1-2. Ano ro naeakip sa “mayad nga ueobrahon” it sangka elder?

 KON ministeryal nga alagad ka makaron, posible nga may mga ginaobra ka eon para mangin kwalipikado nga mangin elder. Pwede mo baea tinguhaan ro “mayad nga ueobrahon”?​—1 Tim. 3:​1, NWT.

² Ano ro naeakip sa ueobrahon it sangka elder? Nagapanguna imaw sa pag-preaching, naga-shepherding ag nagaturo, ag nagapalig-on sa kongregasyon paagi sa anang ginahambae ag halimbawa. Ngani, may mayad gid nga rason kon ham-an ginatawag it Biblia ro mahugod nga mga elder bilang “regalo nga mga eaki.”​—Efe. 4:​8, NWT.

3. Paalin mangin kwalipikado ro sangka brother bilang elder? (1 Timoteo 3:​1-7, NWT; Tito 1:​5-9, NWT)

³ Paalin ka mangin kwalipikado bilang elder? Bukon eang it abilidad o skills ro kinahang-ean para mangin elder. Para mabaton ka sa sekular nga trabaho, kinahang-ean nga may skills ka nga insakto sa ginausoy it boss. Pero iba ra sa pagiging elder, indi eang nga mayad ka mag-preaching ag magturo. Kundi para mangin elder, kinahang-ean mo maabot ro mga kwalipikasyon sa Biblia nga nakalista sa 1 Timoteo 3:​1-7, NWT ag Tito 1:​5-9, NWT. (Basaha.) Sa rayang artikulo, pagatalakayon ro tatlo nga importanteng bagay nga kinahang-ean para mangin elder: may mayad nga reputasyon sa sueod ag guwa it kongregasyon, may mayad nga halimbawa bilang sangka ueo it pamilya, ag handa mag-alagad sa kongregasyon.

MAY MAYAD NGA REPUTASYON

4. Ano ro buot hambaeon nga “owa it kasawayan”?

⁴ Para mangin kwalipikado nga elder, dapat ‘owa ka it kasawayan,’ nagakahueogan ra nga may mayad ka nga reputasyon  sa kongregasyon dahil sa ing mayad nga paggawi. Dugang pa, dapat ‘may mayad ka man nga reputasyon sa mga tawo nga buko’t parte it kongregasyon.’ Posible nga usuyan ka it saea ku mga buko’t tumoeuo dahil sa ing mga pagpati, pero dapat owa sanda it malig-on nga basehan para kwestyunon ing pagka-honest o paggawi. (Dan. 6:​4, 5) Pangutan-a ing sarili, ‘May mayad baea ako nga reputasyon sa sueod ag guwa it kongregasyon?’

5. Paalin mo mapakita nga ‘nagaobra ka pirme it mayad’?

⁵ Kon ‘nagaobra ka pirme it mayad,’ ginausoy mo ro mayad sa iba ag ginakomendahan sanda dahil sa andang manaming mga ugali. Masadya ka man nga nagaobra it mayad sa iba, maskin owa nanda ginapaabot nga obrahon mo ra. (1 Tes. 2:8.) Ham-an importante gid rayang ugali para sa mga elder? Dahil mas abu nga oras ro andang ginagamit para diparahon ro kongregasyon ag ro andang mga asayment. (1 Ped. 5:​1-3) Pero, ro kasadya nga andang nabatyagan sa pagbulig sa iba hay mas sobra pa kaysa sa mga sakripisyo nga andang gin-obra.​—Binu. 20:35.

6. Ano ro pila nga mga paagi para mangin “maabiabihon”? (Hebreo 13:​2, 16; tan-awa man ro piktyur.)

⁶ Ginapakita mo nga “maabiabihon” ka kon nagaobra ka it mayad sa iba, pati sa bukon mo it amigo. (1 Ped. 4:9) Ginahambae it sangka reperensya nga ro tawo nga maabiabihon hay mabuot maskin sa bukon na it kilaea, ag masadya na nga ginaimbita sanda sa andang baeay. Pangutan-a ing sarili, ‘Kilaea baea ako nga maabiabihon sa mga bisita?’ (Basaha ro Hebreo 13:​2, 16.) Ro maabiabihon nga tawo hay nagapakita it kabuot sa tanan nga bisita, kaibahan kara ro mga pobre ag mahugod nga mga alagad, pareho it mga manogdipara it sirkito ag gin-imbita nga manogdiskurso.​—Gen. 18:​2-8; Hulu. 3:27; Luc. 14:​13, 14; Binu.16:15; Roma 12:13.

7. Paalin mapakita it elder nga ‘bukon imaw it mapinalanggaon sa kwarta’?

⁷ “Bukon it mapinalanggaon sa kwarta.” Nagakahueogan ra nga owa ka nagapukos sa materyal nga mga bagay. Manggaranon ka man o pobre, ginauna mo sa ing kabuhi ro intereses it Ginharian. (Mat. 6:33) Ginagamit mo ing oras, kusog, ag mga pagkabutang para simbahon si Jehova, diparahon ing pamilya,  ag mag-alagad sa kongregasyon. (Mat. 6:24; 1 Juan 2:​15-17) Pangutan-a ing sarili, ‘Mauno ka importante kang ro kwarta? Kontento baea ako sa mga bagay nga may una ako? O nagapukos baea ako sa pagpaabu it kwarta ag sa materyal nga mga bagay?’—1 Tim. 6:​6, 17-19.

8. Ano ro pila nga mga paagi nga mapakita mo nga ‘balanse ka sa paggawi’ ag “may pagpugong sa sarili”?

⁸ Kon ‘balanse ka sa paggawi’ ag “may pagpugong sa sarili,” ginapakita mo nga owa ka nagapasobra sa tanan mong ginaobra. Eakip kara ro paglikaw sa sobra nga pagkaon ag pag-inom. Ginapili mo man it mayad ing estilo it pang-eambong ag pag-ayos it buhok, ag mga kalingawan. Bukon ka man it sunod sa uso. (Luc. 21:34; Sant. 4:4) Kalmado ka gihapon, maskin ginapaugot ka it iba. ‘Bukon ka it paeahilong’ o bukon ka man it kilaea nga sobra mag-inom it aeak. Pangutan-a ing sarili, ‘Ang paagi baea it pagkabuhi hay nagapakita nga balanse ako sa paggawi ag may pagpugong sa sarili?’

9. Ano ro naeakip sa “may mayad nga isip” ag “taeahuron”?

⁹ Kon ‘may mayad ka nga isip,’ ginaisip mo ro mga bagay base sa mga prinsipyo sa Biblia. Ginaisip mo gid rayang mga prinsipyo, ag naintindihan mo kon paalin ra iaplikar sa sangka sitwasyon. Ngani, owa ka nagapadaso-daso kon nagaobra it mga desisyon. Kundi, ginasigurado mo nga sayod mo ro tanan nga detalye. (Hulu. 18:13) Bilang resulta, makaobra ka it maaeamon nga mga desisyon nga pareho sa kaisipan ni Jehova. Kon “taeahuron” ka, organisado ka ag pirmeng temprano. Kilaea ka nga masaligan ag nagasunod sa instruksyon. Rayang mga ugali hay makabulig para mangin mayad ing reputasyon. Talakayon ta makaron kon paalin maabot ro mga kwalipikasyon sa Biblia paagi sa pagpakita it mayad nga halimbawa bilang ueo it pamilya.

MANGIN MAYAD NGA HALIMBAWA BILANG UEO IT PAMILYA

10. Paalin madumaeahan it sangka eaki ro anang “panimaeay sa mayad nga paagi”?

¹⁰ Kon ikaw hay asawang eaki ag gustong mangin elder, ro reputasyon it ing pamilya hay makaapekto sa ing mga kwalipikasyon. Ngani, kinahang-ean mo nga ‘dumaeahan ing panimaeay sa mayad nga paagi.’ Dapat kilaea ka nga mapinalanggaon ag responsable nga ueo it pamilya. Naeakip kara ro ing pagpanguna sa tanan nga parte it atong pagsimba. Ham-an importante gid ra? Nagrason si apostol Pablo: “Ay kon ro isaeang ka tawo indi ngani kaantiguhan magdumaea it anang panimaeay, paano karon ro pagdumaea nana ku simbahan [o, kongregasyon] it Dyos?”—1 Tim. 3:5.

11-12. Kon gusto it sangka eaki nga mangin elder, ham-an importante gid ro paggawi it anang pamilya? (Tan-awa man ro piktyur.)

¹¹ Kon sangka tatay ka, dapat ing menor de edad nga mga unga hay “nagatuman ag nagatahod” kimo. Dapat mo sandang tur-an ag sanayon sa mapinalanggaon nga paagi. Syempre, pareho it ibang mga unga, gusto man nanda nga magkasadya ag maghampang. Pero dahil mayad ing pagsanay kanda, mangin matinumanon sanda, matinahuron, ag disiplinado. Dapat mo mang obrahon ing bilog nga masarangan para buligan ing mga unga nga mangin maeapit kay Jehova, magkabuhi base sa mga prinsipyo it Biblia, ag magpabautismo.

¹² “May mga unga nga tumoeuo nga owa ginaakusahan nga nagakabuhi it maeain o rebelyuso.” Kon ro tumoeuo nga unga hay nakaobra it seryoso nga saea, paalin ra makaapekto sa tatay? Kon owa ginasanay ag ginadisiplina it tatay ro anang unga, posible nga bukon imaw it kwalipikado nga mangin elder.​—Tan-awa ro Oktubre 15, 1996 nga isyu it Ang Lalantawan, p. 21, par. 6-7.

 MAG-ALAGAD SA KONGREGASYON

13. Paalin mo mapakita nga “makatarungan” ka ag “bukon it arogante”?

¹³ Ro mga brother nga nagapakita it mayad nga Cristyanong mga ugali hay mabahoe gid nga bulig sa kongregasyon. Ro “makatarungan” nga tawo hay nagabulig para mangin matawhay ro kongregasyon. Kon gusto mo nga makilaea bilang makatarungan, pamatii ro iba ag intindiha ro andang ginabatyag. Kon nagamiting kaibahan ro mga elder, handa ka baea nga suportahan ro desisyon it kaabuan kon owa malang it naeapas nga kasugoan o prinsipyo sa Biblia? Ro “bukon it arogante” hay nagakahueogan nga owa mo ginapilit sa iba nga obrahon nanda ing gusto. Importante kimo ro opinyon it iba. (Gen. 13:​8, 9; Hulu. 15:22) ‘Bukon ka it paeaaway’ o “madali maakig.” Nagakahueogan ra nga matinahuron ka ag buko’t masakit maghambae. Bilang matawhay nga tawo, nagausoy ka it paagi para mangin matawhay sa iba, maskin sa malisud nga sitwasyon. (Sant. 3:​17, 18) Kon mabuot ka maghambae, makapakalma ra sa iba pati eon sa ratong mga nagakontra sa atong pagpati.​—Huk. 8:​1-3; Hulu. 20:3; 25:15; Mat. 5:​23, 24.

14. Ano ro buot hambaeon nga “buko’t bag-uhan nga tumoeuo” ag “mainunongon”?

¹⁴ Ro sangka brother nga kwalipikado nga mangin elder hay “buko’t bag-uhan nga tumoeuo.” Pero owa ra nagakahueogan nga dapat dinag-on ka eon nga nabautismuhan, kinahang-ean mo eang it panahon para mangin hamtong nga Cristyano. Bago ka mangin elder, kinahang-ean mo anay ipakita ro pagkamapainubuson pareho ni Jesus, ag handa ka maghueat sa maskin alin man nga asayment nga itao kimo ni Jehova. (Mat. 20:23; Fil. 2:​5-8) Mapamatud-an mo nga “mainunongon” ka kon magpabilin ka nga matutom kay Jehova ag sa anang matarung nga pagsueondan, ag kon ginasunod mo ro mga instruksyon nga ginatao na paagi sa anang organisasyon.​—1 Tim. 4:15.

15. Dapat baea nga mayad magdiskurso sa publiko ro sangka elder? Ieksplikar.

¹⁵ Klaro nga ginahambae it Biblia nga ro  mga manogdipara hay dapat “kwalipikado sa pagturo.” Nagakahueogan baea ra nga dapat mayad gid sanda magtao it diskurso sa publiko? Bukon man. Abung kwalipikado nga mga elder ro bukon man it mayad magtao it diskurso sa publiko, pero mayad sanda magturo sa ministeryo ag mag-shepherding. (Ikumpara ro 1 Corinto 12:​28, 29 ag Efeso 4:11.) Maskin bukon ka it mayad nga manogdiskurso, kinahang-ean mo gihapon tinguhaan nga mangin mayad nga manogturo. Paalin mo ron maobra?

16. Paalin ka mangin mayad nga manogturo? (Tan-awa man ro piktyur.)

¹⁶ “Nagabuyot it mayad sa masaligan nga mensahe.” Para mangin mayad nga manogturo, kinahang-ean nabase sa Bisaea it Dyos ing mga ginaturo ag ginatao nga pahanumdom sa iba. Para maobra ra, kinahang-ean mo tun-an it mayad ro Biblia ag ro atong mga publikasyon. (Hulu. 15:28; 16:23.) Habang nagatuon, isipa kon paalin mo ra iaplikar it tama. Ag kon nagaturo, tinguhai nga abuton ro tagipusuon it mga nagapamati kimo. Agud mangin mayad ka pa gid nga manogturo, mangayo it suhistyon sa eksperyinsyadong mga elder ag sundon ra. (1 Tim. 5:17) Dapat may ikasarang sa ‘pagpalig-on’ ro mga elder sa andang mga igmanghod; pero, kon amat dapat man sanda magtao it pahanumdom o “pagsaway”. Alin man kara, dapat mangin mabuot pirme ro mga elder. Ngani, kon mabuot ka ag mapinalanggaon ag nabase ing ginaturo sa Bisaea it Dyos, mangin mayad ka nga manogturo dahil ginatuead mo ro Mayad nga Manogturo nga si Jesus.​—Mat. 11:​28-30; 2 Tim. 2:24.

PADAYON NGA MAGTINGUHA

17. (a) Ano ro makabulig sa mga ministeryal nga alagad nga padayon nga magtinguha? (b) Ano dapat ro dumdomon it mga elder kon nagapili it mga brother nga mangin elder? (Tan-awa ro kahon nga “ Mangin Balanse Kon Nagapili it Brother nga Mangin Elder.”)

¹⁷ Pagkatapos matalakay ro mga kwalipikasyon para mangin elder, posibleng makabatyag ro pila sa mga ministeryal nga alagad nga indi gid sanda makwalipikado. Pero, tandai nga owa ginapaabot ni Jehova o it anang  organisasyon nga mapakita mo it perpekto rayang mga ugali. (1 Ped. 2:21) Ag ro gamhanan nga espiritu ni Jehova ro magabulig kimo nga amat-amat nga maabot rayang mga kwalipikasyon. (Fil. 2:13) May espisipiko ka baea nga ugali nga gusto mong pauswagon? Ipangamuyo ra kay Jehova. I-research rayang ugali, ag mangayo it suhistyon sa sangka elder kon paalin mo ra mapauswag.

18. Ano ro ginapalig-on nga obrahon it tanan nga mga ministeryal nga alagad?

¹⁸ Mga brother, pati ratong mga elder eon, kabay tanan kita hay padayon nga magpauswag it mga ugali nga gintalakay sa rayang artikulo. (Fil. 3:16) Ministeryal ka baea nga alagad? Magtinguha! Pangabaya si Jehova nga sanayon ka agud mas magamit ka sa pag-alagad kana ag sa kongregasyon. (Isa. 64:8) Kabay nga pakamayron ni Jehova it bugana ing mga pagtinguha nga mangin kwalipikado bilang elder.