Sa bilog nga kalibutan, iba-iba ro opinyon it mga tawo parti sa aeak. Ro iba hay naga-enjoy nga mag-inom kaibahan it andang mga amigo kon amat. Ro iba mat-a hay owa gid-a nagainom. Ro iba pa gid hay nagainom hasta nga mahilong. Ano ro ginahambae it Biblia parti sa aeak?

1. Saea baea ro pag-inom it aeak?

Owa ginahambae it Biblia nga saea ro pag-inom it aeak. Kundi, sambato ra sa abu nga mga regalo it Dyos katon. Naghambae ro Biblia nga ro ‘aeak hay makapasadya sa tagipusuon it tawo.’ (Salmo 104:14, 15) Ro pila sa matutom nga mga eaki ag bayi sa Biblia hay nag-inom man it aeak.—1 Timoteo 5:23.

2. Ano ro ginahambae it Biblia sa mga nagainom it aeak?

Owa naila si Jehova sa sobra nga pag-inom ag pagpahilong. (Galacia 5:21) Nagahambae ro anang Bisaea: “Indi ka mangin paeainom it aeak.” (Hulubaton 23:20) Ngani, kon nagainom kita it aeak—maskin owa’t kaibahan—indi kita dapat mag-inom it sobra nga indi eon kita makaisip it mayad, indi eon naton makontrol ro atong ginahambae ag ginaobra, o makasamad eon ra sa atong pang-eawas. Kon indi eon naton makontrol ro atong pag-inom, punduhon eon naton ra.

3. Paano naton respetuhon ro desisyon it iba parti sa pag-inom it aeak?

Ro kada isaea hay dapat magdesisyon kon mainom imaw it aeak o indi. Indi naton dapat paghukman ro iba nga nagainom it kasarangan eang, ag indi man dapat naton pagpiliton ro iba kon owa sanda naila mag-inom. (Roma 14:10) Indi lang kita mag-inom kon makatao manlang ra it problema sa iba. (Basaha ro Roma 14:21.) Owa kita ‘nagausoy it atong kaugalingon nga kamaeayran, kundi ro kamaeayran it atong isigkatawo.’—Basaha ro 1 Corinto 10:23, 24.

 TUN-I PA GID

4. Magdesisyon kon baea mainom ka o indi

Ano ro pagtan-aw ni Jesus parti sa pag-inom it aeak? Agud masayran ro sabat, sayura ro unang milagro nga anang gin-obra. Basaha ro Juan 2:1-11, ag talakaya rayon rayang mga pangutana:

• Sa rayang milagro, ano ro matun-an naton parti sa pagtan-aw ni Jesus sa aeak ag sa mga nagainom kara?

• Tungod owa ginabawae ni Jesus ro pag-inom it aeak, ano dapat ro pagtan-aw it sangka Cristyano sa mga nagainom kara?

Pero, maskin pwede mag-inom ro sangka Cristyano, owa ra nagakahueogan nga mag-ininom lang imaw pirme. Basaha ro Hulubaton 22:3, ag talakaya rayon kon paano makaapekto rayang mga sitwasyon kon baea mainom ka o indi:

• Kon nagadrayb ka o naga-operate it makina.

• Kon nabdos ka.

• Kon ginhambaean ka it ing doktor nga indi mag-inom it aeak.

• Kon indi mo makontrol ro pag-inom.

• Kon may layi sa inyong lugar nga nagabawae mag-inom it aeak.

• Kon kaibahan mo ro sangka tawo nga indi eon mag-inom it aeak tungod paeahilong imaw dati.

Dapat ka baea magserbi it aeak sa kasae o sa ibang pagtieipon? Agud mabuligan ka sa pagdesisyon, tan-awa ro VIDEO.

Basaha ro Roma 13:13 ag 1 Corinto 10:31, 32. Pagkatapos basahon ro kada teksto, talakaya rayang pangutana:

• Paano ro pagsunod sa rayang prinsipyo makabulig kimo nga makaobra it desisyon nga makapasadya kay Jehova?

 5. Magdesisyon kon mauno it abu ing imnon

Kon nagainom ka it alkoholiko nga mga ieimnon, tandai ra: Owa naghambae si Jehova nga saea ro pag-inom, pero owa imaw naila sa sobra nga pag-inom. Ham-an? Basaha ro Oseas 4:11, 18, ag talakaya rayon rayang pangutana:

• Ano ro pwedeng matabo kon mag-inom it sobra ro sangka tawo?

Paano naton malikawan ro sobra nga pag-inom? Dapat sayod naton ro atong limitasyon. Basaha ro Hulubaton 11:2, ag talakaya rayon rayang pangutana:

• Ham-an mayad nga magbutang kita it limitasyon kon mauno’t abu ro atong imnon?

6. Mapundo mo ro sobra nga pag-inom

 SUMARYO

Gintao ni Jehova ro aeak agud masadyahan kita, pero owa imaw naila sa sobra nga pag-inom ag pagpahilong.

Review

• Ano ro ginahambae it Biblia parti sa aeak?

• Ano ro pwedeng matabo sa mga sobra mag-inom it aeak?

• Paano naton marespeto ro desisyon it iba parti sa pag-inom?