Gusto it Dyos nga magkalipay ro mga tawo iya sa eugta. Gintuga na ro eugta ag ro tanan nga una kara tungod palangga na ro mga tawo. Sa indi magbuhay, taw-an na it mayad nga paeaabuton ro mga tawo. Dueaon na ro pag-antos iya sa eugta.—Basaha ro Jeremias 29:11.

Owa it gobyerno it tawo ro nakaduea sa kaeainan, baeatian, o kamatayon. Pero may mayad nga balita. Sa indi magbuhay, islan it gobyerno it Dyos ro tanan nga gobyerno it tawo. Ro tanan nga sakop kara hay makatigayon it kalinong ag mayad nga pang-eawas.—Basaha ro Pahayag 11:15; 21:3, 4.

Maduea eang ro pag-antos kon dueaon it Dyos ro mga maeain nga tawo iya sa eugta. (Sofonias 2:3) Hin-uno ra matabo? Nakasueat eagi sa Biblia ro malisod nga kahimtangan nga nagakatabo makaron. Pamatuod eang ra nga maeapit eon maghueag ro Dyos.—Basaha ro 2 Timoteo 3:1-5.

Kinahangean naton makilaea ro Dyos paagi sa anang Bisaea, ro Biblia. Parehas ra it sueat halin sa mahigugmaon nga ama. Ginasugid kara kon paano matigayon ro malipayon nga kabuhi makaron ag ro kabuhi nga owa’t katapusan sa paeaabuton. May iba nga owa naila nga gatuon ka it Biblia. Pero kon mag-ungkat ka, maduea mo ro manami gid nga paeaabuton.—Basaha ro Mateo 5:10-12; Pahayag 14:6, 7.