Sa pagtuon it rayang libro, abu eon ing hatun-an parti kay Jehova. Nakabulig ra kimo nga palanggaon pa gid imaw ag idedikar ing sarili kana ag magpabautismo. Kon owa pa, basi nagaplano ka eon nga obrahon ra sa indi magbuhay. Pagkatapos it bautismo, padayon mo gihapon nga tinguhaan nga mangin maeapit kay Jehova ag pwede mo ra maobra sa owa’t katapusan. Paano?

1. Ham-an dapat padayon mong pabakuron ing relasyon kay Jehova?

Ginatinguhaan gid naton nga padayon nga pabakuron ro atong relasyon kay Jehova. Ham-an? “Agud indi kita magtaeang” paeayo kana. (Hebreo 2:1) Ano ro makabulig katon agud padayon nga mangin matutom kay Jehova? Mangin masako kita sa pag-preaching ag mag-usoy it iba pa nga paagi nga makaalagad sa Dyos. (Basaha ro Filipos 3:16.) Ro pag-alagad kay Jehova hay ro pinakamanami nga obrahon sa kabuhi!—Salmo 84:10.

2. Ano pa ing padayon nga obrahon?

Maskin patapos eon ing pagtuon sa rayang libro, ro imong kabuhi bilang Cristyano hay magapadayon. Nagahambae ro Biblia nga dapat “isuk-eob ninyo ro bag-o nga kinaugali [o personalidad].” (Efeso 4:23, 24) Habang padayon mo nga ginatun-an ro Bisaea it Dyos ag naga-attend it miting sa kongregasyon, matun-an mo ro iba pang mga bagay parti kay Jehova ag sa anang mga ugali. Mag-usoy it paagi nga matuead mo it mayad ro anang mga ugali. Padayon nga mag-obra it mga pagbag-o kon kinahang-ean agud mapasadya si Jehova.

3. Paano ka buligan ni Jehova nga mag-uswag?

Nagahambae ro Biblia: “Ro Dyos . . . magahimpit ag magatao kinyo it kalig-on, kusog ag mapag-on nga sadsaran.” (1 Pedro 5:10) Tanan kita hay pwede matentar nga mag-obra it saea. Pero taw-an kita ni Jehova it atong mga kinahang-eanon agud masuk-ean ra. (Salmo 139:23, 24) Nagpromisa imaw nga taw-an na kita it handum ag kusog nga maalagad imaw it matutom.—Basaha ro Filipos 2:13.

 TUN-I PA GID

4. Padayon nga mag-istorya ag magpamati sa ing pinakamayad nga Amigo

Makabulig kimo ro pangamuyo ag pagtuon it Biblia agud mangin amigo ni Jehova. Paano ron makabulig kimo nga mangin mas maeapit pa kana?

Basaha ro Salmo 62:8, ag talakaya rayon rayang pangutana:

• Agud mangin mabakud ing relasyon kay Jehova, paano mo mapauswag ro imong pangamuyo?

Basaha ro Salmo 1:2 ag footnote, ag talakaya rayon rayang pangutana:

• Agud mangin mabakud ing relasyon kay Jehova, paano mo mapauswag ro imong pagbasa it Biblia?

Paano ka makabenepisyo it mayad sa ing personal nga pagtuon? Agud makita ro pila nga ideya, tan-awa ro VIDEO, ag talakaya rayon rayang mga pangutana.

• Sa video, alin ro mga paagi nga gusto mong obrahon?

• Ano ro mga topiko nga gusto mong tun-an?

 SUMARYO

Padayon nga pabakura ing relasyon kay Jehova ag mag-obra it espiritwal nga mga goal para mangin masadya ing kabuhi makaron ag sa owa’t katapusan!

Review

• Ham-an sigurado ka gid nga buligan ka ni Jehova nga mangin matutom kana?

• Paano mo mapabakud ing relasyon kay Jehova?

• Paano ro pag-obra it espiritwal nga mga goal makabulig kimo nga mag-uswag?