Imadyina ro sangka mapinalanggaon nga nanay nga ginapahaum ro anang maisot nga unga paagto sa eskuylahan. Ginasigurado na nga nakapaligos ra ag malimpyo ro anang inugsuksok nga eambong. Makabulig ra kana nga indi magmasakit ag mapakita sa iba nga ginadipara gid imaw it anang ginikanan. Gusto man it atong mapinalanggaon nga Ama nga si Jehova nga mangin malimpyo kita sa pisikal ag moral. Kita mismo ro makabenepisyo kon malimpyo kita ag mapadunggan man naton imaw.

1. Paano kita mangin malimpyo sa pisikal?

Ginahambae katon ni Jehova: “Magpakabaeaan kamo.” (1 Pedro 1:16) Agud mangin baeaan, kinahang-ean nga malimpyo kita sa pisikal ag moral. Mangin malimpyo kita sa pisikal kon pirme kita nga nagapaligos, ag dapat mahimis ag malimpyo ro atong eambong, baeay, ag saeakyan. Makabulig man kita sa pagpanglimpyo it atong Kingdom Hall. Kon malimpyo kita sa pisikal, mapadunggan naton si Jehova.—2 Corinto 6:3, 4.

2. Para mangin malimpyo, ano nga mga ueobrahon ro dapat natong likawan?

Ginapalig-on kita it Biblia nga “limpyohan naton ro atong kaugalingon sa tanan nga nagahigko sa atong eawas ag espiritu.” (2 Corinto 7:1) Ngani, dapat natong likawan ro maskin alin nga bagay nga makasamad sa atong eawas ag painu-ino. Dapat nga makapasadya kay Jehova ro atong ginaisip, ngani ginatinguhaan naton nga isikway ro buko’t manami nga kaisipan. (Salmo 104:34) Ginatinguhaan man naton nga mayad ro atong ginahambae.—Basaha ro Colosas 3:8.

Ano pa ro makapahigko katon sa pisikal o sa moral? May mga bagay nga makapahigko sa atong eawas. Ngani, owa kita nagasigarilyo, nagamama, o nagadroga. Kon ginalikawan naton ra, may mas mayad kita nga pang-eawas ag mapakita naton ro pagrespeto sa regalo nga kabuhi. Ginatinguhaan man naton nga mangin malimpyo sa moral kon nagatinguha kita nga likawan ro mahigko nga mga ueobrahon kapareho it masturbasyon ag ro pagtan-aw it pornograpiya. (Salmo 119:37; Efeso 5:5) Buko’t maeumo nga punduhon rayang mga ueobrahon, pero mabuligan kita ni Jehova nga obrahon ra.—Basaha ro Isaias 41:13.

 TUN-I PA GID

3. Nagapadungog kay Jehova ro pisikal nga kalimpyo

Masayran naton kon mauno ka importante kay Jehova ro kalimpyo kon atong tun-an ro anang mga sugo sa Israel kato. Basaha ro Exodo 19:10 ag 30:17-19, ag talakaya rayon rayang mga pangutana:

• Ano ro ginahambae it rayang mga teksto parti sa pagtan-aw ni Jehova sa pisikal nga kalimpyo?

• Ano ro dapat mong obrahon agud mangin malimpyo sa pisikal?

Kinahang-ean ro panahon ag pagtinguha agud mangin malimpyo sa pisikal. Pero maobra naton ra maskin siin man kita nagaestar, pobre man kita o manggaranon. Tan-awa ro VIDEO, ag talakaya rayon rayang pangutana.

• Ham-an makapainteres sa iba kon mahimis ag malimpyo ro mga gamit naton kon naga-preaching kita?

4. Punduha ro maeain nga mga bisyo

Kon nagasigarilyo ka o nagadroga, sayod mo nga buko’t maeumo nga punduhon rayang bisyo. Ano ro makabulig? Sayura kon paano rayang bisyo nagaapekto kimo. Basaha ro Mateo 22:37-39, ag talakaya rayon kon paano ro pagsinigarilyo o ro saea nga paggamit it droga hay makaapekto . . .

• sa anang relasyon kay Jehova.

• sa anang pamilya ag sa iba.

Mag-obra it plano kon paano mo mapundo ro maeain nga bisyo. a Tan-awa ro VIDEO.

Basaha ro Filipos 4:13, ag talakaya rayon rayang pangutana:

• Paano ro regular nga pagpangamuyo, pagtuon sa Biblia, ag pag-attend sa mga miting makabulig sa sangka tawo nga mapundo ro maeain nga bisyo?

 5. Suk-ei ro mahigko nga kaisipan ag mga ueobrahon

Basaha ro Colosas 3:5, ag talakaya rayon rayang mga pangutana:

• Paano naton nasayran nga mahigko ro pornograpiya, sexting, ag masturbasyon sa mata ni Jehova?

• Kon kimo, tama baea nga gustuhon ni Jehova nga mangin malimpyo kita sa moral? Ham-an?

Sayura kon paano masuk-ean ro mahigko nga mga kaisipan. Tan-awa ro VIDEO.

Naggamit it ilustrasyon si Jesus para ipakita nga kinahang-ean naton nga maghueag eagi para makapabilin nga malimpyo sa moral. Basaha ro Mateo 5:29, 30, ag talakaya rayon rayang pangutana:

• Owa ginhambae ni Jesus nga sakiton naton ro atong sarili, pero ginhambae na nga dapat kita maghueag eagi. Ano ro dapat obrahon it sangka tawo agud malikawan ro mahigko nga kaisipan? b

Kon padayon mo nga ginasuk-ean ro mahigko nga mga kaisipan, ginaapresyar gid ni Jehova ro imong pagtinguha. Basaha ro Salmo 103:13, 14, ag talakaya rayon rayang pangutana:

• Kon nalisdan ka nga punduhon ro mahigko nga bisyo, paano ka mabuligan it rayang teksto nga magpadayon sa pagsukoe?

 SUMARYO

Mapasadya naton si Jehova kon mangin malimpyo kita sa atong eawas, sa atong painu-ino, ag sa atong mga ginaobra.

Review

• Ham-an importante nga mangin malimpyo?

• Paano ka mangin malimpyo sa pisikal?

• Paano ka mangin malimpyo sa ing ginaisip ag ginaobra?