TUEON-AN NGA ARTIKULO 7
KANTA 15 Dayawa ang Panganay ni Jehova!
Pagpatawad ni Jehova—Ano ro Benepisyo Kara Kimo?
“Dahil kimo hay may matuod nga kapatawaran.”—SAL. 130:4.
RO ATONG MATUN-AN
Tun-an naton ro pila nga mga ilustrasyon sa Biblia nga makabulig katon nga maapresyar ro pagpatawad ni Jehova sa kada isaea katon.
1. Ham-an malisud masayran kon ano ro buot hambaeon it sangka tawo kon nagapatawad imaw?
“NAPATAWAD TA EON.” Kanami gid ron mabatian, eabi eon kon sayod mo nga may nahambae ka o naobra nga nakasakit sa iba! Pero ano gid baea ro buot hambaeon it “Napatawad ta eon?” Ginahambae na baea nga OK eon kamo? O basi indi na eang gustong istoryahan ro inyong problema? Ro pagpatawad it tawo hay pwedeng iba-iba ro kahueogan.
2. Paalin ginapakita it Kasueatan ro pagpatawad ni Jehova? (Tan-awa man ro footnote.)
2 Ro pagpatawad ni Jehova sa buko’t perpektong mga tawo hay iba gid sa kon paalin naton ginapatawad ro iba. Owa gid it makapatawad pareho sa pagpatawad ni Jehova. Naghambae ro salmista parti kay Jehova: “Dahil kimo hay may matuod nga kapatawaran, agud tahuron ka it mga tawo.” a (Sal. 130:4) Huo, ro pagpatawad ni Jehova hay “matuod nga kapatawaran.” Imaw ro pinakamayad nga halimbawa sa pagpakita kara. Sa pila nga mga teksto sa Hebreo nga kasueatan, ro mga manogsueat it Biblia hay naggamit it termino para ipakita ro pagpatawad ni Jehova, nga owa gid hagamit para ipakita kon paalin nagapatawad ro tawo.
3. Ham-an iba gid magpatawad si Jehova kaysa katon? (Isaias 55:6, 7)
3 Kon nagapatawad si Jehova, napaea eon ro saea it ruyong tawo. Ro nasamad nga relasyon hay nabalik. Daeayawon gid nga nagapatawad it bugana si Jehova ag maalwan na ra nga ginatao.—Basaha ro Isaias 55:6, 7.
4. Paalin kita ginabuligan ni Jehova nga maintindihan ro matuod nga kahueogan it pagpatawad?
4 Kon iba magpatawad si Jehova kaysa katon, paalin maintindihan it buko’t perpektong mga tawo ro matuod nga kahueogan it pagpatawad? Naggamit si Jehova it manami nga mga ilustrasyon agud buligan kita nga maintindihan ra. Talakayon naton ro pila sa rayang artikulo. Ipakita katon kara nga kon nagahinuesoe kita, bue-on ni Jehova ro atong saea ag ibalik na ro atong relasyon kana nga nasamad dahil sa saea. Habang ginatun-an naton rayang mga ilustrasyon, magadaeum pa gid ro atong pagpalangga ag pagpasaeamat sa atong mabuot ag maeueoy-on nga Ama, nga nagpakita it anang pagpatawad sa iba-ibang paagi.
GINABUOE NI JEHOVA RO ATONG SAEA
5. Ano ro matabo kon ginapatawad ni Jehova ro atong mga saea?
5 Sa Biblia, ro saea hay kapareho it mabug-at nga paeas-anon. Makaraya ro pagsugid ni Haring David sa anang saea: “Ro akong mga saea hay nagaeapaw sa ang ueo; kapareho it mabug-at nga paeas-anon, indi ko eon ra makaya.” (Sal. 38:4) Pero ginapatawad ni Jehova ro saea it mga mahinuesueon. (Sal. 25:18; 32:5) Ro Hebreong termino nga “pagpatawad” hay nagakahueogan it “pagbuoe” o “pagpas-an.” Maimadyin naton nga si Jehova hay kapareho it makusog nga tawo nga ginabuoe ro paeas-anon sa atong abaga ag ginapaeayo na ra katon.
“Ginpatawad” (Sal. 32:5)
6. Mauno’t eayo ro pagpaeayo katon ni Jehova sa atong mga saea?
6 May sambilog pa nga ilustrasyon nga nagapakita kon mauno’t eayo ro pagpaeayo katon ni Jehova sa atong mga saea. Ro Salmo 103:12 hay nagahambae katon: “Kon mauno kaeayo ro ginabutlakan it adlaw sa ginatunuran it adlaw, makaruyon man ro pagpaeayo na katon sa atong mga saea.” Ro east o sidlangan ro pinakamaeayo nga lugar halin sa west o nakatundan. Indi gid ra magtabo. Buot hambaeon, ginabuoe ni Jehova ro atong mga saea ag ginapaeayo ra katon it sobra pa sa atong maisip. Kanami gid nga pasalig it anang pagpatawad!
“Kon mauno kaeayo ro ginabutlakan it adlaw sa ginatunuran it adlaw” (Sal. 103:12)
7. Paalin ginapakita it Biblia kon ano ro ginaobra ni Jehova sa atong mga saea? (Miqueas 7:18, 19)
7 Maskin pa ginpaeayo katon ni Jehova ro atong mga saea ginainisip na baea gihapon ra? Owa. Nagsueat si Haring Ezequias parti kay Jehova: “Ginpilak mo ro tanan ko nga saea sa ing likod.” O sa footnote nga “ginbuoe mo ro tanan ko nga saea sa ing panan-aw.” (Isa. 38:9, 17; ftn.) Nagakahueogan ra nga ginapilak ni Jehova ro saea it mahinuesueon ag owa na eon ra ginaisip pa. Nagakahueogan man ra nga, “Gin-obra mo [ro akong mga saea] nga matsa owa gid ra matabo.” Ginpabahoe pa gid ra it sambilog nga ilustrasyon sa Biblia sa Miqueas 7:18, 19. (Basaha.) Ginahambae sa ruyong mga teksto nga ginahaboy ni Jehova ro atong mga saea sa kadadaeman it dagat. Sa panahon kato, imposible gid nga mabuoe pa ro ginhaboy sa kadadaeman it dagat.
“Ginpilak mo ro tanan ko nga saea sa ing likod” (Isa. 38:17)
“Ihaboy mo sa kadadaeman it dagat ro tanan nandang saea” (Miq. 7:19)
8. Ano eon ro atong natun-an?
8 Paagi sa rayang mga ilustrasyon, natun-an naton nga kon nagapatawad si Jehova, ginabuoe na eon ro atong mga saea ag indi eon kita makonsensya. Matuod gid ro ginhambae ni David, “bulahan [o, masadya] ro mga tawo nga ro andang mga saea ginpatawad, nga ro andang mga saea gintabunan! Bulahan ro tawo nga ro anang mga saea indi eon pag-isipon ku Ginuo [o, ni Jehova] kontra kana!” (Roma 4:7, 8) Ruyon ro matuod nga pagpatawad!
GINAPAEA NI JEHOVA RO ATONG SAEA
9. Ano nga ilustrasyon ro gingamit ni Jehova agud buligan kita nga maintindihan ro anang pagpatawad?
9 Naggamit si Jehova it ilustrasyon para buligan kita nga maintindihan nga paagi sa pangtubos, ginapaea na ro saea it mga mahinuesueon. Sa Biblia, mabasa naton nga ginahugasan ag ginabanlawan ni Jehova rayang mga saea. Ngani, nangin malimpyo eon ro makasasaea. (Sal. 51:7; Isa. 4:4; Jer. 33:8) Ginasugid mismo ni Jehova kon paalin na ra ginaobra: “Maskin ro inyong mga saea hay kasingpuea it eskarlata, papution ra kapareho it nyebe; maskin kasingpuea ra it tela nga krimson, mangin pareho ra sa bueboe it karnero.” (Isa. 1:18) Malisud gid bue-on ro mapuea nga mantsa sa eambong. Pero, paagi sa rayang ilustrasyon, ginapasalig kita ni Jehova nga ro atong mga saea hay pwedeng malimpyuhan it mayad nga indi eon gid ra makita.
“Maskin ro inyong mga saea hay kasingpuea it eskarlata, papution ra kapareho it nyebe” (Isa. 1:18)
10. Ano pa nga ilustrasyon ro gingamit ni Jehova para ipakita ro anang bugana nga pagpatawad?
10 Ginsambit sa unang artikulo nga ro atong saea hay pareho man sa “utang.” (Mat. 18:32-35) Ngani sa kada magkasaea kita kay Jehova, matsa nagadugang nga nagadugang ro atong utang. Mabahoe ro atong utang kana! Pero kon ginapatawad kita ni Jehova, matsa ginakansela na ro atong utang ag owa na eon ginasukta ro mga saea nga anang hapatawad eon. Makapaumpaw gid rayang ilustrasyon kon paalin nagapatawad si Jehova!
“Patawaron mo kami sa mga saea namon” (Mat. 6:12)
11. Sa Biblia, ano ro buot hambaeon nga ‘ginaduea’ o ginapaea ro atong mga saea? (Binuhatan 3:19)
11 Owa eang basta ginakansela ni Jehova ro atong mga utang, o mga saea; ginapaea na ra. (Basaha ro Binuhatan 3:19.) Kon ginakansela ro utang, maimadyin naton nga ginalinyahan o ginaekisan ro kantidad it kwarta nga atong gin-utang. Ngani, makita gihapon kon pila ro kantidad kara. Pero, iba gid kon ginapaea ra. Para maintindihan rayang ilustrasyon, kinahang-ean natong tandaan nga ro tinta nga ginagamit kato hay may halo nga karbon, tagok, ag tubi. Ro sangka tawo hay pwedeng magbuoe it basa nga espongha ag paeaon ro nakasueat. Ngani kon ro utang hay “ginpaea,” naduea eon gid ra. Indi eon gid makita kon ano ro dating nakasueat kara. Matsa owa gid nagkautang. Nagapasaeamat gid kita nga masayran nga owa eang ginakansela ni Jehova ro atong mga saea kundi ginapaea na gid ra!—Sal. 51:9.
“Agud nga dueaon nana ro inyong mga saea” (Binu. 3:19)
12. Ano ro atong matun-an sa ilustrasyon parti sa madamoe nga daeaura?
12 May sambilog pa gid nga ilustrasyon nga gingamit si Jehova kon paalin na ginapaea ro atong mga saea. Ginhambae na: “Tabunan ko ro imong mga pag-eapas it daeaura ag ro imong mga saea it madamoe nga daeaura.” (Isa. 44:22) Ngani kon nagapatawad si Jehova, matsa ginagamit na ro madamoe nga daeaura o clouds para itago ro atong mga saea agud indi eon naton ra makita pati ni Jehova.
“Tabunan ko ro imong mga pag-eapas it daeaura” (Isa. 44:22)
13. Ano ro indi naton pag-isipon kon ginapatawad ni Jehova ro atong mga saea?
13 Ano ro ginaturo katon it ratong mga ilustrasyon? Kon ginapatawad ni Jehova ro atong mga saea, indi dapat naton pag-isipon nga ro mantsa it rayang mga saea hay indi eon mabuoe sa bilog naton nga kabuhi. Paagi sa dugo ni Jesu-Cristo, ro atong utang hay paea eon gid. Kon nagapatawad si Jehova it atong saea, matsa owa gid naton ra haobra. Raya ro benepisyo it matuod nga pagpatawad halin kay Jehova kon ginahinuesuean naton ro atong mga saea.
GINABALIK NI JEHOVA RO ATONG MAYAD NGA RELASYON KANA
Ro pagpatawad nga gintao katon it atong Ama sa eangit hay nakabulig nga mangin mayad ro atong relasyon kana (Tan-awa ro parapo 14)
14. Ham-an makasalig kita sa pagpatawad ni Jehova? (Tan-awa man ro piktyur.)
14 Ro matuod nga pagpatawad nga halin kay Jehova hay nagabulig katon nga mangin mayad ro atong relasyon kana. Buligan kita kara nga malikawan ro sobrang pagkakonsensya. Indi kita dapat mahadlok nga basi nagadumot katon si Jehova ag nagausoy imaw it paagi para pinahan kita. Indi gid ra matabo. Kon naghambae si Jehova nga ginpatawad na eon kita, makasalig kita kana. Ginhambae ni Jehova kay propeta Jeremias: “Patawaron ko ro andang pag-eapas, ag indi ko eon pagdumdomon ro andang saea.” (Jer. 31:34) Makaruyon man ro ginatukoy ni Pablo kat naghambae imaw: “Indi ko eon pagdumdomon ro andang mga saea.” (Heb. 8:12) Pero ano gid ro buot hambaeon kara?
“Indi ko eon pagdumdomon ro andang saea” (Jer. 31:34)
15. Ano ro buot hambaeon nga owa eon ginadumdom ni Jehova ro atong mga saea?
15 Sa Biblia, ro termino nga “dumdomon” hay owa pirme nagatukoy sa sangka tawo nga ginainisip ro dating mga natabo. Kundi, pwedeng magtukoy ra sa sangka tawo nga may pagaobrahon. Ro kriminal nga nakaeansang sa poste nga kaiping ni Jesus hay naghambae: “Jesus, dumdoma ako kon mag-abot ka bilang hari.” (Luc. 23:42, 43) Owa na eang ginahambae kay Jesus nga dumdomon imaw sa ruyong panahon. Ro sabat ni Jesus hay nagapakita nga may obrahon imaw para banhawon rayang kriminal. Ngani, kon ginahambae ni Jehova nga indi na eon pagdumdomon ro atong mga saea, nagakahueogan ra nga napatawad eon kita ni Jehova ag indi na kita pagpinahan sa atong mga saea sa paeaabuton.
16. Sa ano kita ginkumpara it Biblia?
16 Naggamit ro Biblia it sambilog pa gid nga ilustrasyon para buligan kita nga maintindihan kon ano ro matuod nga pagpatawad. Ginahambae kara nga dahil bukon kita it perpekto ginkumpara kita sa ‘ulipon . . . it saea.’ Pero kon ginapatawad kita ni Jehova, kita hay pareho sa ulipon nga “ginhilway eon . . . sa saea.” (Roma 6:17, 18; Pah. 1:5) Kon nasayran naton nga napatawad eon kita ni Jehova, mangin masadya kita pareho it sueoguon nga napalaya eon.
“Ginhilway eon kamo sa saea” (Roma 6:18)
17. Paalin nagapamayad ro pagpatawad? (Isaias 53:5)
17 Basaha ro Isaias 53:5. Ro katapusan nga ilustrasyon nga atong pagatalakayon hay ro pagkumpara katon sa tawo nga may makamaeatay nga sakit. Dahil sa pangtubos nga gintao ni Jehova paagi sa anang Unga, ginpamayad kita ni Jehova. (1 Ped. 2:24) Nagpaposible man ra nga maayos ro atong relasyon kay Jehova nga nasamad dahil nakasaea kita. Pareho sa sangka tawo nga nakabatyag it sobrang kasadya dahil nagmayad imaw sa anang malala nga sakit, nagakasadya man kita nga dahil sa pagpatawad ni Jehova, nagmayad kita sa espiritwal ag nabalik ro atong mayad nga relasyon kana.
“Dahil sa anang mga nina nagmayad kami” (Isa. 53:5)
RO BENEPISYO IT PAGPATAWAD NI JEHOVA KATON
18. Ano ro natun-an naton sa mga ilustrasyon parti sa pagpatawad ni Jehova? (Tan-awa man ro kahon nga “Kon Paalin Kita Ginapatawad ni Jehova.”)
18 Ano ro natun-an naton sa mga ilustrasyon parti sa pagpatawad ni Jehova? Kon nagapatawad imaw, bugana na ra nga ginatao ag permanente nang ginapaea ro atong mga saea. Makabulig ra katon nga mangin mayad ro atong relasyon sa atong Ama sa eangit. Tandaan man naton nga ro matuod nga pagpatawad hay sangka regalo. Pagpakita ra it pagpalangga ag owa it tupong nga kabuot ni Jehova para katon, buko’t dahil nagakadapat kita kara.—Roma 3:24.
19. (a) Ham-an nagapasaeamat kita? (Roma 4:8) (b) Ano ro pagatalakayon naton sa masunod nga artikulo?
19 Basaha ro Roma 4:8. Nagapasaeamat gid kita dahil ginapatawad kita ni Jehova! (Sal. 130:4) Pero, kon gusto naton nga patawaron kita ni Jehova, may dapat kitang obrahon. Naghambae si Jesus: “Kon owa ninyo ginapatawad ro mga nakasaea kinyo, ro inyong Ama sa eangit indi man magpatawad kinyo.” (Mat. 6:14, 15) Ngani, importante gid nga tuearon naton ro pagpatawad ni Jehova. Pagatalakayon sa masunod nga artikulo kon paalin naton ra maobra.
KANTA 46 Salamat, Jehova
a Ro orihinal nga Hebreo nga sinueatan hay naggamit it termino nga “pagpatawad,” nga nagapakita nga raya eang ro matuod nga pagpatawad, maskin may iba pa nga klasi it pagpatawad. Owa hapakita it abung translation it Biblia ro importanteng punto sa Salmo 130:4.
