Nag-umpisa ro kaeainan kat nagpinuril si Satanas. Ku una, perpektong anghel si Satanas, pero “owa imaw nagpabilin nga malig-on sa kamatuoran.” (Juan 8:44, New World Translation of the Holy Scriptures) Ginhandom na ro pagsimba nga dapat itao eang sa Dyos. Nagpinuril si Satanas sa una nga babayi nga si Eba, ag ginsueay na nga tumanon imaw imbes ro Dyos. Owa man nagtuman si Adan sa Dyos. Ro desisyon ni Adan nagresulta it kaeainan ag kamatayon.—Basaha ro Genesis 3:1-6, 19.

Kat ginsueay ni Satanas si Eba nga indi magtuman sa Dyos, gin-umpisahan na ro pagrebelde sa soberanya it Dyos, o posisyon bilang Eabing Mataas. Nagsuporta kay Satanas ro kaeabanan nga mga tawo ag ginsikway ro Dyos bilang andang Manuggahom. Ngani si Satanas ro “nagagahum it rayang kalibutan.”—Basaha ro Juan 14:30; 1 Juan 5:19.

Perpekto ro tanan nga gintuga it Dyos. Gintuga ku Dyos ro mga tawo ag mga anghel nga may ikasarang nga magtuman kana it bug-os. (Deuteronomio 32:4, 5) Gintuga kita it Dyos nga may kahilwayan sa pagpili kon mag-obra kita it mayad o maeain. Tungod sa ruyon nga kahilwayan mapakita naton ro atong pagpalangga sa Dyos.—Basaha ro Santiago 1:13-15; 1 Juan 5:3.

Ginapasugtan anay ni Jehova ro pagrebelde sa anang pagkasoberano. Ham-an? Agod pamatud-an nga owa it mayad nga matabo sa paggahom it mga tawo. (Manugwali 7:29; 8:9) Pagkatapos it  6,000 ka dag-on nga kasaysayan ku tawo, makita gid ro ebidensya. Owa gid nagmadinaeag-on ro mga manuggahom nga tawo nga dueaon ro inaway, krimen, inhustisya, o baeatian.—Basaha ro Roma 9:17.

Pero makabenepisyo gid ratong mga nagabaton sa Dyos bilang manuggahom. (Isaias 48:17, 18) Sa indi magbuhay, tapuson ni Jehova ro tanan nga paggobyerno it tawo. Ratong mga tawo eang nga ginpili ro paggahom it Dyos ro magapabilin sa eugta.—Isaias 11:9.—Basaha ro Pahayag 11:15.

Si Satanas naghambae nga owa it tawo nga magaalagad sa Dyos it matutom. Gusto mo baea pamatud-an nga saea imaw? Maobra mo gid ron! Ro pagkamapinasensiyahon it Dyos nagatao katon it kahigayunan nga magpili sa paggahom it Dyos o paggahom it tawo. Makita sa atong pagkabuhi kon ano ro atong ginpili.—Basaha ro Job 1:8-12; Hulubaton 27:11.

Ginapili naton ro Dyos bilang aton Manuggahom kon ginasimba naton imaw sa paagi nga ginaturo ku anang Bisaea, ro Biblia. (Juan 4:23) Pareho ni Jesus, mapakita naton nga ginasikway naton ro paggahom ni Satanas kon indi kita mag-intra sa politika ag inaway.—Basaha ro Juan 17:14.

Ginagamit ni Satanas ra gahom agod ipaeapnag ro imoralidad ag maeain nga mga ueobrahon. Kon sikwayon naton ron, basi kon pakaeainon kita o kontrahon ku atong mga amigo ag igbata. (1 Pedro 4:3, 4) Ngani kinahangean naton magpili. Maiba baea kita sa mga tawo nga nagapalangga sa Dyos? Aton baea sundon ro anang maaeamon ag mapinalanggaon nga mga kasugoan? Kon obrahon naton ron, mapamatud-an naton nga purilon gid si Satanas kat ginhambae na nga owa it tawo nga magatuman sa Dyos kon ginahingabot.—Basaha ro 1 Corinto 6:9, 10; 15:33.

Ro pagpalangga ku Dyos sa mga tawo pamatuod nga maduea ro kaeainan ag pag-antos. Ro nagatuo kara hay mabuhi it dayon sa paraiso nga eugta.—Basaha ro Juan 3:16.