1. Ano ro nabatyagan ni apostol Pablo parti sa mga ministeryal nga alagad?

 NAGAOBRA it importanteng mga ueobrahon ro mga ministeryal nga alagad sa kongregasyon. Naapresyar gid ni apostol Pablo rayang matutom nga mga eaki. Halimbawa, kat ginsueatan na ro mga Cristyano sa Filipos, ginkamusta na ro mga ministeryal nga alagad kaibahan ro mga elder.​—Fil. 1:1.

2. Ano ro nabatyagan it sangka brother nga si Luis parti sa anang asayment bilang ministeryal nga alagad?

² Abung bautismadong brother bata man o magueang, ro nakabatyag it kasadya bilang mga ministeryal nga alagad. Halimbawa, nangin ministeryal nga alagad si Devan kat 18 paeang imaw. Pero, si Luis mat-a hay nangin ministeryal nga alagad kat mga 50 eon imaw. Ano ro nabatyagan na parti sa rayang asayment? Naghambae imaw: “Sangka pribilehiyo gid para kang nga mangin ministeryal nga alagad, eabi eon gid kon maisip ko ro pagpalangga nga ginpakita kakon it mga igmanghod sa kongregasyon!”

3. Ano ro mga pangutana nga atong pagatalakayon?

³ Kon ikaw hay sangka bautismado nga brother ag bukon pa it ministeryal nga alagad, pwede mo baea nga mangin goal ra? Ano ro magapahueag kimo nga obrahon ra? Ag ano ro mga kwalipikasyon sa Biblia nga dapat mong abuton? Sa rayang artikulo, sayuron naton ro mga sabat sa rayang mga pangutana. Pero, talakayon anay naton kon ano ro mga ueobrahon it sangka ministeryal nga alagad.

ANO RO MGA UEOBRAHON IT SANGKA MINISTERYAL NGA ALAGAD?

4. Ano ro mga ueobrahon it sangka ministeryal nga alagad? (Tan-awa man ro piktyur.)

⁴ Ro sangka ministeryal nga alagad hay bautismado nga brother nga ginpili it baeaan nga espiritu para buligan ro mga elder  sa pagdipara it importanteng mga bagay sa kongregasyon. Ginasigurado it pila nga mga ministeryal nga alagad nga may maagtunan nga teritoryo ro mga igmanghod ag may gamiton sanda nga mga literatura sa andang ministeryo. Ro iba mat-a hay nagabulig sa paglimpyo ag pagmentinar it Kingdom Hall. Nagaalagad man bilang attendant ag operator sa sound ag video ro mga ministeryal nga alagad sa panahon it miting sa kongregasyon. Kaeabanan sa andang ginaobra hay kinahang-eanon gid. Pero, ro pinakaimportante hay mga espiritwal sanda nga eaki; palangga nanda si Jehova ag nagakabuhi sanda sa anang matarung nga pagsueondan. Ag palangga gid nanda ro mga igmanghod sa kongregasyon. (Mat. 22:​37-39) Ano ro obrahon it sangka bautismadong brother para mangin ministeryal nga alagad?

5. Ano ro pwedeng obrahon it sangka brother para mangin ministeryal nga alagad?

⁵ Ginahambae it Biblia ro mga kwalipikasyon para sa mga gustong mangin ministeryal nga alagad. (1 Tim. 3:​8-10, 12, 13) Pwede mong tun-an ro mga kwalipikasyon sa Biblia agud maabot rayang pribilehiyo ag mag-obra it mga pagbag-o agud maabot ra. Pero kinahang-ean mo anay usisaon ing motibo kon ham-an gusto mo mangin ministeryal nga alagad.

ANO RO MAGAPAHUEAG KIMO NGA MAGTINGUHA?

6. Ano dapat ro magapahueag kimo nga obrahon ro maskin alin nga pag-alagad para sa ing mga igmanghod? (Mateo 20:28; tan-awa man ro piktyur.)

⁶ Isipa ro atong pinakamayad nga halimbawa nga si Jesu-Cristo, ginpahueag imaw it anang pagpalangga—pagpalangga sa anang Ama ag sa mga tawo. Raya ro nagpahueag kana nga mangin mahugod ag obrahon ro mga ueobrahon nga ginapakanaba it iba. (Basaha ro Mateo 20:28; Juan 13:​5, 14, 15) Kon ing pagpalangga ro nagapahueag kimo sa pag-alagad, pakamayron ka ni Jehova ag buligan ka nana nga maabot ing goal nga mangin kwalipikado bilang sangka ministeryal nga alagad.​—1 Cor. 16:14; 1 Ped. 5:5.

7. Ham-an dapat likawan it sangka brother ro makasarili nga ambisyon?

⁷ Sa kalibutan, ginahangaan pirme ro mga tawo nga gustong mangin sikat. Bukon it makaruyon sa organisasyon ni Jehova. Ro sangka brother nga ginapahueag it pagpalangga pareho ni Jesus hay owa nagahandum it gahum, awtoridad sa iba, o mataas nga estado.  Kon makaruyon ro mapili sa kongregasyon, posible nga balibaran na ro mga ueobrahon nga ginapakanaba it iba nga kinahang-ean agud madipara ro palangga nga mga karnero ni Jehova. Posibleng isipon na nga buko’t bagay kana rayang mga ueobrahon. (Juan 10:12) Indi gid pagpakamayron ni Jehova ro mga pagtinguha it maskin sin-o nga ginapahueag it andang bugae o makasarili nga ambisyon.​—1 Cor. 10:​24, 33; 13:​4, 5.

8. Ano ro pahanumdom nga gintao ni Jesus sa anang mga apostoles?

⁸ May mga beses nga maskin ro pinakamaeapit nga mga amigo ni Jesus hay nagtinguha man nga mag-abot it mga pribilehiyo pero buko’t tama ro andang motibo. Tan-awon naton ro natabo sa daywang ka apostoles ni Jesus nga sanday Santiago ag Juan. Nangabay sanda kay Jesus nga taw-an sanda it espesyal nga posisyon sa anang Ginharian. Owa sanda gindayaw ni Jesus dahil sa andang ambisyon. Kundi, gin-eksplikar na sa anang 12 nga apostoles: “Kon ro sambato kinyo gusto mangingamhanan, dapat imaw manginsueoguon ninyo. Ag kon ro sambato kinyo gusto manginpinuno, dapat imaw mangin-ulipon kung tanan.” (Mar. 10:​35-37, 43, 44) Ro mga brother nga nagatinguha nga may tama nga motibo—raya ro pag-alagad sa iba—hay mangin pagpakamayad gid sa kongregasyon.​—1 Tes. 2:8.

ANO RO MAKAPABASKOG SA ING KAGUSTUHAN NGA MAGTINGUHA?

9. Paalin mo mapabaskog ing kagustuhan nga magtinguha?

⁹ Owa’t duda nga palangga mo si Jehova ag gusto mo nga mag-alagad sa mga igmanghod. Pero, basi owa ka’t kagustuhan nga obrahon ro mga ueobrahon it sangka ministeryal nga alagad. Paalin mo mapabaskog ing kagustuhan nga mag-alagad? Isipa ro kasadya nga pwede mong maeksperyinsyahan kon nagaalagad ka sa ing mga igmanghod. Naghambae si Jesus: “Mas masadya ro nagatao kaysa sa nagabaton.” (Binu. 20:​35, NWT) Ginkabuhi na rayang prinsipyo. Nabatyagan na ro matuod nga kasadya sa pag-alagad sa iba, ag pwede mo man ron nga mabatyagan.

10. Paalin ginpakita ni Jesus nga masadya imaw sa pag-alagad sa iba? (Marcos 6:​31-34)

¹⁰ Tan-awa ro halimbawa nga ginpakita ni Jesus nga masadya imaw sa pag-alagad sa iba. (Basaha ro Marcos 6:​31-34.) Sang beses, gaoy si Jesus ag ro anang mga apostoles. Paagto sanda sa sangka malinong nga lugar agud magpahuway. Pero nauna pa nga nag-abot ro mga tawo igto nga nagaeaum nga tur-an sanda ni Jesus. Pwede na kunta nga balibaran sanda dahil imaw ag ro anang mga kaibahan hay “owa eon ngani it oras bisan sa pagkaon.” O pwede kunta nga papanawon ni Jesus ro mga tawo pagkatapos na sandang tur-an it sambato o daywa nga kamatuoran. Pero dahil ginpahueag imaw it pagpalangga, “gintur-an nana sanda it abu nga mga butang.” Ag padayon na sanda nga gintur-an hasta nga “salikaeum [o, madueom] eon.” (Mar. 6:35) Gin-obra na ra, buko’t dahil obligado imaw, pero dahil “nagbatyag imaw it kaeuoy kanda.” Gusto na nga tur-an sanda dahil palangga na sanda. Ro pag-alagad sa iba hay nakatao gid it kasadya kay Jesus.

11. Paalin nagtao it praktikal nga bulig si Jesus sa mga tawo? (Tan-awa man ro piktyur.)

¹¹ Kat ginwalihan ni Jesus ro abung tawo, owa eang imaw nagturo kanda. Gintao na man ro andang pisikal nga mga kinahang-eanon. Milagruso na nga ginpaabu ro pagkaon ag ginpapanupod ra sa anang mga disipulo. (Mar. 6:41) Paagi kara, gintur-an na ro anang mga disipulo kon paalin mag-alagad sa iba. Ginpakita na man kanda ro importansya it praktikal nga mga paagi it pag-alagad—pareho sa ginaobra it mga ministeryal nga alagad makaron. Imadyina ro kasadya it mga apostoles nga kaibahan sanda ni  Jesus sa milagruso nga pagpanupod it pagkaon hasta nga “nagkaon sanda tanan ag nagkaeabusog”! (Mar. 6:42) Syempre, bukon eang it raya ro panahon nga gin-una ni Jesus ro kinahang-eanon it iba kaysa sa anang sarili. Gingamit na ro anang bilog nga kabuhi iya sa eugta agud mag-alagad sa mga tawo. (Mat. 4:23; 8:16) Nabatyagan gid ni Jesus ro kasadya ag kaayawan sa pagturo sa iba ag sa mapainubuson nga pagdipara sa andang mga kinahang-eanon. Sigurado nga maeksperyinsyahan mo man ruyong kasadya habang ginatinguhaan mo nga mangin ministeryal nga alagad.

12. Ham-an indi naton dapat isipon nga owa kita it mabulig sa kongregasyon?

¹² Kon pamatyag mo hay owa ka’t abilidad o skills, indi maeuyahan. Sigurado gid nga may mga ugali ka nga makabulig sa kongregasyon. Isipa ro ginhambae ni Pablo sa 1 Corinto 12:​12-30, ag pangabaya rayon si Jehova nga buligan ka nga makita kon paalin ra makabulig kimo. Klaro nga ginahambae kimo ni Pablo nga pareho sa ibang mga alagad ni Jehova, kinahang-ean ka ag importante ing maobra sa kongregasyon. Kon owa mo pa naabot makaron ro mga kwalipikasyon para mangin ministeryal nga alagad, indi madismaya. Kundi, obraha ing bilog nga masarangan agud magamit ka ni Jehova ag makabulig sa mga igmanghod. Makasalig ka nga sayod it mga elder ing mga ikasarang ag taw-an ka it mga asayment nga kaya mong obrahon.​—Roma 12:​4-8.

13. Ano ro matuod sa kaeabanan nga mga kwalipikasyon para sa ginpili nga mga eaki?

¹³ Raya ro sambato pa nga rason kon ham-an dapat mong tinguhaan nga mangin kwalipikado bilang sangka ministeryal nga alagad: Haeos tanan nga mga kwalipikasyon hay maaplikar sa tanan nga mga Cristyano. Ro matuod, ro tanan nga mga Cristyano hay dapat mangin maeapit kay Jehova, masadya nga nagatao sa iba, ag magpakita it mayad nga halimbawa sa pagkabuhi bilang Cristyano. Ano ro espisipikong bagay nga dapat tinguhaan it sangka brother?

KON ANO NGA PAGTINGUHA ING OBRAHON

14. Ano ro buot hambaeon nga “mangin seryoso”? (1 Timoteo 3:​8-10, 12, NWT)

¹⁴ Talakayon naton ro pila nga mga kwalipikasyon nga ginhambae sa 1 Timoteo 3:​8-10, 12, NWT. (Basaha.) Ro sangka ministeryal nga alagad hay dapat “mangin seryoso.” Ruyong termino hay ma-translate man nga “nagakadapat nga irespeto,” “taeahuron,” o “dungganon.” Owa ra nagakahueogan nga indi ka eon pwedeng maghibayag o magkasadya. (Man. 3:​1, 4) Pero, seryoso ka dapat sa pag-obra it tanan mo nga responsibilidad. Kon kilaea ka nga masaligan sa ing mga ueobrahon, mabaton mo ro pagrespeto it mga igmanghod sa kongregasyon.

15. Ano ro buot hambaeon nga “buko’t paiba-iba ro ginahambae” ag “owa nagatinguha nga mamentaha sa sueok nga paagi”?

 ¹⁵ Ro “buko’t paiba-iba ro ginahambae” hay nagakahueogan nga sinsero ka, honest, ag masaligan. Ginaobra mo kon ano ing ginhambae, ag owa ka nagapangluko it iba. (Hulu. 3:32) Ro “owa nagatinguha nga mamentaha sa sueok nga paagi” hay nagakahueogan nga honest ka may eabot sa ing negosyo ag sa pagbuyot it kwarta. Owa mo ginagamit ing mayad nga relasyon sa imong isigka-Cristyano para eang mag-abu ing kwarta.

16. (a) Ano ro buot hambaeon nga “buko’t paeainom it aeak”? (b) Ano ro buot hambaeon nga “may malimpyo nga konsensya”?

¹⁶ Ro “buko’t paeainom it aeak” hay nagakahueogan nga bukon ka it sobra-sobra mag-inom ag bukon ka man it kilaea nga paeahilong. Kon ‘may malimpyo ka nga konsensya’ nagakahueogan ra nga nagakabuhi ka base sa mga pagsueondan ni Jehova. Maskin bukon ka’t perpekto, gina-enjoy mo ro katawhay nga halin sa mayad nga relasyon sa Dyos.

17. Paalin mapakita it sangka brother nga masaligan imaw habang ‘ginatestingan anay kon nagakadapat imaw’? (1 Timoteo 3:​10, NWT; tan-awa man ro piktyur.)

¹⁷ Ro “testingi anay kon nagakadapat” hay nagakahueogan nga napakita mo eon nga masaligan ka sa mga responsibilidad. Ngani, kon taw-an ka it asayment it mga elder, sunda it mayad ro andang mga instruksyon ag mga giya nga gintao it organisasyon. Siguraduha nga naintindihan mo it mayad kon ano ing asayment ag kon hin-uno ra dapat matapos. Habang mahugod mo nga ginaobra ing asayment, makita ag maapresyar it mga igmanghod sa kongregasyon ro imong pag-uswag. Mga elder, mangin alerto sa pagsanay it bautismadong mga brother. (Basaha ro 1 Timoteo 3:​10, NWT.) May bautismado baea nga mga brother sa inyong kongregasyon nga 10 hasta’t 14 anyos paeang o mas bata pa? May mayad baea sanda nga rutina it personal nga pagtuon? Regular baea sanda nga nagakomento sa mga miting ag naga-preaching? Kon huo, taw-i sanda it mga asayment nga bagay sa andang edad ag sitwasyon. Sa rayang paagi, rayang bataon nga mga brother hay ‘matestingan anay kon nagakadapat sanda.’ Kon mangin adulto eon sanda, pwede eon sanda mangin kwalipikado bilang mga ministeryal nga alagad.

18. Ano ro buot hambaeon nga “owa it akusasyon kontra kanda”?

¹⁸ Ro “owa it akusasyon kontra kanda” hay nagakahueogan nga owa it malig-on nga basehan  nga nakaobra ka it seryoso nga saea nga pwedeng iakusa kontra kimo. Syempre, pwedeng akusahan it saea ro mga Cristyano. Si Jesus hay nangin biktima man it saea nga mga akusasyon, ag ginhula na nga maeksperyinsyahan man ra it anang mga sumoeunod. (Juan 15:20) Pero, kon padayon mo nga obrahon ro tama pareho ni Jesus, mangin mayad ing reputasyon sa kongregasyon.​—Mat. 11:19.

19. Ano ro buot hambaeon nga ro mga asawang eaki hay dapat “sambato eang ro asawang bayi”?

¹⁹ “Sambato eang ro asawang bayi.” Kon kasae ka eon, dapat mong sundon ro orihinal nga pagsueondan ni Jehova sa pag-asawa—sangka eaki ag sangka bayi. (Mat. 19:​3-9) Ro sangka Cristyano nga eaki hay indi gid dapat mag-obra it sekswal nga imoralidad. (Heb. 13:4) Pero bukon eang it ruyon. Dapat mainunongon man imaw sa anang asawa, ag indi man dapat imaw magtao it buko’t nagakabagay nga atensyon sa ibang bayi.​—Job 31:1.

20. Paalin madumaeahan it sangka brother ro anang pamilya sa “mayad nga paagi”?

²⁰ “Ginadumaeahan sa mayad nga paagi ro andang mga unga ag panimaeay.” Kon ikaw hay ueo it pamilya, dapat seryoso mong obrahon ing mga responsibilidad. Tinguhai nga maka-family worship kamo it regular. Kon posible, mag-preaching it regular kaibahan sa ing asawa ag mga unga. Buligi ing mga unga nga mag-eapit ro andang relasyon kay Jehova. (Efe. 6:4) Kon kayang dumaeahan it sangka eaki ro anang pamilya, nagapakita ra nga kaya na mang dumaeahan ro kongregasyon.​—Ikumpara ro 1 Timoteo 3:5.

21. Kon bukon ka pa it sangka ministeryal nga alagad makaron, ano ing pwedeng obrahon?

²¹ Mga brother, kon bukon pa kamo it ministeryal nga alagad makaron, pangabay tun-i it mayad rayang artikulo ag ipangamuyo ra kay Jehova. Sayura ro mga kwalipikasyon para sa mga ministeryal nga alagad ag obraha ing bilog nga masarangan agud maabot ra. Isipa kon mauno mo kapalangga si Jehova ag ing mga igmanghod sa kongregasyon. Pabaskuga ing kagustuhan nga mag-alagad para kanda. (1 Ped. 4:​8, 10) Maeksperyinsyahan mo ro kasadya nga nagahalin sa pag-alagad sa ing espiritwal nga pamilya. Kabay nga pakamayron ni Jehova it bugana ing mga pagtinguha para mangin ministeryal nga alagad!—Fil. 2:13.