Nagaeaum ro bag-ong mag-asawa nga ro kasadya nga andang nabatyagan kat ginkasae sanda hay magapadayon sa owa’t katapusan. Ag pwede gid ron matabo. Napamatud-an gid ron it mabuhay eon nga mag-asawa nga mga Cristyano nga nagsunod sa mga eaygay it Biblia.

1. Ano ro ginahambae it Biblia sa mga asawang eaki?

Gintao ni Jehova sa mga asawang eaki ro responsibilidad nga mangin ueo it pamilya. (Basaha ro Efeso 5:23.) Gusto ni Jehova nga makaobra imaw it mayad nga mga desisyon nga makabulig sa anang pamilya. Nagahambae ro Biblia sa mga asawang eaki nga padayon nga “higugmaa ninyo ro inyong mga asawa.” (Efeso 5:25) Ano ro buot hambaeon kara? Ro mapinalanggaon nga asawang eaki hay mabuot sa anang asawa, sa baeay man ag kon may kaibahan sandang iba. Ginaprotektahan na imaw ag ginaobra ro tanan agud maitao sa anang asawa ro anang pisikal ag emosyonal nga mga kinahang-eanon. (1 Timoteo 5:8) Ro pinakaimportante sa tanan, ginabuligan na imaw nga mangin mas maeapit pa gid kay Jehova. (Mateo 4:4) Halimbawa, pwede imaw makapangamuyo ag makabasa it Biblia kaibahan sa anang asawa. Kon mapinalanggaon nga ginadipara it asawang eaki ro anang asawa, mapadayon na ro anang mayad nga relasyon kay Jehova.—Basaha ro 1 Pedro 3:7.

2. Ano ro ginahambae it Biblia sa mga asawang bayi?

Ro Bisaea it Dyos hay nagahambae nga “dapat magtahod sa anang asawa” ro mga asawang bayi. (Efeso 5:33) Paano na ron maobra? Pwede nang isipon ro manami nga mga ugali ag mga pagtinguha it anang asawa agud diparahon imaw ag ro andang mga unga. Ginapakita na man nga ginatahod na imaw kon ginasuportahan na ro mga desisyon it anang asawa. Mabuot man imaw nga nagaistorya sa anang asawa ag manami nga mga bagay ro anang ginaistorya sa iba parti kana, maskin owa imaw nagasimba kay Jehova.

3. Paano mapabakud it mag-asawa ro andang relasyon?

Nagahambae ro Biblia parti sa mag-asawa: “Sanda nga daywa manginsambato.” (Mateo 19:5) Buot hambaeon, dapat nanda likawan ro mga bagay nga makapaeayo it andang buot sa kada isaea. Maobra nanda ron kon pirme sandang magkaibahan ag mapinalanggaon nanda nga ginasugid ro andang ginaisip ag ginabatyag sa kada isaea. Euwas kay Jehova, owa eon it mas importante pa kanda kundi ro andang asawa. Ginalikawan man nanda nga mangin sobrang eapit sa iba.

 TUN-I PA GID

4. Mga asawang eaki—palanggaa ag diparaha ro inyong asawa

5. Mga asawang bayi—palanggaa ag respetuha ro inyong asawa

Ginapalig-on it Biblia ro mga asawang bayi nga respetuhon ro andang asawa, alagad man imaw ni Jehova o bukon. Basaha ro 1 Pedro 3:1, 2, ag talakaya rayon rayang mga pangutana:

• Kon ro imong asawa hay buko’t saksi, sigurado nga gusto mo gid nga simbahon man nana si Jehova. Kon kimo, ano ro mas mayad nga obrahon—ro pag-istorya pirme kana parti sa Biblia o ro pagpakita it mayad nga paggawi ag pagrespeto kana? Ham-an?

Makaobra it mayad nga mga desisyon ro mag-asawa. Pero kon amat basi indi magsugot ro asawang bayi sa desisyon it anang asawa.  Pwede nang mahambae sa kalmado ag matinahuron nga paagi ro anang ginaisip. Pero dapat nang tandaan nga gintaw-an ni Jehova it responsibilidad ro anang asawang eaki agud magdesisyon kon ano ro mayad sa andang pamilya. Dapat na obrahon ro tanan agud suportahan ro desisyon it anang asawa. Kon obrahon na ra makabulig imaw agud mangin masadya ro andang pamilya. Basaha ro 1 Pedro 3:3-5, ag talakaya rayon rayang pangutana:

• Ano ro mabatyagan ni Jehova kon respetuhon it asawang bayi ro anang asawa?

6. Matakuran ninyo ro mga problema sa inyong pag-asawa

 SUMARYO

Mangin masadya ro mag-asawa kon ginapalangga nanda ro kada isaea, ginarespeto ro kada isaea, ag ginasunod ro mga prinsipyo it Biblia.

Review

• Ano ro obrahon it asawang eaki agud mangin masadya ro andang relasyon?

• Ano ro obrahon it asawang bayi agud mangin masadya ro andang relasyon?

• Kon may asawa ka, anong mga prinsipyo sa Biblia ro makabulig agud mangin mabakud ro inyong relasyon?