Kada isaea katon hay may nanamian nga eambong ag may iba-ibang paagi sa pag-ayos. Kon sundon naton ro pila sa mga prinsipyo sa Biblia, mapakita naton ro atong gustong suksukon ag mapasadya pa naton si Jehova. Talakayon naton ro pila sa rayang mga prinsipyo.

1. Ano nga mga prinsipyo parti sa pang-eambong ag pagpang-ayos ro makabulig katon?

Dapat kita “magmaugdang sa [atong] pagbesti nga nagakaigo” ag may mayad nga painu-ino, ag magpabilin nga malimpyo agud makita katon ro ‘pagkadyosnon.’ (1 Timoteo 2:9, 10) Talakayon naton ro ap-at nga mga prinsipyo: (1) Ro atong eambong hay dapat “nagakaigo.” Sa imong haobserbahan sa mga miting sa kongregasyon, ro mga nagaalagad kay Jehova hay may iba-ibang estilo it pang-eambong, pero ro among pang-eambong hay nagapakita nga ginarespeto namon ro among Dyos nga ginasimba. (2) Ro pagsuksok it “maugdang” hay nagakahueogan nga ro atong pang-eambong hay indi dapat makapukaw it sekswal nga baeatyagon, o makabuoe it sobrang atensyon it iba. (3) Mapakita naton ro mayad nga painu-ino kon indi kita magsunod sa kada uso nga estilo it pang-eambong. (4) Dapat mapakita sa atong pang-eambong ro ‘pagkadyosnon,’ agud makita man it iba nga ginasimba naton ro matuod nga Dyos.—1 Corinto 10:31.

2. Paano ro atong pang-eambong makaapekto sa atong mga igmanghod sa kongregasyon?

Maskin pagusto kita sa kon ano ro atong ginasuksok, dapat gihapon natong isipon ro mangin epekto kara sa iba. Ginatinguhaan gid naton nga indi mapasandad ro iba, kundi “taw-an naton it kalipayan ro atong isigkatawo kon ikamayad nana, agud nga mapalig-on naton imaw.”—Basaha ro Roma 15:1, 2.

3. Paano ro atong pang-eambong makaengganyo sa iba sa matuod nga pagsimba?

Ginatinguhaan naton nga magsuksok it nagakabagay sa okasyon, mas eabi eon gid kon naga-attend kita it miting sa kongregasyon ag kon naga-preaching. Owa kita naila nga ro atong pang-eambong hay mag-agaw it andang atensyon imbes nga sa ginadaea natong mensahe. Kundi, maengganyo kara ro iba sa kamatuoran ag “mapadunggan pa gid nanda ro pagtueon-an nahanungod sa Dyos nga atong Manog-euwas.”—Tito 2:10.

 TUN-I PA GID

4. Ro presentable nga pagpang-ayos hay nagapakita it pagrespeto kay Jehova

Ham-an importante gid nga presentable ro atong pagpang-ayos? Basaha ro Salmo 47:2, ag talakaya rayon rayang mga pangutana:

• Tungod ginasimba naton si Jehova, paano kita dapat magpili it eambong?

• Kon kimo, importante baea ro atong pang-ayos ag pang-eambong kon naga-attend it miting sa kongregasyon ag kon naga-preaching? Ham-an ruyon ing sabat?

 5. Kon paano kita makaobra it mayad nga desisyon parti sa pang-eambong

Tan-awa ro VIDEO.

Mahae man o barato ro atong eambong, dapat ra nga malimpyo ag nagakabagay sa tanan nga sitwasyon. Basaha ro 1 Corinto 10:24 ag 1 Timoteo 2:9, 10. Talakaya rayon kon ham-an gusto natong likawan ro pagsuksok it eambong nga . . .

• mahigko o sobrang kaswal.

• sobrang fit, nagapakita-kita it eawas, o nagapukaw it sekswal nga baeatyagon.

Maskin owa eon nagasunod ro mga Cristyano sa Mosaikong Kasugoan, may matun-an gihapon sanda parti sa kaisipan ni Jehova. Basaha ro Deuteronomio 22:5, ag talakaya rayon rayang pangutana:

• Ham-an dapat naton likawan ro pang-eambong ag pag-ayos nga ro eaki hay matsa bayi ag ro bayi hay matsa eaki?

Basaha ro 1 Corinto 10:32, 33 ag 1 Juan 2:15, 16, ag talakaya rayon rayang mga pangutana:

• Ham-an dapat mong isipon kon ro imong pang-eambong hay makapasandad sa inyong lugar o sa kongregasyon?

• Ano nga klasi it pang-eambong ro uso sa inyong lugar?

• Kon kimo, ruyon baea nga klasi it pang-eambong hay nagakabagay sa mga Cristyano? Ham-an ruyon ing sabat?

 SUMARYO

Kon mag-obra kita it mayad nga desisyon parti sa atong pang-eambong, mapakita naton ro pagrespeto kay Jehova ag sa iba.

Review

• Ham-an it importante kay Jehova ro atong pang-eambong?

• Ano ro mga prinsipyo nga makabulig katon nga makaobra it mayad nga desisyon parti sa atong pang-eambong?

• Paano ro atong pang-eambong makaapekto sa pagtan-aw it iba sa atong pagsimba?