Debotado nga mga Katoliko ang mga ginikanan. Pero kat nasayran nanda sa Biblia nga ro pangaean it Dyos hay Jehova, nangin mahugod sanda nga mga Saksi ni Jehova. Ginpundo ni tatay ro pag-obra it mga imahen ni Jesus. Ag gingamit na ro anang abilidad sa pagpamanday agud obrahon nga pinakaunang Kingdom Hall ro idaeum nga parte it among baeay sa San Juan del Monte, nga sangka banwa sa Manila, ro kapital it Pilipinas.

Umpisa kat gin-unga ako ku 1952, gintur-an eon ako it ang mga ginikanan parti kay Jehova, kon paalin nga gintur-an nanda ro ang ap-at nga magueang nga eaki ag ang tatlong magueang nga bayi. Habang nagabahoe ako, ginpalig-on ako ni tatay nga basahon ro sangka kapitulo it Biblia kada adlaw, ag ginbuligan na man ako nga mas makilaea si Jehova paagi sa mga publikasyon halin sa atong organisasyon. Kon amat, ginaimbitahan it ang mga ginikanan ro mga traveling overseer ag mga representante halin sa branch office nga magdayon sa among baeay. Bilang pamilya, nasadyahan kami ag napalig-on sa mga eksperyinsya nga ginsugid it rayang mga igmanghod, nga nagpahueag kamon nga unahon sa among kabuhi ro pag-alagad kay Jehova.

Nangin mayad nga halimbawa ang mga ginikanan sa pagpakita it katutom kay Jehova. Kat namatay si nanay dahil sa masakit, nagpayunir rayon kami ni tatay ku 1971. Pero ku 1973, kat 20 anyos ako, namatay man rayon si tatay. Ro pagkamatay it ang mga ginikanan hay nagpasubo kang ag nagpabatyag nga nagaisaeahanon ako. Pero ro “malig-on . . . ag indi mahueag” nga pag-eaum nga makita sa Biblia hay nakabulig kakon nga makapabilin nga mabakud sa emosyonal ag espiritwal. (Heb. 6:19) Owa magbuhay pagkatapos nga namatay si tatay, ginbaton ko ro asayment bilang special pioneer sa maeayo nga isla it Coron, sa probinsya it Palawan.

Nag-abot ako sa Coron kat 21 nga dag-on ako. Dahil nagbahoe ako sa syudad, nakibot ako kat  nasayran ko nga rayang isla hay limitado ro kuryente, tubi, ag sangkiri eat-a ro saeakyan. Pilang bilog eang ro mga igmanghod, ngani owa ako’t kaibahan sa pagpayunir ag kon amat, ako eang isaea ro naga-preaching. Sa unang buean ko igto, nahidlaw gid ako sa ang pamilya ag mga amigo. Kon gabii, nagatan-aw ako sa eangit nga puno it bituon habang nagatueo ang euha. Matsa gusto ko nga aywanan ang asayment ag umuli.

Sa ruyong panahon nga nagaisaeahanon ako, ginasugid ko kay Jehova ro tanan nakong ginabatyag. Ginadumdom ko ro mga makapalig-on nga akong habasahan sa Biblia ag sa atong mga publikasyon. Ro Salmo 19:14 ro nagasueod pirme sa ang isip. Narealisar ko nga si Jehova hay mangin “akong Bato ag akong Manogtubos” kon ginapamaeandungan ko ro mga bagay nga makapasadya kana, pareho it anang mga ueobrahon ag ugali. Ro artikulo sa Watchtower nga “You Are Never Alone” a hay mabahoe gid nga bulig kakon. Pauman-uman ko ra nga ginabasa. Kon nagaisaeahanon ako, pamatyag ko kaibahan ko si Jehova, ag raya ro panahon nga makapangamuyo ako, makatuon, ag makapamaeandong.

Owa magbuhay, pag-abot ko sa Coron, nangin elder ako. Dahil ako eang ro elder, ako ro nagadumaea kada domingo sa Theocratic Ministry School, Service Meeting, Congregation Book Study, ag Watchtower Study. Nagatao man ako it pangpubliko nga diskurso kada domingo. Ngani owa eon ako it panahon para mangin masubo!

Mabungahon gid ro akong pagministeryo sa Coron, ag ro pila sa ang mga Bible study hay nagpabautismo ku ulihi. Pero may mga kalisdanan man. Kon amat, kinahang-ean ko magtikang it mga tunga sa adlaw para makaabot sa teritoryo, maskin owa ako kasayod kon may matueogan ako igto. Eakip man sa teritoryo it among kongregasyon ro maisot nga mga isla. Haeos pirme akong nagasakay sa de-motor nga baroto sa mabagyo nga dagat agud maagtunan sanda, maskin pa indi ako kaantigo mag-eangoy! Sa rayang malisud nga panahon, ginprotektahan ako ni Jehova ag ginpabaskog. Narealisar ko rayon ku ulihi nga ginahanda gali ako ni Jehova sa mga kalisdanan sa ang masunod nga asayment.

Ku 1978, gin-asayn ako sa Papua New Guinea, sa may north it Australia. Ro Papua New Guinea hay mabukid nga nasyon, nga haeos kasingbahoe it Spain. Nakibot ako kat nasayran ko nga ro tatlong milyon nga mga tawo nga nagaestar igto hay nagahambae it sobra sa 800 nga mga linggwahe. Mayad eang kaantigo ro kaeabanan kanda maghambae it Melanesian Pidgin, nga ginatawag man nga Tok Pisin.

Temporaryo ako nga gin-asayn sa kongregasyon nga English ro linggwahe sa Port Moresby, ro kapital nga syudad. Pero nagsaylo man rayon ako sa kongregasyon it Tok Pisin ag nag-eskuyla para tun-an rayang linggwahe. Hagamit ko ro ang natun-an sa klase sa pag-preaching. Nakabulig ra kang nga mas madasig nga magkaantiguhan sa rayang linggwahe. Owa magbuhay, kaya ko eon magtao it pangpubliko nga diskurso sa Tok Pisin. Grabi gid ang kakibot nga owa pa it sang dag-on nga nakaabot ako sa Papua New Guinea, gin-asayn ako nga mag-alagad bilang manogdipara it sirkito sa mga kongregasyon nga nagahambae it Tok Pisin sa iba-ibang probinsya.

 Dahil maeayo ro distansya it mga kongregasyon, kinahang-ean ko mag-organisar it abu nga mga pangsirkitong asembliya ag magbyinahe. Ku una, nagbatyag ako nga nagaisaeahanon dahil una ako sa bag-ong nasyon, bag-ong linggwahe, ag bag-ong mga kustombre nga iba sa ang nakasanayan. Imposible nga magbyahe paagto sa mga kongregasyon dahil mabukid ag malisud ro mga aeagyan. Ngani haeos kada domingo, nagasakay ako sa eroplano. Kon amat, ako eang ro pasahero sa maisot ag luma nga eroplano. Makakueoeba gid ra, pareho kon nagabyahe ako sakay it baroto!

Sangkiri eang ro may mga telepono, ngani nagakomunikar ako sa mga kongregasyon paagi sa sueat. Pero haeos pirme pa akong nauna mag-abot kaysa sa ang mga sueat ag kinahang-ean ko pang magpangutana para makita ro mga igmanghod. Kon makita ko eon sanda, ginaabiabi gid nanda ako ag nagapasaeamat sanda. Ngani, masadya gid ako nga gintinguhaan ko nga makita ro mga igmanghod. Naeksperyinsyahan ko ro pagsuporta ni Jehova sa abung paagi, ag nangin mas maeapit pa gid ako kana.

Sa una kong pagbisita sa isla nga ginatawag nga Bougainville, ginpaeapitan ako it mag-asawa nga nagahiyum-hiyom ag nagpangutana, “Natandaan mo pa kami?” Natandaan ko nga gin-preachingan ko rayang mag-asawa kat bag-o pa eang ako sa Port Moresby. Nakaumpisa ako kanda it pag-Bible study bago ko sanda itao sa lokal nga brother para padayunon ro pag-study kanda. Ag makaron bautismado eon sanda! Sambilog ra sa abung pagpakamayad nga akong nabaton sa ang tatlong dag-on sa Papua New Guinea.

Bago ako naghalin sa Coron ku 1978, nakilaea ko ro gwapa ag masinakripisyuhon nga sister nga si Adel. Imaw hay sangka regular pioneer, nga may daywang ka unga nga sanday Samuel ag Shirley. Imaw man ro nagadipara sa anang magueang eon nga nanay. Ku Mayo 1981, nagbalik ako sa Pilipinas agud pakaslan si Adel. Pagkatapos it among kasae, nagpayunir kami ag gindipara ro among pamilya.

Maskin may pamilya eon ako, gin-asayn ako it uman ku 1983 bilang special pioneer sa Isla it Linapacan, sa probinsya it Palawan. Ro among bilog nga pamilya hay nagsaylo sa rayang maeayo nga lugar nga owa gid it mga Saksi. Pagtaliwan it sang dag-on, namatay ro nanay ni Adel. Pero, nangin masako kami sa ministeryo nga nakabulig kamon nga makaya ro kasubo. Abu ro among mainuswagon nga Bible study sa Linapacan, ngani owa magbuhay, kinahang-ean namon it maisot nga Kingdom Hall. Ngani nag-obra kami. Pagkatapos eang it tatlong dag-on, nasadyahan gid kami nga makita ro 110 nga nag-attend sa Memoryal, ag abu kanda ro nabautismuhan paghalin namon.

Ku 1986, gin-asayn ako sa isla it Culion, kon siin igto ginadaea ro mga may ketong. Pagtaliwan it pilang dag-on, nangin special pioneer man si Adel. Ku una, nakuebaan kami mag-preaching sa mga tawo nga gin-ut-ot ro andang eawas it ketong. Pero ginpalig-on kami it mga igmanghod nga rayang mga may ketong hay nakabaton it pagbueong ag sangkiri lang ro tsansa nga makahawa. Ro pila kanda hay nag-attend it mga miting sa baeay it sangka sister. Owa magbuhay, naka-adjust kami ag nasadyahan eon nga magsugid it atong pag-eaum sa Biblia sa  rayang mga tawo, nga nakabatyag nga ginpabay-an sanda it Dyos ag it mga tawo. Kanami gid makita nga masadya eon ro mga may malala nga sakit ag may pag-eaum eon nga mangin perpekto ro andang pang-eawas.​—Luc. 5:​12, 13.

Paalin naka-adjust ro among mga unga sa Culion? Ginsampit namon ni Adel ro daywang ka bataon nga sister nga taga-Coron nga magsunod kamon agud may mayad nga mga amigo ro among mga unga. Na-enjoy man nanday Samuel, Shirley, ag ku rayang daywang ka bataon nga sister ro pagministeryo ag ro andang pag-Bible study sa mga unga igto. Habang kami mat-a ni Adel ro nagaturo sa ginikanan it rayang mga unga. May panahon nga umabot sa 11 nga pamilya ro among gina-Bible study. Abu sa among ginatur-an ro nag-uswag hasta nga nakaporma kami it bag-ong kongregasyon!

Ku una, ako eang ro elder sa lugar. Ngani ginpangabay ako it branch office nga magdumaea it mga miting kada domingo para sa waeo nga publisher sa Culion ag rayon, sa siyam nga publisher sa baryo it Marily nga mga tatlong oras ro byahe sakay it baroto. Pagkatapos it miting igto, ro among bilog nga pamilya hay nagabaktas sa kabukiran it mga pilang oras para mag-Bible study sa baryo it Halsey.

Ku ulihi, abung mga tawo ro nagbaton it kamatuoran sa Marily ag sa Halsey, ngani nagpatindog kami it Kingdom Hall sa ruyong mga lugar. Ro mga igmanghod ag ro mga interesado sa Linapacan hay nag-amot it mga materyales ag nagbulig sa pagpatindog. Makaigo ro 200 nga tawo sa tieipunan sa Marily ag pwede pa ra mapaeapad, ngani pwede kami makahiwat it mga asembliya igto.

Kat adulto eon ro among mga unga, gin-asayn kami ni Adel ku 1993 sa pangsirkitong ueobrahon sa Pilipinas. Rayon ku 2000, nag-attend ako sa Ministerial Training School agud sanayon nga mangin instruktor para sa ruyong eskuylahan. Pamatyag ko bukon ako it kwalipikado sa rayang asayment, pero pirme akong ginpalig-on ni Adel. Ginpadumdom na kang nga taw-an ako ni Jehova it kusog para maobra rayang bag-ong asayment. (Fil. 4:13) Nahambae ra ni Adel dahil naeksperyinsyahan na mismo ro bulig kana nga maobra ro anang asayment maskin may masakit imaw.

 Ku 2006, habang nagaalagad ako bilang instruktor, nasayran namon nga may Parkinson’s disease si Adel. Nakibot gid kami! Kat ginhambae ko kana nga indi lang kami magpadayon sa among asayment agud madipara imaw, nagsabat si Adel, “Pangabay, usuyi ako it doktor nga makabulig kang sa ang masakit, ag sayod ko nga buligan kita ni Jehova nga makapadayon sa atong asayment.” Sa masunod nga an-um nga dag-on, padayon nga nag-alagad si Adel kay Jehova nga owa it reklamo. Kat indi eon imaw makatikang, naga-preaching imaw nga naka-wheelchair. Kat indi eon imaw haeos kahambae, nagakomento imaw it sambilog o daywang bisaea sa mga miting. Abung mga igmanghod ro nagpadaea kay Adel it mga mensahe it pagpasaeamat sa anang mayad nga halimbawa it pagtiis hasta sa namatay imaw ku 2013. Nakaibahan ko sa sobra 30 nga dag-on si Adel, ro akong matutom ag mapinalanggaon nga asawa, ngani pagkamatay na, nabatyagan ko eon man ro grabing kasubo ag pag-isaeahanon.

Gusto ni Adel nga magpadayon ako sa ang asayment, ngani ruyon ang gin-obra. Padayon ako nga nangin masako, ag nakabulig ra kang nga makaya ro kasubo. Ku 2014 hasta’t 2017, naasayn ako nga magbisita sa mga nasyon nga may mga kongregasyon it Tagalog, kon siin bawae ro atong ueobrahon. Pagkatapos karon, nagbisita man ako sa mga kongregasyon it Tagalog sa Taiwan, sa United States, ag sa Canada. Ku 2019, nangin instruktor ako sa English nga klase sa School for Kingdom Evangelizers sa India ag sa Thailand. Nabatyagan ko gid ro mabahoe nga kasadya sa rayang mga asayment. Nasadyahan gid ang kon masako ako sa pag-alagad kay Jehova.

Sa kada bag-o ko nga asayment, nangin maeapit gid ako sa mga igmanghod nga akong nakikilaea, ngani bukon it madali ro pag-aywan kanda. Sa ruyong panahon, natun-an ko nga magsalig gid it mayad kay Jehova. Nabatyagan ko pirme ro anang suporta, ag nakabulig ra kang nga kinabubut-on nga batunon ro maskin alin nga pagbag-o sa ang kabuhi. Makaron, ako hay sangka special pioneer sa Pilipinas. Masadya ako sa ang bag-ong kongregasyon, nga nangin akong mabinuligon ag mapinalanggaon nga pamilya. Masadya man ako nga makita si Samuel ag si Shirley nga ginatuead nanda ro katutom it andang nanay.​—3 Juan 4.

Huo, naeksperyinsyahan ko ro abung mga kalisdanan sa kabuhi, kaibahan eon karon ro makita ang pinalangga nga asawa nga nag-antus ag namatay sa anang grabi nga masakit. Ag kinahang-ean kong mag-adjust sa mga bag-ong sitwasyon. Pero, nakita ko nga si Jehova hay “bukon it maeayo sa kada isaea katon.” (Binu. 17:27) Ro alima ni Jehova hay “bukon it matag-od” sa pagbulig ag sa pagpalig-on sa anang mga alagad, maskin pa sa maeayo nga mga lugar. (Isa. 59:1) Si Jehova ro akong Bato, owa na gid ako ginpabay-an sa ang bilog nga kabuhi, ag nagapasaeamat gid ako kana. Owa gid ako nagaisaeahanon.