Mas maaeam katon ro atong Manogtuga. Bilang mapinalanggaon nga Ama, nagakabaeaka imaw katon. Gintuga na kita para magpasakop kana. (Jeremias 10:23) Ngani pareho ku unga nga gakinahangean it pagtuytoy ku ginikanan, kinahangean man naton it pagtuytoy halin sa Dyos. (Isaias 48:17, 18) Ro mga prinsipyo it Biblia nga gatuytoy katon hay regalo halin sa Dyos.—Basaha ro 2 Timoteo 3:16.

Ro mga kasugoan ag prinsipyo ni Jehova hay nagaturo it pinakamayad nga paagi it pagkabuhi makaron ag kon paano maagom ro dayon nga padya sa paeaabuton. Tungod gintuga kita it Dyos, dapat eang nga tumanon naton ro anang mga kasugoan.—Basaha ro Salmo 19:7, 11; Pahayag 4:10.

Ro prinsipyo it Biblia hay basehan nga mga kamatuoran. Ro mga kasugoan mat-a hay ginagamit sa espisipiko nga mga sitwasyon. (Deuteronomio 22:8) Kinahangean nga gamiton naton ro atong paghantop kon paano iaplikar ro mga prinsipyo sa partikular nga sitwasyon. (Hulubaton 2:10-12) Halimbawa, ginaturo it Biblia nga ro kabuhi regalo halin sa Dyos. Ruyon nga prinsipyo gapadumdom katon nga maghaeong kita sa ueobrahan, sa baeay, ag kon gabyahe.—Basaha ro Binuhatan 17:28.

Naghambae si Jesus parti sa daywa ka importante nga mga prinsipyo. Ro una nagasugid nahanungod sa katuyuan it  kabuhi—kilaeahon ro Dyos, palanggaon imaw, ag matutom imaw nga alagaron. Kinahangean naton ra isipon kon gadesisyon kita. (Hulubaton 3:6) Ro nagakabuhi suno sa prinsipyo ngara hay mangin amigo ku Dyos, mangin malipayon ag mabuhi it owa’t katapusan.—Basaha ro Mateo 22:36-38.

Ro pangaywa nga prinsipyo gabulig katon agod mangin manami ro atong relasyon sa iba. (1 Corinto 13:4-7) Kon sundon naton ra, ginatuead naton ro paagi ku Dyos sa pagpakig-angot sa mga tawo.—Basaha ro Mateo 7:12; 22:39, 40.

Nagaturo ro mga prinsipyo it Biblia sa mga pamilya kon paano sanda mahiusa sa gugma. (Colosas 3:12-14) Proteksyon man ro Biblia sa mga pamilya tungod sa isaea pa gid ka prinsipyo—ro pag-asawa kinahangean mangin permanente.—Basaha ro Marcos 10:7-9.

Ro pagsunod sa mga prinsipyo it Biblia makabulig katon sa materyal ag emosyonal. Halimbawa, mas ginapili it mga kompanya ro mga trabahador nga tampad ag mahugod. (Hulubaton 10:4, 26; Hebreo 13:18) Nagaturo man ro Biblia nga mangin kontento ag pabaloran gid ro atong relasyon sa Dyos.—Basaha ro Mateo 6:24, 25, 33; 1 Timoteo 6:8-10.

Ro pagsunod sa mga prinsipyo it Biblia proteksyon sa atong pang-eawas. (Hulubaton 14:30; 22:24, 25) Halimbawa, malikawan naton ro mga sakit ag aksidente kon sundon naton ro sugo it Dyos nga indi magpahilong. (Hulubaton 23:20) Ginasugtan kita ni Jehova nga mag-inom it mga alkoholiko nga mga ilimnon pero dapat hagan-hagan eang. (Salmo 104:15; 1 Corinto 6:10) Ro mga prinsipyo it Dyos magabulig katon nga bantayan ro atong ginaobra ag ro atong ginapainu-ino. (Salmo 119:97-100) Pero, ginarespeto ku matuod nga mga Kristyano ro prinsipyo it Dyos indi eang para makabenepisyo sanda kundi agod padunggan si Jehova.—Basaha ro Mateo 5:14-16.