LEKSYON 35
Kon Paano Kita Makaobra it Mayad nga Desisyon
May mga desisyon kita nga dapat obrahon. Rayang mga desisyon hay may mabahoe nga epekto katon ag sa atong relasyon kay Jehova. Halimbawa, magadesisyon kita kon siin maestar, kon ano nga trabaho ro atong pilion, ag kon maasawa baea kita o indi. Mangin masadya ro atong kabuhi ag mapasadya man naton si Jehova kon mag-obra kita it mayad nga mga desisyon.
1. Paano makabulig ro Biblia agud makaobra ka it mayad nga desisyon?
Bago mag-obra it desisyon, mangayo it bulig kay Jehova paagi sa pangamuyo ag tun-i ro Biblia agud masayran mo kon ano ro anang pagtan-aw kara. (Basaha ro Hulubaton 2:3-6.) Sa ibang sitwasyon, nagatao si Jehova it klaro nga sugo. Ngani, ro pinakamayad nga desisyon nga maobra mo hay tumanon ra.
Paano kon owa it klaro nga sugo ro Biblia sa kon ano ing obrahon? Giyahan ka gihapon ni Jehova “sa daean nga dapat mong tikangan.” (Isaias 48:17) Paano? May mga prinsipyo nga makabulig kimo. Ro prinsipyo sa Biblia hay panguna nga kamatuoran nga nagasugid it kaisipan ag baeatyagon it Dyos. Kon nagabasa kita it istorya sa Biblia, masayran naton ro ginabatyag it Dyos sa sangka bagay. Kon sayod naton ro ginabatyag ni Jehova, makaobra kita it mga desisyon nga makapasadya kana.
2. Ano ing dapat isipon bago mag-obra it desisyon?
Nagahambae ro Biblia: “Ro tawo nga maaeam hay nagaisip it kada eak-ang nana.” (Hulubaton 14:15) Buot hambaeon bago kita mag-obra it desisyon, isipon anay naton ra it mayad kon ano ro atong pilion. Habang ginaobra mo ra, kutan-a ing sarili: ‘Ano ro prinsipyo sa Biblia nga makabulig kakon? Alin kara ro makatao it katawhay sa akong isip? Paano makaapekto sa iba ro akong desisyon? Ro pinakaimportante sa tanan, mapasadya baea kara si Jehova?’—Deuteronomio 32:29.
May karapatan si Jehova nga ihambae katon kon ano ro mayad ag maeain. Kon sayod naton ro anang mga kasugoan ag prinsipyo ag ginatinguhaan nga sundon ra, ginasanay naton ro atong konsensya. Ro konsensya hay ro atong pagkasayod sa tama ag saea. (Roma 2:14, 15) Ro hasanay nga konsensya hay makabulig katon nga makaobra it mayad nga mga desisyon.
TUN-I PA GID
Sayura kon paano ro prinsipyo it Biblia ag ro konsensya makabulig katon nga makaobra it mayad nga desisyon.
3. Magpabulig sa Biblia
Paano katon makabulig ro mga prinsipyo sa Biblia agud makaobra it mga desisyon? Tan-awa ro VIDEO, ag talakaya rayon rayang mga pangutana.
-
Ano ro kahilwayan sa pagdesisyon?
-
Ham-an gintaw-an kita ni Jehova it kahilwayan sa pagdesisyon?
-
Ano ro anang gintao agud buligan kita nga makaobra it pinakamayad nga desisyon?
Tan-awa ro sangka prinsipyo sa Biblia, basaha ro Efeso 5:15, 16. Talakaya rayon kon paano mo magamit it mayad ing oras agud . . .
-
regular nga mabasa ro Biblia.
-
mangin mayad nga asawa, ginikanan, o unga.
-
maka-attend it mga miting sa kongregasyon.
4. Sanaya ing konsensya agud makaobra it mayad nga mga desisyon
Kon may klaro nga sugo ro Biblia parti sa sangka bagay, madali eang mag-obra it tama nga desisyon. Pero paano kon owa it klaro nga sugo? Tan-awa ro VIDEO, ag talakaya rayon rayang pangutana.
-
Sa video, ano ro gin-obra it sister agud sanayon ro anang konsensya ag makaobra it mayad nga desisyon nga makapasadya kay Jehova?
Ham-an indi naton dapat pagpasugtan ro iba nga magdesisyon para katon? Basaha ro Hebreo 5:14, ag talakaya rayon rayang mga pangutana:
-
Maskin madali eang magpabulig sa iba nga magdesisyon para katon, ham-an kita gid dapat ro magdesisyon para sa atong sarili?
-
Ano ro makabulig agud masanay mo ing konsensya ag makaobra it mayad nga mga desisyon?
Pareho it mapa, magiyahan kita it atong konsensya agud makaobra it mayad nga mga desisyon sa atong kabuhi
5. Respetuha ro konsensya it iba
Iba-iba ro desisyon it kada tawo. Paano naton marespeto ro konsensya it iba? Tan-awa ro daywa nga sitwasyon:
Sitwasyon 1: Ro sister nga mahilig mag-make-up hay nagsaylo sa kongregasyon nga owa naanad ro mga sister igto nga makakita it naka-make-up.
Basaha ro Roma 15:1 ag 1 Corinto 10:23, 24, ag talakaya rayon rayang mga pangutana:
-
Base sa rayang mga teksto, ano ro pwedeng obrahon it sister? Ano ing obrahon kon may ginaobra ka nga owa ka ginakonsensyaha pero ginakonsensya kara ro iba?
Sitwasyon 2: Sayod it brother nga owa ginabawae it Biblia ro kasarangan eang nga pag-inom it aeak, pero ginpili na nga indi mag-inom. Gin-imbitar imaw sa sangka okasyon kon siin makita na nga nagainom it aeak ro mga brother igto.
Basaha ro Manugwali 7:16 ag Roma 14:1, 10, ag talakaya rayon rayang mga pangutana:
-
Base sa rayang mga teksto, ano ro pwedeng obrahon it brother? Ano ing obrahon kon may ginaobra ro iba nga owa sanda ginakonsensyaha pero ginakonsensya ka?
Mga dapat mong obrahon agud makadesisyon it mayad
1. Mangayo it bulig kay Jehova agud makadesisyon kon ano ing obrahon.—Santiago 1:5.
2. Mag-research sa Biblia ag sa mga publikasyon nga base sa Biblia agud makita ro mga prinsipyo nga makabulig kimo. Pwede ka man magpangutana sa eksperyensyado nga mga Cristyano.
3. Sayura kon ano ro mangin epekto it imong desisyon sa ing konsensya ag sa konsensya it iba.
KON MAY MAGHAMBAE: “Pagusto tang kon ano ang obrahon. Bahala ta sanda ron kon ano andang isipon!”
-
Ham-an dapat naton isipon ro ginabatyag it Dyos, pati man ro iba?
SUMARYO
Makaobra kita it mayad nga mga desisyon kon sayod naton ro ginabatyag ni Jehova sa sangka bagay ag kon baea ro atong ginaobra hay makabulig o makapaeain sa iba.
Review
-
Paano ka makaobra it mga desisyon nga makapasadya kay Jehova?
-
Paano mo sanayon ing konsensya?
-
Paano naton marespeto ro konsensya it iba?
SAYURA
Paano ka makaobra it desisyon nga makapabakud sa imong relasyon sa Dyos?
“Maghimo sang mga Desisyon nga Nagapadungog sa Dios” (Ang Lalantawan, Abril 15, 2011)
Sayura kon paano kita ginagiyahan ni Jehova.
Sayura kon ano ro nakabulig sa eaki nga mag-obra it desisyon maskin malisud ra.
Sigurado nga Itao Katon ni Jehova ro Tanan nga Mayad nga Bagay (5:46)
Sayura pa gid kon paano mapasadya si Jehova maskin owa imaw nagtao it klaro nga sugo sa sangka bagay.
“Kinahanglan Mo Bala Pirme ang Isa ka Sugo sang Biblia?” (Ang Lalantawan, Disiembre 1, 2003)
