NAPANSIN mo baea nga abung tawo makaron ro nagabatyag nga nagakadapat sanda nga magbaton it espesyal nga pagtratar, mga pribilehiyo, o karapatan? Maskin nabaton eon nanda ra, nagaisip gihapon sanda nga dapat abu pa ro andang mabaton. Rayang makasariling kaisipan ag buko’t mapinasaeamaton nga ugali it mga tawo hay tanda it katapusan nga mga inadlaw.​—2 Tim. 3:2.

Dati pa, may mga tawo eon nga makasarili. Halimbawa, sanday Adan ag Eba hay nagdesisyon kon ano ro mayad ag maeain para kanda. Ngani dahil karon, tanan kita hay nagaantus. Ro sambilog pa nga halimbawa hay si Uzias nga Hari it Juda. Gin-isip na nga may karapatan imaw nga maghaead it insyenso sa templo, pero nagsaea gid imaw. (2 Cron. 26:​18, 19) Gin-isip man it mga Pariseo ag Saduseo nga nagakadapat sanda sa espesyal nga pabor it Dyos dahil mga linahi sanda ni Abraham.​—Mat. 3:9.

Ginapalibutan kita it makasarili nga mga tawo, ag pwede kitang maimpluwensyahan kara. (Gal. 5:26) Posibleng mag-isip kita nga nagakadapat kitang magbaton it pribilehiyo o espesyal nga pagtratar. Paalin naton ra malikawan? Una, kinahang-ean natong masayran kon ano ro pagtan-aw ni Jehova sa rayang bagay. May daywang ka prinsipyo sa Biblia nga makabulig katon.

Si Jehova ro nagadesisyon kon ano ro dapat natong mabaton. Tan-awa ro pila nga halimbawa.

• Sa sueod it pamilya, gusto ni Jehova nga makabatyag ro asawang eaki it pagrespeto sa anang asawa, ag ro anang asawa hay makabatyag man  it pagpalangga sa anang asawang eaki. (Efe. 5:33) Ro mag-asawa hay dapat sa kada isaea eang magpakita it romantiko nga pagpalangga. (1 Cor. 7:3) Ginapaabot it mga ginikanan nga tumanon sanda it andang mga unga, ag ginapaabot man it mga unga nga palanggaon ag suportahan sanda it andang mga ginikanan.​—2 Cor. 12:14; Efe. 6:2.

• Sa kongregasyon, ro mga elder hay nagakadapat sa atong pagrespeto. (1 Tes. 5:12) Pero, owa sanda it awtoridad nga kontrolon ro andang mga igmanghod.​—1 Ped. 5:​2, 3.

• Gintaw-an it Dyos it awtoridad ro mga gubyerno nga magsukot it buhis ag magbaton it dungog halin sa andang mga sakop.​—Roma 13:​1, 6, 7.

Ginataw-an kita ni Jehova it sobra pa sa kon ano eang ro dapat natong mabaton. Dahil makasasaea kita, nagakadapat kitang mamatay. (Roma 6:23) Pero, dahil sa mainunongon nga pagpalangga ni Jehova, ginataw-an na kita it abung pagpakamayad. (Sal. 103:​10, 11) Ro pagpakamayad o ro pribilehiyo nga atong nabaton hay dahil sa anang owa’t tupong nga kabuot.​—Roma 12:​6-8; Efe. 2:8.

Maghaeong sa makasariling kaisipan it kalibutan. Basi owa naton napansin nga nagaisip eon kita nga mas eabaw kita kaysa sa iba. Ginpakita ni Jesus kon mauno’t dasig magtubo rayang kaisipan paagi sa pagsugid it ilustrasyon parti sa mga trabahador nga ginbayran it sangka denaryo. Ro ibang trabahador hay agahon pa nag-umpisa ag nagtrabaho sanda it bilog nga adlaw sa initan; ro iba mat-a hay mga sang oras eang nga nagtrabaho. Ngani gin-isip it unang grupo nga dapat mas mataas ro andang sweldo dahil bilog nga adlaw sandang nagtrabaho. (Mat. 20:​1-16) Paagi sa rayang ilustrasyon, ginturo ni Jesus sa anang mga sumoeunod nga dapat sandang makontento sa kon ano ro gintao kanda it Dyos.

Mangin mapinasaeamaton, buko’t paeapangayo. (1 Tes. 5:18) Si apostol Pablo hay owa nagpangayo it materyal nga suporta sa mga igmanghod sa Corinto maskin pa pwede na rang obrahon. (1 Cor. 9:​11-14) Ngani pareho kana, dapat kitang mangin mapinasaeamaton sa mga ginatao katon it iba, ag indi eon magpaabot it sobra sa andang makaya.

 Mangin mapainubuson. Kon ginaisip it sangka tawo nga mas importante imaw kaysa sa iba, pwede nang batyagon nga nagakadapat imaw nga magbaton it sobra pa. Kon mapainubuson kita, makabulig ra katon nga indi mag-isip it rayang saea nga kaisipan.

Si propeta Daniel hay nagpakita it mayad nga halimbawa sa pagkamapainubuson. Naghalin imaw sa kilaea nga pamilya, gwapo, maaeam, ag maabilidad. Pwede na kuntang batyagon nga nagakadapat imaw magbaton it espesyal nga pagtratar ag mga pribilehiyo. (Dan. 1:​3, 4, 19, 20) Pero, nagpabilin nga mapainubuson si Daniel ag dahil karon, nangin espesyal imaw kay Jehova.​—Dan. 2:30; 10:​11, 12.

Sikwayon naton ro makasariling kaisipan nga eapnag sa kalibutan makaron. Ag kabay nga padayon kita nga magkasadya sa kada pagpakamayad nga ginatao katon ni Jehova paagi sa anang owa’t tupong nga kabuot.