Ro Ginharian it Dyos hay eangitnon nga gobyerno. Daya ro magabueos sa paggobyerno it tawo. Gamiton ra it Dyos agod pahanabuon ro anang kabubut-on sa eangit ag sa eugta. Mayad ra nga balita halin sa Dyos. Itao it Ginharian it Dyos ro paggahom nga gusto gid it mga tawo. Paagi kara, matingob ro mga tawo sa eugta.—Basaha ro Lucas 1:33; Mateo 6:9, 10; 24:14.

Kinahangean nga may hari ro ginharian. Gintangdo ni Jehova ro anang Unga nga si Jesu-Cristo nga mangin Hari it anang Ginharian.—Basaha ro Pahayag 11:15.

Mabuot nga Hari si Jesus ag gapanindugan gid sa kon ano ro tama. (Juan 1:14) May gahom man imaw nga buligan ro mga tawo tungod magahari imaw sa eugta halin sa eangit. Pagkabanhaw kana, nagsaka imaw sa eangit ag nagpungko sa tuo it Dyos agod maghueat. (Hebreo 10:12, 13) Ku ulihi, gintaw-an imaw ku Dyos it awtoridad nga mag-umpisa sa paggahom.—Basaha ro Lucas 1:32, 33.

Ro grupo nga ginatawag “mga baeaan” ro mangin kaibahan ni Jesus sa eangit nga magagahom. (Daniel 7:27, New World Translation of the Holy Scriptures) Ro una nga mga baeaan nga ginpili hay ro mga matutom nga apostoles ni Jesus. Padayon nga gapili si Jehova it matutom nga mga  eaeaki ag babayi bilang mga baeaan. Pareho ni Jesus, banhawon sanda bilang mga espiritu.—Basaha ro Juan 14:1-3; 1 Corinto 15:42-44.

Pila ro maagto sa eangit? Gintawag sanda ni Jesus nga “maisot nga panong.” (Lucas 12:32) May kaabuon sanda nga 144,000. Sanda ro kaibahan ni Jesus nga magahom sa eugta.—Basaha ro Pahayag 14:1.

Nag-umpisa sa paggahom ro Ginharian it Dyos ku 1914. * Ro una nga gin-obra ni Jesus bilang Hari hay ro paghaboy kay Satanas ag sa anang mga demonyo sa eugta. Grabe gid ro kaakig ni Satanas ag nagtao imaw it problema sa eugta. (Pahayag 12:7-10, 12) Umpisa kato, naggrabe gid ro problema it mga tawo. Ro inaway, gutom, epidemya, ag mga linog hay “tanda” nga magahom eon gid ro Ginharian sa eugta.—Basaha ro Lucas 21:7, 10, 11, 31.

Ro pagbantala sa bilog nga kalibutan nagahiusa sa kaabu nga mga tawo halin sa tanan nga nasyon. Minilyon nga mga mabuot nga tawo ro nagapasakop sa paggahom ni Jesus. Protektahan sanda it Ginharian it Dyos kon laglagon ro presente nga maeain nga sistema it mga butang sa eugta. Ngani kinahangean nga mangin matinumanon ro tanan nga gusto makabenepisyo sa Ginharian it Dyos.—Basaha ro Pahayag 7:9, 14, 16, 17.

Sa sueod it 1,000 ka dag-on, obrahon ku Ginharian ro orihinal nga katuyuan it Dyos sa mga tawo. Mangin paraiso ro bilog nga eugta. Sa ulihi, ibalik ni Jesus ro Ginharian sa anang Ama. (1 Corinto 15:24-26) Ikaw, kanyo mo gusto isugid ro Ginharian it Dyos?—Basaha ro Salmo 37:10, 11, 29