno-kuno eang nga namatay nandang pinalangga sa kabuhi. Ngani ro pagkasayod naton sa kamatuoran parti sa kamatayon hay nagaprotekta katon sa mga demonyo. Ginpaandaman kita ni Jehova nga indi mag-istorya sa mga patay tungod sayod nana nga makapaeain katon kon mag-istorya kita sa mga demonyo.—Basaha ro Deuteronomio 18:10-12.

3. Sayura ro matuod nga sitwasyon it mga patay

Sa bilog nga kalibutan, iba-iba ro pagpati it mga tawo sa kon ano gid ro sitwasyon it mga patay. Ro matuod, buko’t tanan nga ginapatihan nanda hay tama.

• Ano ro mga pagpati sa inyong lugar parti sa sitwasyon it mga patay?

 4. Makabenepisyo kita sa kamatuoran parti sa kamatayon

Ro pagkasayod it kamatuoran parti sa kamatayon hay nagahilway katon nga indi mahadlok sa mga patay. Basaha ro Manugwali 9:10, ag talakaya rayon rayang pangutana:

• Kaya baea kitang malitan o sakiton it mga patay?

Ginaprotektahan kita it kamatuoran sa Biblia sa saea nga pagpati nga dapat patawhayon o simbahon ro mga patay. Basaha ro Isaias 8:19 ag Pahayag 4:11, NWT, ag talakaya rayon rayang pangutana:

• Ano ro nabatyagan ni Jehova sa mga tawo nga nagasimba o nagapangayo it bulig sa mga patay?

5. Mapaumpawan kita it kamatuoran parti sa kamatayon

Gintur-an ro abung tawo nga kon mamatay sanda, pinahan sanda tungod sa andang haobra nga mga saea. Pero makapaumpaw masayran nga owa nagaantus ro mga patay—maskin pa ratong mga nakaobra it maeain nga mga bagay. Basaha ro Roma 6:7, ag talakaya rayon rayang pangutana:

• Ginahambae it Biblia nga kon mamatay ro sangka tawo, ginpatawad o ginpalaya eon imaw it Dyos sa anang mga saea. Kon kimo, nagaantus pa baea ro mga patay tungod sa andang haobra nga mga saea?

Habang mas nakikilaea naton si Jehova, mas naeubtan naton nga owa nana ginapaantus ro mga patay. Basaha ro Deuteronomio 32:4 ag 1 Juan 4:8, ag talakaya rayon rayang mga pangutana:

• Ro Dyos baea nga may makarayang ugali hay masugot nga paantuson ro mga patay?

• Makapaumpaw baea para kimo ro kamatuoran parti sa kamatayon? Ham-an?

 SUMARYO

Kon mamatay ro sangka tawo, owa eon imaw nagakabuhi. Owa eon nagaantus ro mga patay, ag indi eon nanda kaya nga malitan o sakiton ro mga buhi.

Review

• Ano ro matabo kon mamatay kita?

• Paano kita makabenepisyo kon sayod naton ro kamatuoran parti sa kamatayon?

• Paano makapaumpaw katon ro kamatuoran parti sa kamatayon?