Importante gid ro dugo. Kon owa ra, indi kita mabuhi. Bilang atong Manogtuga, ro Dyos eang ro makahambae kon paano gamiton ro dugo. Ano ro ginhambae nana parti sa dugo? Pwede baea ra kan-on o itughong? Ag paano ka makaobra it mayad nga desisyon parti kara?

1. Ano ro pagtan-aw ni Jehova parti sa dugo?

Ku panahon it Biblia, ginhambae ni Jehova sa mga nagasimba kana: “Ro kabuhi it tanan nga klasi it unod una sa dugo.” (Levitico 17:14) Para kay Jehova, ro dugo hay nagarepresentar sa kabuhi. Tungod sagrado ro kabuhi o baeaan nga regalo halin sa Dyos, ro dugo hay sagrado man.

2. Ano ro paggamit it dugo nga ginbawae it Dyos?

Bago pa ku panahon it mga Cristyano, ginsugo ni Jehova ro mga nagasimba kana nga indi magkaon it dugo. (Basaha ro Genesis 9:4 ag Levitico 17:10.) Gin-uman na raya nga sugo paagi sa gintao nga instruksyon it nagadumaea nga grupo sa mga Cristyano nga “indi kamo magkaon . . . it dugo [“maglikaw sa dugo,” NWT].”—Basaha ro Binuhatan 15:28, 29.

Ano ro buot hambaeon nga maglikaw sa dugo? Kon ginhambaean ka it doktor nga maglikaw sa aeak, indi mo pag-imnon ra. Pero makaon ka baea it pagkaon nga may halo nga aeak o iturok ra sa ing ugat? Syempre indi. Kapareho man ra sa sugo it Dyos nga maglikaw sa dugo, ngani indi kita dapat mag-inom o magkaon it karne nga owa pa hapatueo ro dugo. O magkaon it pagkaon nga may halo nga dugo.

Paalin man sa paggamit it dugo sa pagbueong? Ro iba nga paagi hay klaro nga nagaeapas sa sugo it Dyos. Kaibahan eon kara ro pagpatughong it puro nga dugo o maskin alin sa panguna nga parte kara—puea nga selula, puti nga selula, platelet, ag plasma. Ro iba nga paagi it pagbueong hay buko’t klaro nga nagaeapas sa sugo it Dyos. Halimbawa, may ibang paagi it pagbueong nga nagagamit it blood fractions halin sa panguna nga parte it dugo. Ro iba mat-a hay nagagamit it sarili nga dugo it pasyente. Sa rayang mga paagi it pagbueong, ro kada isaea hay dapat mag-obra it personal nga desisyon. a—Galacia 6:5.

 TUN-I PA GID

3. Pilia ro paagi it pagbueong nga makapasadya kay Jehova

Paano ka makapili it paagi it pagbueong nga nabase sa pagtan-aw it Dyos? Tan-awa ro VIDEO, ag talakaya rayon kon ham-an importante nga obrahon ro mga masunod:

• Mangamuyo it kaaeam.—Santiago 1:5.

• Mag-research it mga prinsipyo sa Biblia ag kon paano ra makabulig kimo.—Hulubaton 13:16.

• Sayura kon ano ro mga paagi it pagbueong nga may una sa inyong lugar.

• Sayura kon ano nga paagi it pagbueong ro indi mo pagbatunon.

• Siguraduha nga may malimpyo ka nga konsensya sa imong gin-obra nga desisyon.—Binuhatan 24:16. b

• Tandai nga kon mag-obra ka it desisyon nga nakadepende sa ing konsensya indi pwede nga magdesisyon ro imong asawa, ro mga elder, o ro naga-Bible study kimo.—Roma 14:12.

• Isueat ro imong desisyon agud masayran it iba.

4. Nagapili it pinakamayad nga paagi it pagbueong ro mga Saksi ni Jehova

Posible masunod ro sugo it Dyos parti sa dugo ag makabaton it paagi it pagbueong nga owa nagagamit it dugo. Tan-awa ro VIDEO.

Basaha ro Tito 3:2, ag talakaya rayon rayang pangutana:

• Ham-an dapat kita magpakita it pagrespeto ag mangin kalmado kon nagaistorya sa mga doktor?

 5. Kon ginagamit ro blood fractions sa pagbueong

May ap-at nga panguna nga parte ro dugo—puea nga selula, puti nga selula, platelet, ag plasma. Rayang mga panguna nga parte hay abu pa gid it maisot nga mga parte nga ginatawag nga blood fractions. c Ro ibang fractions hay ginagamit sa pagbueong sa masakit o sa pagpapundo it pagdugo.

Kon parti sa blood fractions, ro kada Cristyano hay dapat magdesisyon base sa anang ginsanay sa Biblia nga konsensya. Ro iba hay owa nagabaton it paagi it pagbueong nga nagagamit it blood fractions. Ro iba mat-a hay basi ginasugtan it andang konsensya nga batunon rayang paagi it pagbueong.

Kon nagaobra ka it mga desisyon, isipa rayang pangutana:

• Paano ko ipaathag sa ang doktor kon batunon ko o indi ro sangka paagi it pagbueong nga nagagamit it blood fractions?

 SUMARYO

Gusto ni Jehova nga likawan naton ro saea nga paggamit it dugo.

Review

• Ham-an sagrado ro pagtan-aw ni Jehova sa dugo?

• Paano naton nasayran nga ro pagpatughong it dugo hay kaibahan sa sugo it Dyos nga maglikaw sa dugo?

• Paano ka makadesisyon it mayad parti sa pagpabueong nga nagagamit it dugo?