Maskin palangga mo gid si Jehova ag ginalikawan mo nga mapasubo imaw, makaobra ka gihapon it saea kon amat. Pero, may mga saea nga seryoso gid. (1 Corinto 6:9, 10) Kon makaobra ka it seryoso nga saea, tandai nga palangga ka gihapon ni Jehova. Handa imaw magpatawad ag magbulig kimo.

1. Ano ro dapat natong obrahon agud patawaron kita ni Jehova?

Ro mga nagapalangga kay Jehova hay nagakasubo gid kon marealisar nanda nga nakaobra sanda it seryoso nga saea. Pero nakakita sanda it paumpaw sa promisa ni Jehova sa anang katawhan: “Maskin ro inyong mga saea hay kasingpuea it eskarlata, papution ra kapareho it nyebe.” (Isaias 1:18) Kon matuod gid ro atong paghinuesoe, patawaron gid kita ni Jehova. Paalin naton ra maobra? Nagahinuesoe gid kita sa atong mga saea, ngani ginalikawan naton ro pag-obra it maeain ag nagapangayo it kapatawaran kay Jehova. Ginatinguhaan rayon naton nga magkabuhi base sa pagsueondan ni Jehova ag nagatinguha nga bag-uhon ro maeain nga kaisipan ag mga ueobrahon.—Basaha ro Isaias 55:6, 7.

2. Paano ginagamit ni Jehova ro mga elder sa pagbulig katon kon makasaea kita?

Kon may sambato katon nga makaobra it seryoso nga saea, naghambae si Jehova nga “magtawag imaw it katigueangan [o, elder]” sa kongregasyon. (Basaha ro Santiago 5:14, 15.) Rayang ginpili nga mga eaki hay nagapalangga kay Jehova ag sa anang mga alagad. Kwalipikado sanda nga buligan kita nga mabalik ro atong manami nga relasyon kay Jehova.—Galacia 6:1.

Paano kita ginabuligan it mga elder kon makaobra kita it seryoso nga saea? Buligan kita it daywa o tatlong elder gamit ro Biblia agud ipakita kon ham-an saea ro atong gin-obra. Taw-an man nanda kita it praktikal nga mga paagi ag pagpalig-on nga makabulig katon nga indi makasaea it uman. Agud maprotektahan ro kongregasyon sa maeain nga mga impluwensya, ginapahalin it mga elder sa kongregasyon ro nakaobra it seryoso nga saea nga owa nagahinuesoe.

 TUN-I PA GID

3. Makabulig katon ro pagsugid it haobrang saea

Masakitan si Jehova kon makaobra kita it saea, ngani dapat naton ra nga isugid kana. Basaha ro Salmo 32:1-5, ag talakaya rayon rayang pangutana:

• Ham-an it mas mayad nga isugid naton kay Jehova ro atong haobrang saea imbes nga itago ra?

 4. Ginakaeuy-an ni Jehova ro mga nakaobra it saea

Kon ro nakaobra it seryoso nga saea hay indi magbaton it eaygay halin kay Jehova, pahalinon imaw sa kongregasyon ag bukon eon imaw it parte kara, indi eon man kita makig-iba kana. Basaha ro 1 Corinto 5:6, 11, ag talakaya rayon rayang pangutana:

• Kapareho it lebadora o yeast nga nagapaalsa sa tinapay, paano ro pagpakig-ibea sa owa nagahinuesoe makaimpluwensya sa kongregasyon?

Paalin ginapakita ni Jehova nga tama, maeueuy-on, ag mapinalanggaon imaw sa mga nakaobra it saea?

 SUMARYO

Kon makaobra kita it seryoso nga saea pero ginahinuesoean ra ag determinado nga punduhon ro atong ginaobra nga maeain, patawaron kita ni Jehova.

Review

• Ham-an it mayad nga isugid naton kay Jehova ro atong mga saea?

• Ano ro atong obrahon para mapatawad kita?

• Kon makaobra kita it seryoso nga saea, ham-an dapat kita magpabulig sa mga elder?