1-2. Paalin kita tanan posibleng maapektuhan it inhustisya sa iba-ibang paagi?

 GINSUGID ni Jesus ro ilustrasyon parti sa baeo nga padayon nga nagapangayo it hustisya sa huwis. Owa’t duda nga sayod it mga disipulo ni Jesus rayang istorya dahil ku ruyong panahon ro ordinaryong mga tawo hay biktima pirme it inhustisya. (Luc. 18:​1-5) Importante man katon makaron rayang istorya dahil tanan kita hay nakaeksperyinsya it inhustisya sa iba-ibang paagi.

² Normal sa kalibutan makaron ro diskriminasyon, buko’t patas nga pagtratar, ag pagpakanaba sa iba, ngani owa eon kita nangawa kon indi kita pagtrataron it patas. (Man. 5:8) Maskin owa kita nagapaabot nga trataron kita it buko’t manami ku atong mga igmanghod, posible gid ron matabo. Syempre, buko’t manoghingabot ro atong mga igmanghod. Bukon eang sanda it perpekto. Abu kitang matun-an kay Jesus kon paalin makaya ro inhustisya halin sa maeain nga mga manoghingabot. Kon mapinasensyahon kita sa mga manoghingabot nga owa nagatratar katon it patas, dapat mangin mas mapinasensyahon kita sa atong mga isigka-tumoeuo! Ano ro ginabatyag ni Jehova kon buko’t patas ro pagtratar katon it mga igmanghod sa kongregasyon o it ibang mga tawo? Nabaeaka baea imaw katon?

3. Nagakabaeaka baea si Jehova parti sa atong pag-antus sa inhustisya, ag ham-an?

³ Nagakabaeaka gid si Jehova kon paalin kita ginatratar it iba. “Si Jehova hay mapinalanggaon sa katarungan.” (Sal. 37:28) Ginapasalig katon ni Jesus nga si Jehova hay “magaapin . . . eagi-eagi” para mabaton naton ro katarungan sa insakto nga panahon. (Luc. 18:​7, 8) Ag maeapit na eon dueaon ro tanan nga nagapaantus katon ag ro tanan nga klasi it inhustisya.​—Sal. 72:​1, 2.

4. Ano ro ginatao nga bulig ni Jehova katon makaron?

 ⁴ Habang ginahueat naton ro panahon nga magabugana ro katarungan, buligan kita ni Jehova nga makaya ro inhustisya. (2 Ped. 3:13) Ginatur-an na kita kon paalin malikawan ro pag-obra it buko’t mayad kon buko’t patas ro pagtratar katon. Paagi sa anang Unga, nagtao si Jehova it perpekto nga halimbawa kon paalin naton makaya ro inhustisya. Ag ginataw-an na kita it praktikal nga pahanumdom nga makabulig katon kon ginatratar kita it buko’t patas.

MAGHAEONG SA ING MANGIN REAKSYON SA INHUSTISYA

5. Ham-an dapat kita maghaeong sa atong mangin reaksyon sa inhustisya?

⁵ Posible nga masakitan ag magkalisud gid kita dahil sa inhustisya. (Man. 7:7) Pareho man kara ro ginbatyag it matutom nga mga alagad nga sanday Job ag Habacuc. (Job 6:​2, 3; Hab. 1:​1-3) Normal eang rayang mga baeatyagon, pero kinahang-ean natong maghaeong sa atong reaksyon agud indi kita makaobra it mga bagay nga buko’t manami.

6. Ano ro ginaturo katon it halimbawa ni Absalom? (Tan-awa man ro piktyur.)

⁶ Pwede mangin buko’t manami ro atong reaksyon sa inhustisya kon solbaron naton ra sa sarili natong paagi. Kon ruyon ro atong obrahon, pwedeng mas maglala ro sitwasyon. Tan-awon ta ro halimbawa it unga ni Haring David nga si Absalom. Naakig gid imaw kat gin-rape ro anang manghod nga si Tamar it anang igmanghod sa tatay nga si Amnon. Base sa Mosaikong Kasugoan, nagakadapat patyon si Amnon dahil sa anang gin-obra. (Lev. 20:17) Bukon man it saea nga maakig si Absalom, pero saea gid nga ginpapatay na si Amnon.​—2 Sam. 13:​20-23, 28, 29.

7. Ano ro unang reaksyon it salmista kat nakita na ro inhustisya?

⁷ Kon makita naton nga owa ginapinahan ratong mga nagaobra it inhustisya, basi maisip naton nga bukon ma’t importante nga obrahon ro tama. Naobserbahan it salmista nga matsa mas manami ro kabuhi it maeain nga mga tawo kaysa sa matarung nga mga tawo. Ginhambae na: “Raya ro mga maeain nga pirmeng hayahay ro kabuhi.” (Sal. 73:12) Naakig gid imaw sa inhustisya nga anang nakita, ag naisip na nga owa it pueos ro anang pag-alagad kay Jehova. Ginhambae na: “Kat gintinguhaan ko nga intindihon ra, nalisdan gid ako.” (Sal. 73:​14, 16) Ro matuod, gin-aku  na: “Pero ako, sangkiri eang magtaeang ro ang mga siki; sangkiri eang ako madanlog.” (Sal. 73:2) Haeos pareho man kara ro natabo sa sangka brother nga si Alberto.

8. Ano ro nangin epekto it inhustisya sa sangka brother?

⁸ Ginpabangdan si Alberto nga imaw ro nagtakaw it kwarta halin sa pondo it kongregasyon. Bilang resulta, naduea ro anang mga pribilehiyo ag respeto it kaabuan sa kongregasyon nga nakasayod parti kara. Ginhambae na: “Naakig gid ako, ag nadismaya.” Ginpasugtan na ro anang emosyon nga maapektuhan ro anang espiritwalidad, ag nangin in-active imaw sa sueod it limang dag-on. Ginapakita it rayang eksperyinsya ro pwedeng matabo kon magpadaea kita sa atong kaakig dahil sa inhustisya.

TUEARA KON PAALIN NAKAYA NI JESUS RO INHUSTISYA

9. Ano ro mga inhustisya nga gintiis ni Jesus? (Tan-awa man ro piktyur.)

⁹ Nagtao si Jesus it perpektong halimbawa kon paalin makaya ro inhustisya. Sayuron ta ro buko’t patas nga pagtratar nga anang naeksperyinsyahan halin sa anang pamilya ag sa ibang tawo. Gin-akusahan imaw ku anang buko’t tumoeuong mga paryente nga kaumangon imaw, ginhambaean man imaw ku relihiyusong  mga lider nga ro anang gahum hay halin sa mga demonyo, ag gin-insulto imaw, ginsakit, ag ku ulihi ginpatay it Romano nga mga soldado. (Mar. 3:​21, 22; 14:55; 15:​16-20, 35-37) Pero, gintiis ni Jesus raya tanan nga inhustisya ag owa gid imaw nagbaeos. Ano ro atong matun-an sa anang halimbawa?

10. Paalin nakaya ni Jesus ro inhustisya? (1 Pedro 2:​21-23)

¹⁰ Basaha ro 1 Pedro 2:​21-23. a Nagbilin si Jesus it perpektong halimbawa nga pwede natong sundon kon nagaatubang kita it inhustisya. Sayod na kon hin-uno maghipos ag kon hin-uno maghambae. (Mat. 26:​62-64) Owa imaw nagsabat sa kada saea nga akusasyon nga ginhambae parti kana. (Mat. 11:19) Kon maghambae imaw, owa na ginainsulto o ginapaeag ro mga nagahingabot kana. Hapakita ni Jesus ro pagpugong sa sarili dahil “nagsalig imaw sa Dyos, ro matarung nga Huwis.” Sayod ni Jesus nga ro pinakaimportante hay ro pagtan-aw ni Jehova sa ruyong mga bagay. Nagsalig imaw nga dueaon ni Jehova ro mga inhustisya sa insakto nga panahon.

11. Ano ro mga paagi nga makontrol naton ro atong mga ginahambae? (Tan-awa man ro piktyur.)

¹¹ Matuead naton si Jesus paagi sa pagkontrol it atong ginahambae kon buko’t patas ro pagtratar katon. Ro ibang inhustisya hay bukon man gid it seryoso, ag pwede mang paeampason. O pwede kita maghipos agud indi kita makahambae it makapalala sa sitwasyon. (Man. 3:7; Sant. 1:​19, 20) Kon amat, pwede kita maghambae kon may naobserbahan kita nga buko’t patas ro pagtratar o kinahang-ean natong apinan ro kamatuoran. (Binu. 6:​1, 2) Kon maghambae kita, dapat  tinguhaan naton nga mangin kalmado ag may respeto.​—1 Ped. 3:15. b

12. Paalin naton isalig ro atong sarili “sa Dyos, ro matarung nga Huwis”?

¹² Matuead man naton si Jesus paagi sa pagsalig it atong sarili “sa Dyos, ro matarung nga Huwis.” Kon ginahusgahan kita o ginatratar it buko’t mayad, makasalig kita nga sayod ni Jehova kon alin ro matuod. Ngani, makabulig ra katon nga matiis ro buko’t patas nga pagtratar it iba dahil sayod naton nga si Jehova eang ro makasolbar kara. Kon ginasalig naton rayang mga bagay kay Jehova, malikawan naton nga maakig o magdumot kanda. Rayang mga baeatyagon hay magatik-eud katon nga mag-obra it maeain, makaduea it atong kasadya, ag makasamad it atong relasyon kay Jehova.​—Sal. 37:8.

13. Ano ro makabulig katon para padayon nga matiis ro inhustisya?

¹³ Syempre, indi naton masunod it perpekto ro halimbawa ni Jesus. Dahil kon amat, nakakaobra kita o nakakahambae it mga bagay nga pwede natong nuoean sa ulihi. (Sant. 3:2) Ag ro pilang mga inhustisya hay pwedeng mag-aywan katon it buko’t manami nga epekto sa emosyonal ag sa pisikal, nga malisud eon dueaon sa atong kabuhi. Kon matuod ra kimo, makasigurado ka nga sayod ni Jehova ro imong mga ginaagyan. Ag sayod man ni Jesus ro imong ginabatyag dahil naeksperyinsyahan na ra. (Heb. 4:​15, 16) Euwas sa gintao nga perpektong halimbawa ni Jesus, nagtao man si Jehova it praktikal nga pahanumdom nga makabulig katon nga matiis ro inhustisya. Talakayon naton ro daywang ka bersikulo sa libro it Roma nga makabulig katon.

“ITUGYAN RAYA SA KAAKIG IT DYOS”

14. Ano ro buot hambaeon nga “itugyan raya sa kaakig it Dyos”? (Roma 12:19)

¹⁴ Basaha ro Roma 12:19. Kat ginpalig-on ni apostol Pablo ro mga Cristyano nga “itugyan raya sa kaakig it Dyos,” anyong kaakig ro anang ginatukoy? Base sa konteksto, ro ginatukoy kara hay ro kaakig ni Jehova. Ginataw-an naton it lugar ro kaakig ni Jehova paagi sa pagpasugot nga imaw ro magdesisyon kon hin-uno ag kon paalin ipatuman ro inhustisya. Kat gintratar it buko’t patas ro sangka brother nga si John, ginhambae na: “Kinahang-ean ko suk-ean ang baeatyagon nga itama ro saea sa ang sariling paagi. Nakabulig kakon ro Roma 12:19 nga maghueat kay Jehova.”

15. Ham-an mayad gid nga hueaton si Jehova sa pagsolbar it sangka bagay?

¹⁵ Makabenepisyo kita kon hueaton naton si Jehova sa pagsolbar it sangka bagay. Kon obrahon naton ron, indi kita mabug-atan ag maeuyahan sa pagtinguha nga solbaron ro problema sa atong sariling paagi. Gusto ni Jehova nga buligan kita. Matsa raya ro anang ginahambae, ‘Pabay-i kang ro inhustisya hay ako ro bahala kara.’ Kon batunon naton ro promisa ni Jehova nga “Ako ro magatimaeos ag magabaeos,” pwede natong paeampason ra, nga nagasalig nga kaya na rang solbaron sa pinakamayad nga paagi. Ag ruyon ro nakabulig kay John nga ginsambit kaina. Ginhambae na, “Kon naghueat eang ako kay Jehova, mas masolbar na gid ra kaysa kakon.”

“PADAYON NGA DAUGA RO MAEAIN PAAGI SA MAYAD”

16-17. Paalin ro pangamuyo makabulig katon nga ‘padayon nga daugon ro maeain paagi sa mayad’? (Roma 12:​21, NWT)

¹⁶ Basaha ro Roma 12:​21, NWT. Ginpalig-on man ni Pablo ro mga Cristyano nga ‘padayon  nga daugon ro maeain paagi sa mayad.’ Sa Sermon ni Jesus sa Bukid, ginhambae na nga padayon nga “higugmaa ro inyong mga kaaway, ag magpangamuyo kamo para sa mga nagahingabot kinyo.” (Mat. 5:44) Ruyon gid ro gin-obra nana. Posible nga naisip naton ro pag-antus nga gintiis ni Jesus kat gin-eansang imaw it Romano nga mga soldado sa poste. Maimadyin man naton ro kasakit nga anang ginbatyag, pati man ro pagpakahuya ag inhustisya nga anang gintiis.

¹⁷ Owa gid si Jesus nagpadaog sa inhustisya nga anang gin-antus. Imbes nga pakaeainon ratong mga soldado, nagpangamuyo imaw: “Ama, patawara sanda, ay owa sanda makasayod sa andang ginahimo.” (Luc. 23:34) Kon ginapangamuyo naton ratong nagatratar katon it buko’t mayad, makapahagan-hagan ra sa atong kaakig ag dumot, ag makapabag-o it atong pagtan-aw sa ratong nakasakit katon.

18. Paalin nakabulig ro pangamuyo kanday Alberto ag John nga makaya ro inhustisya?

¹⁸ Nakabulig ro pangamuyo sa daywang ka brother nga ginsambit kaina sa rayang artikulo agud makaya ro mga inhustisya nga andang naagyan. Naghambae si Alberto: “Ginpangamuyo ko ro mga brother nga nagtratar kakon it buko’t patas. Pilang beses ko nga ginpangabay si Jehova nga buligan ako nga kalipatan rayang inhustisya.” Makaron, masadya eon nga nagaalagad it uman si Alberto it matutom kay Jehova. Naghambae si John: “Maabung beses nga ginpangamuyo ko ro brother nga nakasakit kang. Rayang mga pangamuyo hay nakabulig kang nga mangin balanse ang pagtan-aw kana nga owa imaw ginahusgahan. Ag nagtao man ra kang it katawhay sa isip.”

19. Ano ro dapat natong obrahon hasta sa katapusan it rayang sistema? (1 Pedro 3:​8, 9)

¹⁹ Owa kita kasayod kon anong mga inhustisya ro pwede natong maatubang bago matapos rayang sistema. Ano man ro atong maagyan, indi gid kita magpundo sa pagpangamuyo kay Jehova nga buligan kita. Tuearon man naton ro nangin reaksyon ni Jesus kat buko’t mayad ro pagtratar kana it iba ag padayon nga iaplikar ro mga prinsipyo sa Biblia. Kon obrahon naton ron, makasigurado gid kita nga mabaton naton ro pagpakamayad ni Jehova.​—Basaha ro 1 Pedro 3:​8, 9.