LEKSYON 50
Paano Mangin Masadya ro Imong Pamilya?—Parte 2
Regalo halin kay Jehova ro mga unga. Gusto na nga diparahon it mayad ku mga ginikanan rayang regalo. Nagtao si Jehova it giya agud mabuligan ro mga ginikanan nga maobra ra. Makabulig man ro anang eaygay sa mga unga nga makaamot nga mangin masadya ro andang pamilya.
1. Ano nga bulig ro gintao ni Jehova sa mga ginikanan?
Gusto ni Jehova nga palanggaon it mga ginikanan ro andang mga unga ag kon posible magtao sanda it oras kanda. Gusto na man nga protektahan it mga ginikanan ro andang mga unga ag gamiton ro mga prinsipyo sa Biblia sa pagturo kanda. (Hulubaton 1:8) Ginhambae na sa mga tatay: ‘Pabahuea ninyo ro inyong mga unga sa paggiya ni Jehova.’ (Basaha ro Efeso 6:4, NWT.) Nasadyahan si Jehova kon sundon it mga ginikanan ro anang giya parti sa pagpabahoe it mga unga ag kon indi nanda ipasa sa iba ro andang responsibilidad.
2. Ano nga bulig ro gintao ni Jehova sa mga unga?
Ginsugo ni Jehova ro mga unga: “Tumana gid ro inyong mga ginikanan.” (Basaha ro Colosas 3:20.) Kon respetuhon ag tumanon it mga unga ro andang ginikanan, mapasadya nanda si Jehova ag ro andang ginikanan. (Hulubaton 23:22-25) Nagtao it mayad nga halimbawa si Jesus kat unga pa imaw. Maskin perpekto imaw, gintuman ag ginrespeto na ro anang buko’t perpekto nga ginikanan.—Lucas 2:51, 52.
3. Paano kamo mangin maeapit sa Dyos bilang pamilya?
Kon ginikanan ka, sigurado gid nga gusto mo man palanggaon it ing mga unga si Jehova. Paano mo ra maobra? Paagi sa pagsunod sa ginahambae it Biblia: “Itanom ninyo [ro bisaea ni Jehova] sa painu-ino it inyong mga unga ag ihambae ninyo ra kanda kon nagapungko kamo sa inyong baeay ag kon nagatikang kamo sa daean.” (Deuteronomio 6:7) Ro termino nga “itanom” hay nagakahueogan it pauman-uman nga pagturo. Ngani, dapat pauman-uman mo nga ihambae ra sa ing mga unga agud matandaan nanda ra. Rayang teksto nagakahueogan nga dapat mag-usoy ka it tsansa para regular nga maistorya ing mga unga parti kay Jehova. Ngani manami gid nga mag-iskedyul it pagtuon sa Biblia ro bilog nga pamilya kada domingo. Kon owa kamo it unga, makabenepisyo man gihapon kamo kon tun-an ninyo ro Bisaea it Dyos kada domingo.
TUN-I PA GID
Tun-i ro praktikal nga mga paagi nga makabulig sa pamilya nga makabatyag it kasadya ag seguridad.
4. Tur-i ing mga unga sa mapinalanggaon nga paagi
Buko’t maeumo magturo sa unga. Paano makabulig ro Biblia? Basaha ro Santiago 1:19, 20, ag talakaya rayon rayang mga pangutana:
-
Paano mapakita it mga ginikanan ro pagpalangga kon nagaistorya sa andang mga unga?
-
Ham-an indi dapat magdisiplina ro ginikanan sa andang mga unga kon akig sanda? a
5. Protektahi ing mga unga
Para maprotektahan ing mga unga, importante gid nga istoryahon mo ro kada isaea kanda parti sa sex. Pero, basi bukon ka it komportable nga iistorya ra kanda. Tan-awa ro VIDEO, ag talakaya rayon rayang mga pangutana.
-
Ham-an nalisdan ro ibang mga ginikanan nga istoryahon ro andang mga unga parti sa sex?
-
Sa anong mga paagi ginpaathag it mga ginikanan sa andang mga unga ro parti sa sex?
Base sa ginhula, ro maeain nga kalibutan ni Satanas hay magaeain pa gid. Basaha ro 2 Timoteo 3:1, 13, ag talakaya rayon rayang pangutana:
-
Ro pila sa maeain nga mga tawo nga gintukoy sa bersikulo 13 hay nagapang-abuso sa mga unga. Ngani, ham-an importante nga tur-an it mga ginikanan ro andang mga unga parti sa sex ag paano nanda maprotektahan ro andang sarili sa mga nagapang-abuso?
Sayod mo baea?
Nag-obra it abung mga publikasyon ro mga Saksi ni Jehova agud buligan ro mga ginikanan nga tur-an ro andang mga unga parti sa sex ag kon paano nanda ra maprotektahan sa mga nagapang-abuso. Halimbawa, tan-awa ro:
-
Protektahi Ing mga Unga (video)
-
“Tur-i Ing mga Unga Parti sa Sex” (Awake! No. 5 2016)
6. Respetuha ing mga ginikanan
Mapakita it mga unga ag mga tin-edyer ro andang pagrespeto sa andang ginikanan sa paagi it pag-istorya kanda. Tan-awa ro VIDEO, ag talakaya rayon rayang mga pangutana.
-
Kon nagaistorya ro tin-edyer sa andang ginikanan, ham-an mayad gid nga magpakita sanda it pagrespeto?
-
Paano istoryahon it tin-edyer ro anang ginikanan nga may pagrespeto?
Basaha ro Hulubaton 1:8, ag talakaya rayon rayang pangutana:
-
Ano dapat ro mangin reaksyon it sangka tin-edyer kon tur-an imaw it anang mga ginikanan kon ano ro anang obrahon?
7. Simbaha si Jehova bilang pamilya
Ro pamilya it mga Saksi ni Jehova hay nagaiskedyul kada domingo agud dungan nga simbahon si Jehova. Paano nanda ra obrahon? Tan-awa ro VIDEO, ag talakaya rayon rayang mga pangutana.
-
Paano mangin regular ro Pangpamilya nga Pagsimba it pamilya?
-
Ano ro obrahon it mga ginikanan agud mangin praktikal ag masadya ro andang pangpamilya nga pagsimba?—Tan-awa ro piktyur sa umpisa it rayang leksyon.
-
Ham-an malisud kon amat sa inyong pamilya nga magtuon it dungan?
Sa Israel kato, gusto ni Jehova nga mag-istorya pirme ro pamilya parti sa Kasueatan. Basaha ro Deuteronomio 6:6, 7, ag talakaya rayon rayang pangutana:
-
Paano mo masunod rayang prinsipyo?
Mga pwedeng obrahon sa pangpamilya nga pagsimba:
-
Handai ro mga miting sa kongregasyon.
-
Basaha ag talakaya ro mga istorya sa Biblia nga ma-enjoy it inyong pamilya.
-
Kon may maisot ka nga unga, mag-download o mag-print it mga hilimuon para sa kabataan sa jw.org.
-
Kon may tin-edyer ka nga unga, talakaya ninyo ro mga artikulo para sa mga tin-edyer sa jw.org.
-
Idrama-drama ro mga istorya sa Biblia kaibahan ing mga unga.
-
Tan-awa ag talakaya ro mga video sa jw.org.
KON MAY MAGHAMBAE: “Indi ngani maeubtan it mga magueang ro Biblia, mga unga pa kaya.”
-
Ano ing isabat?
SUMARYO
Gusto ni Jehova nga palanggaon, tur-an, ag protektahan it mga ginikanan ro andang mga unga; respetuhon ag tumanon it mga unga ro andang mga ginikanan; ag dungan imaw nga simbahon it mga pamilya.
Review
-
Paano tur-an ag protektahan it mga ginikanan ro andang mga unga?
-
Paano respetuhon it mga unga ro andang mga ginikanan?
-
Ano ro mga benepisyo kon may pangpamilya nga pagsimba kada domingo ro inyong pamilya?
SAYURA
Ano ro mga leksyon nga dapat matun-an it ing mga unga nga makabulig kanda kon mangin adulto eon sanda?
“Anom ka Leksion nga Dapat Matun-an sang Kabataan” (Magmata! Num. 2 2019)
Sayura ro mga praktikal nga bulig nga ginatao it Biblia para sa mga nagadipara sa andang magueang eon nga ginikanan.
Tan-awa kon paano ro eaki nga indi anay kaantigo magpabahoe it unga hay nangin mayad eon nga tatay.
Gintur-an Ako ni Jehova kon Paano Pabahueon Ang mga Unga (5:58)
Tan-awa kon paano mapabakud it tatay ro anang relasyon sa anang mga unga nga eaki.
a Sa Biblia, ro “disiplina” hay nagatukoy sa pagturo, paggiya, ag pagtadlong. Bukon ra it pag-abuso o pagpamintas.—Hulubaton 4:1.
