NALISDAN ka baea nga tun-an it regular ro Biblia? Pamatyag mo baea kon amat hay boring ro pagtuon? Posibleng nabatyagan man naton ra tanan. Pero isipa ro mga bagay nga ginaobra naton it regular, pareho it pagpaligos. Ro pagpaligos hay nagakinahang-ean it oras ag pagtinguha, pero kanami gid ro atong pamatyag kon nakapaligos eon! Ro pagtuon man sa Biblia hay kapareho it makarepresko nga “tubi, ro bisaea it Dyos.” (Efe. 5:​26, NWT) Sayura ro pila nga mga suhistyon nga makabulig kimo:

• Mag-obra it iskedyul. Ro personal nga pagtuon sa Biblia hay “eabing mahaega [o, importante] nga bagay” nga indi dapat pagpabay-an it sangka Cristyano. (Fil. 1:10) Para mabuligan ka nga masunod ing iskedyul, ibutang ra sa lugar nga madali makita, pareho it bulletin board o ipagkit sa ref. O basi makabulig man kimo ro pag-set it alarm sa ing selpon bago magtuon.

• Magpili it oras ag paagi nga makapukos ka. Mas makapukos ka baea kon mahaba ing oras sa pagtuon o gusto mo nga matag-od eang? Ikaw ro nakasayod sa ing sitwasyon. Ngani, planuha kon mauno’t haba ing pagtuon base sa ing makaya. Kon pamatyag mo hay owa ka it gana magtuon sa ginpili mo nga oras, tinguhai nga magtuon maskin pueong minuto eang. Maskin matag-od eang nga oras ing pagtuon, may matun-an ka gihapon kaysa owa ka gid nagtuon. Ag kon nakaumpisa ka eon, posibleng ganahan ka nga magpadayon.​—Fil. 2:13.

• Magpili eagi it topiko nga gusto mong tun-an. Kon nagapili ka pa eang it ing pagatun-an sa oras it ing pagtuon, posible nga owa mo “ginagamit it mayad ro [imong] oras.” (Efe. 5:​16, NWT) Isueat ro mga artikulo o topiko nga gusto mong tun-an. Kon ano man ing maisipang pangutana, isueat ra. Ag sa kada matapos ing pagtuon, pwede mong idugang sa ing listahan ro iba pa nga gusto mong tun-an.

• Mag-adjust kon kinahang-ean. Kon may iskedyul ka eon, pwede mo rang ma-adjust kon kinahang-ean, pareho it kahabaon ku oras sa ing pagtuon o mga topiko nga imong ginpili. Buko’t importante kon hin-uno ka nagatuon, kon mauno’t haba, o kon ano ing pagatun-an. Kundi, ro importante hay regular ka nga nagatuon.

Makabenepisyo gid kita kon may regular kita nga pagtuon. Mangin maeapit kita kay Jehova, makaobra kita it mayad nga mga desisyon, ag mangin malig-on kita.​—Jos. 1:8.