LEKSYON 46
Ham-an Dapat ka Magdedikar ag Magpabautismo?
Ginadedikar mo ing sarili kay Jehova paagi sa pangamuyo nga nagapromisa nga imaw eang ro simbahon ag unahon sa imong kabuhi. (Salmo 40:8) Rayon, pwede ka eon magpabautismo. Sa pag-obra kara, ginapakita mo sa iba nga hadedikar mo eon ing sarili. Ro pagdedikar sa atong sarili kay Jehova ro pinakaimportanteng desisyon nga pwede natong maobra. Ano ro magapahueag kimo nga obrahon rayang seryoso ag makapabag-o it kabuhi nga desisyon?
1. Ano ro magapahueag sa sangka tawo nga magdedikar?
Ro atong pagpalangga kay Jehova ro magapahueag katon nga magdedikar. (1 Juan 4:10, 19) Ginasugo kita it Biblia: “Higugmaa [si Jehova] nga imong Dyos it bug-os mo nga tagipusoon, it bug-os mo nga kaeag, it bug-os mo nga huna-hona, ag it bug-os mo nga kusog.” (Marcos 12:30) Ginapakita naton nga palangga naton ro Dyos bukon eang sa atong ginahambae, kundi pati man sa atong ginaobra. Kapareho it magnobyo nga gustong magpakasae tungod palangga nanda ro kada isaea, ngani ro atong pagpalangga kay Jehova ro gapahueag katon nga idedikar ro atong sarili kana ag magpabautismo.
2. Anong mga pagpakamayad ro itao ni Jehova sa anang bautismado nga mga Saksi?
Kon mabautismuhan ka eon, mangin parte ka it masadya nga pamilya ni Jehova. Maeksperyinsyahan mo man ro anang pagpalangga kimo sa iba-ibang mga paagi, ag mas magaeapit ka pa gid kana. (Basaha ro Malaquias 3:16-18.) Mangin Ama mo si Jehova, ag may una ka espiritwal nga pamilya it kaigmanghuran sa bilog nga kalibutan nga nagapalangga kana ag kimo. (Basaha ro Marcos 10:29, 30.) Pero, may mga kinahang-ean ka nga obrahon bago mabautismuhan. Kinahang-ean mong matun-an ro parti kay Jehova, palanggaon imaw, ag magtuo sa anang Unga. Ag ro pinakaulihi, dapat mong idedikar ing kabuhi kay Jehova. Kon obrahon mo rayang mga bagay ag magpabautismo, pwede ka mangin masadya sa owa’t katapusan. Nagahambae ro Bisaea it Dyos: ’Ro pagbautismo makaron nagaeuwas kimo.’—1 Pedro 3:21.
TUN-I PA GID
Sayura kon ham-an importante nga magdedikar ka kay Jehova ag magpabautismo.
3. Dapat kita magpili kon sin-o ro atong alagaron
Sa Israel kato, ginaisip it mga tawo nga pwede nanda masimba si Jehova ag ro buko’t matuod nga dyos nga si Baal. Pero ginpadaea ni Jehova ro anang propeta nga si Elias agud tadlungon rayang saea nga kaisipan. Basaha ro 1 Hari 18:21, ag talakaya rayon rayang pangutana:
-
Ano ro desisyon nga dapat obrahon it mga Israelita?
Pareho it mga Israelita, kinahang-ean man naton magpili kon sin-o ro atong alagaron. Basaha ro Lucas 16:13, ag talakaya rayon rayang mga pangutana:
-
Euwas kay Jehova, ham-an indi kita dapat magsimba sa iba, sa tawo man o bagay?
-
Paano naton ipakita kay Jehova nga ginapili naton imaw nga simbahon?
4. Isipa ro pagpalangga kimo ni Jehova
Gintaw-an kita ni Jehova it manami nga mga regalo. Ano man ro atong matao kana? Tan-awa ro VIDEO.
Sa anong mga paagi ginpakita ni Jehova ro anang pagpalangga kimo? Basaha ro Salmo 104:14, 15 ag 1 Juan 4:9, 10, ag talakaya rayon rayang mga pangutana:
-
Ano sa mga regalo ni Jehova ro ginapasaeamatan mo gid?
-
Ano ing nabatyagan parti kana tungod sa ratong mga regalo?
Kon makabaton kita it regalo nga nailaan gid naton, gusto naton ipakita ro apresasyon sa nagtao kara. Basaha ro Deuteronomio 16:17, ag talakaya rayon rayang pangutana:
-
Ano man ing matao kana kon isipon mo ro tanan nga bagay nga haobra na para kimo?
5. Abung pagpakamayad kon magdedikar ka
Abung tawo ro nagapati nga kon sikat sanda, may manami nga trabaho, o abu nga kwarta hay mangin masadya sanda. Matuod gid baea ron? Tan-awa ro VIDEO, ag talakaya rayon rayang mga pangutana.
-
Sa video, maskin gusto it atleta ro paghampang it soccer, ham-an gin-aywan na ratong karera?
-
Ginpili na nga idedikar ro anang sarili bukon sa soccer, kundi kay Jehova. Kon kimo, tama baea ro anang desisyon? Ham-an?
Bago mangin Cristyano si apostol Pablo, gintinguhaan na man nga mangin prominente ro anang karera. Nagtuon imaw it Judio nga kasugoan kaibahan ro sikat nga manogturo. Pero gin-aywanan na ra tanan para mangin Cristyano. Nagnuoe baea si Pablo? Basaha ro Filipos 3:8, ag talakaya rayon rayang mga pangutana:
-
Ham-an nakahambae si Pablo nga ro anang gin-obra kato bago imaw nangin Cristyano hay “mga basura” eang?
-
Pero ano ro anang habaton?
-
Ano ro kinaeain it kabuhi nga nagaalagad kay Jehova kaysa sa owa nagaalagad kana?
Kat nangin Cristyano si Pablo, mas abu pa ro anang habaton kaysa sa anang ginsakripisyo
KON MAY MAGHAMBAE: “Indi mo man kinahang-ean nga idedikar ing kabuhi sa Dyos.”
-
Kon kimo, tama baea nga idedikar mo ing sarili kay Jehova?
SUMARYO
Ro atong pagpalangga kay Jehova ro magapahueag katon nga magdedikar ag magpabautismo.
Review
-
Ham-an nagakabagay gid nga simbahon ag palanggaon si Jehova sa atong bilog nga tagipusuon?
-
Paano ginapakamayad ni Jehova ro anang bautismado nga mga Saksi?
-
Gusto mo baea idedikar ing sarili kay Jehova?
SAYURA
Tan-awa kon ham-an ginpili it sangka singer ag sangka atleta nga idedikar nanda ro andang sarili kay Jehova.
Pangutana it mga Bataon—Ano Ang Obrahon sa Ang Kabuhi?—Pagdumdom sa Nagtaliwan (6:54)
Sayura ro iba pang mga rason para magdedikar.
“Ngaa Dapat Mo Idedikar ang Imo Kaugalingon kay Jehova?” (Ang Lalantawan, Enero 15, 2010)
Sa rayang music video, tan-awa ro kasadya it mga nagdedikar it andang sarili kay Jehova.
Sa istorya nga “Kabuhay Ko Eon nga Ginaisip, ‘Ham-an Iya Kita?’” basaha kon ano ro nagpahueag sa sangka bayi nga sayuron kon ano gid ro anang prioridad.
“Ginabag-o it Biblia ro Kabuhi” (The Watchtower, November 1, 2012)
