LEKSYON 34

Paano Naton Mapakita nga Palangga Naton si Jehova?

I-PLAY

Nangin mas maeapit ka baea sa Dyos kat nagtuon ka it Biblia? Gusto mo baea nga ipadayon ro imong mabakud nga relasyon kana? Kon huo, tandai nga kon makita ni Jehova nga mas nagadaeum ing pagpalangga kana, mas palanggaon ka pa gid nana. Paano mo mapakita nga ginapalangga mo imaw?

1. Paano naton mapakita kay Jehova nga palangga naton imaw?

Mapakita naton ro atong pagpalangga kay Jehova paagi sa pagtuman kana. (Basaha ro 1 Juan 5:3.) Owa na ginapilita ro maskin sin-o nga magtuman kana. Kundi, ginataw-an na kita it tsansa nga magpili kon tumanon naton imaw o indi. Ham-an? Gusto ni Jehova nga kita hay ‘magtuman sa atong bug-os nga tagipusoon.’ (Roma 6:17) Buot hambaeon, gusto na nga tumanon mo imaw indi tungod napilitan ka eang, kundi tungod palangga mo imaw. Ro Seksyon 3 ag 4 it rayang libro hay gindisenyo para buligan ka nga mapakita mo ing pagpalangga kay Jehova, paagi sa pag-obra it mga nailaan na ag paglikaw sa mga owa na nailaan.

2. Ham-an malisud nga ipakita ro atong pagpalangga kay Jehova?

“Abu nga kalisdanan ro matarung.” (Salmo 34:19) Nalisdan kita tungod bukon kita it perpekto. Ag naeksperyinsyahan man naton ro malisud nga pangabuhi, inhustisya, ag iba pang problema. Kon maeksperyinsyahan naton ron, basi malisdan kita nga obrahon ro mga gustong ipaobra katon ni Jehova. Tungod kon amat, mas madali nga indi imaw pagtumanon. Pero kon ginasunod mo si Jehova, ginapakita mo nga mas palangga mo imaw kaysa sa iba pang bagay. Ginapamatud-an mo nga mainunongon ka kana, ngani mangin mainunongon man imaw kimo. Indi ka gid nana pag-aywanan.—Basaha ro Salmo 4:3.

TUN-I PA GID

Sayura kon ham-an importante kay Jehova ro imong pagtuman kana, ag tun-i kon ano ro makabulig kimo nga makapabilin nga mainunongon kana.

3. Ro isyu nga nadaeahig ka

Mabasa naton sa libro it Job sa Biblia, nga gin-akusahan ni Satanas si Job pati man ro mga tawo nga gustong mag-alagad kay Jehova. Basaha ro Job 1:1, 6–2:10, ag talakaya rayon rayang mga pangutana:

Base kay Satanas, ham-an nagtuman si Job kay Jehova?—Tan-awa ro Job 1:9-11.
Ano ro ginhambae ni Satanas sa tanan nga tawo, pati kimo?—Tan-awa ro Job 2:4.

Basaha ro Job 27:5b, ag talakaya rayon rayang pangutana:

Paano ginpakita ni Job nga palangga na gid si Jehova?

Ginpakita ni Job ro anang pagpalangga kay Jehova paagi sa pagpabilin nga mainunongon kana

Mapakita naton ro atong pagpalangga kay Jehova paagi sa pagpabilin nga mainunongon kana

4. Pasadyaha ro tagipusuon ni Jehova

Basaha ro Hulubaton 27:11, ag talakaya rayon rayang mga pangutana:

Ano ro mabatyagan ni Jehova kon mangin maaeam ka ag magtuman kana? Ham-an?

5. Pwede ka mangin mainunongon kay Jehova

Ginapahueag kita it atong pagpalangga kay Jehova nga isugid sa iba ro parti kana. Ag ro atong pagkamainunongon kana hay makabulig nga obrahon ra maskin malisud. Tan-awa ro VIDEO, ag talakaya rayon rayang mga pangutana.

VIDEO: Depensahi ro Imong Pagtuo Maskin may Pagkontra (5:09)

Nalisdan ka baea nga isugid sa iba ro parti kay Jehova?
Sa video, ano ro nakabulig kay Grayson nga maduea ro anang kahadlok?

Kon ginapalangga naton ro mga ginapalangga ni Jehova ag ginakaugtan ro mga ginakaugtan nana, mas madali katon nga mangin mainunongon kana. Basaha ro Salmo 97:10, ag talakaya rayon rayang mga pangutana:

Base sa imong hatun-an, ano ro mga bagay nga ginapalangga ni Jehova? Ano ro mga bagay nga ginakaugtan na?
Ano ing obrahon agud palanggaon mo ro mayad ag kaugtan ro maeain?

6. Makabenepisyo kita kon tumanon naton si Jehova

Mayad gid nga tumanon pirme si Jehova. Basaha ro Isaias 48:17, 18, ag talakaya rayon rayang mga pangutana:

Kon kimo, makasalig baea kita kay Jehova nga sayod na ro pinakamayad para katon? Ham-an?
Ano eon ing nabenepisyuhan kat nagtuon ka it Biblia ag nakilaea mo ro matuod nga Dyos nga si Jehova?

KON MAY MAGHAMBAE: “Owa ma’t pakialam ro Dyos kon ano ang obrahon.”