NABATYAGAN mo eon baea nga nagaisaeahanon ka kon may problema? Nagakabuhi kita sa malisud gid nga panahon nga pwedeng magpaeuya ag magpabatyag nga nagaisaeahanon kita. (2 Tim. 3:1) Pero, may mga tawo nga makabulig katon kon makaatubang kita it mga problema. Ginapakita it Biblia ro importansya it matuod nga mga amigo sa “panahon it kalisdanan.”​—Hulu. 17:17.

Nakaibahan ni apostol Pablo ro pila sa anang mga amigo sa anang pagmisyonero ag ginbuligan nanda imaw sa abung paagi. (Col. 4:​7-11) Kat napriso si Pablo sa Roma, ro anang mga amigo ro nag-obra it anang mga ueobrahon nga indi na kayang maobra. Halimbawa, si Epafrodito ro nagdaea it mga kinahang-eanon ni Pablo nga ginpadaea it mga igmanghod halin sa Filipos. (Fil. 4:18) Si Tiquico ro nagdaea it mga sueat ni Pablo sa iba-ibang kongregasyon. (Col. 4:7) Sa bulig it mga amigo ni Pablo, padayon na gihapon nga napalig-on ro mga igmanghod maskin pa ginkulong imaw sa anang baeay o kat igto imaw sa prisuhan. Paalin ka mangin matuod nga amigo makaron?

Ginapakita it mga igmanghod makaron kon paalin nagabueoligan ro mga mag-amigo. Ro sangka regular pioneer sa Spain nga si Elisabet hay nagsugid kon paalin imaw ginbuligan it sangka sister kat may problema imaw. Kat nasayran nanda nga may malala nga kanser ro nanay ni Elisabet, ro sister hay nag-text kana it makapalig-on nga mga teksto. Naghambae si Elisabet, “Kat nabasa ko ro anang message, nagpasalig ra kang nga owa ako nagaisaeahanon sa pag-atubang sa ang mga problema.”​—Hulu. 18:24.

Mapabakud naton ro atong pag-amiguhan sa atong isigka-Cristyano paagi sa pagbulig kanda nga mag-attend sa miting ag pag-preaching. Halimbawa, pwede baea natong masueang o mahatod ro atong magueang eon nga mga igmanghod para maka-attend sa atong mga miting o makaministeryo? Kon obrahon naton ra, mapalig-on ta sanda ag mapalig-on man nanda kita. (Roma 1:12) Pero, may mga igmanghod kita nga indi makahalin sa andang baeay. Paalin kita mangin matuod nga amigo kanda?

Ro pila sa atong mga igmanghod hay may problema sa pang-eawas o may malisud nga sitwasyon, ngani indi sanda maka-attend sa mga miting sa Kingdom Hall. Tan-awa ro halimbawa ni David nga may kanser nga lymphoma. Nagpa-chemotherapy imaw it sobra sa an-um nga buean. Habang ginabueong si David, naga-attend sanda ku anang asawa nga si Lidia sa mga miting online.

Paalin sanda ginpalig-on it mga igmanghod sa kongregasyon? Pagkatapos it kada miting, ro pila nga mga igmanghod nga nag-attend sa Kingdom Hall hay nagtinguha nga makipag-istorya kanday David ag Lidia paagi sa videoconference. Ag kon  magkomento sanday David ag Lidia, nakakabaton rayon sanda it makapalig-on nga mga text message halin sa mga igmanghod. Ano ro nangin resulta? Nabatyagan nanday David ag Lidia ro pagpalangga it mga igmanghod.

Pwede baea nga iiba naton sa atong pagministeryo ro mga igmanghod nga indi makahalin sa andang baeay? Pwede kita mag-obra it sangkiri nga mga pagbag-o agud mapakita naton kanda nga owa naton sanda ginakalipatan. (Hulu. 3:27) Pwede baea naton sanda iiba sa atong pag-letter writing o pag-telephone witnessing? Ratong mga indi makahalin sa andang baeay hay pwedeng maka-attend sa mga miting para sa field service paagi sa videoconference. Nagapasaeamat sanday David ag Lidia sa rayang kahimusan. Naghambae si David, “Ro makaibahan eang ro among grupo para sa matag-od nga pagtalakay ag pangamuyo hay nagpalig-on gid kamon.” Ngani, pwede mo baea pangutan-on ro igmanghod nga indi makahalin sa andang baeay kon pwede ka makadaea it Bible study agud makaibahan imaw sa inyong pagtuon?

Kon nagatao kita it oras sa atong mga igmanghod nga indi makahalin sa andang baeay, mas makilaea naton sanda, makita naton ro andang manami nga mga ugali, ag mas magaeapit kita kanda. Halimbawa, kon maobserbahan naton nga mayad gid sanda maggamit it Biblia sa pagturo ag sa pagbulig sa iba nga mangin maeapit kay Jehova, mas gustuhon naton nga makaibahan sanda. Kon ginabuligan naton ro mga igmanghod sa espiritwal nga mga ueobrahon, mas magaabu ro atong mga amigo.​—2 Cor. 6:13.

Kat sa panahon nga nalisdan si Pablo, gin-agtunan imaw it anang amigo nga si Tito ag ginpaumpawan. (2 Cor. 7:​5-7) Nagapadumdom katon rayang halimbawa nga ro atong pagtao it paumpaw hay bukon eang it paagi sa atong ginahambae, kundi paagi man sa pagtao it atong panahon kanda ag pag-obra it atong bilog nga masarangan para buligan sanda.​—1 Juan 3:18.

Ro atong mga igmanghod sa Russia hay nagpakita it manami nga halimbawa sa pagbulig sa kada isaea. Tan-awa ro eksperyinsya ni Sergey ag ku anang asawa nga si Tatyana. Pagkatapos sudlon it mga pulis ro andang baeay ag gin-ukay ro andang mga gamit, gindaea rayon sanda sa istasyon it pulis para interogahon. Ro unang ginpaguwa hay si Tatyana ag nag-uli imaw sa andang baeay. Naghambae si Sergey: “Pagkauli eagi ni Tatyana, maisugon nga nagbisita kana ro sangka sister. Abu pa rayon nga mga igmanghod ro nag-aeagto ag nagbulig sa pagpanghimos sa among baeay.”

Naghambae pa si Sergey: “Nagustuhan ko gid ro Hulubaton 17:17 nga nagahambae: ‘Ro matuod nga amigo hay nagapakita it pagpalangga sa tanan nga panahon, ag sangka igmanghod nga masaligan sa panahon it kalisdanan.’ Rayang teksto hay nangin mas matuod gid kakon eabi eon sa panahon it paghingabot nga kinahang-ean ko it bulig ku akong mga amigo. Gintaw-an ako ni Jehova it maisog nga mga amigo.” a

Habang nagalisud pa gid ro atong sitwasyon, kinahang-ean naton ro bulig it atong mga amigo. Kinahang-ean naton sanda eabi eon gid sa panahon it mabahoe nga kasakitan. Ngani obrahon naton ro tanan para mangin matuod nga amigo makaron!—1 Ped. 4:​7, 8.