Gusto mo baea nga makabenepisyo it mayad sa ing personal nga pagtuon? Pwede mong testingan rayang mga tip agud makapukos ka sa ing pagtuon:

• Magpili it manami nga lugar. Kon posible, mag-usoy it lugar nga buko’t makalat ag may sakto eang nga kahayag. Pwede kang magtuon sa ing desk o sa lamesa, o pwede man sa guwa nga komportable ka.

• Mag-usoy it pribado nga lugar. Ginpili ni Jesus nga magpangamuyo sa agahon nga ‘madueom dueom pa’ sa “isaeang ka malinong nga lugar.” (Mar. 1:35) Kon buko’t posible sa ing sitwasyon nga mangin isaeahanon ka, pwede mong hambaeon ing pamilya o kaibahan sa baeay nga matuon ka sa ruyong oras ag indi ka anay nanda pag-istorbuhon.

• Magpukos it mayad. Likawi ro mga pwedeng makaistorbo kimo. Kon nagagamit ka it selpon o tablet sa pagtuon, pwede mo rang i-set sa silent mode o airplane mode para indi ka maistorbo. Ag kon may naisipan ka nga kinahang-ean mong obrahon, pwede mo rang ilista anay para indi mo ra malipatan ag makapadayon ka sa pagtuon. Kon nalisdan ka magpukos, pwede ka nga magtikang-tikang anay o mag-stretching.