1-2. Ano ro pagkapareho ku sitwasyon it mga tawo sa sangka bataon nga eaki nga ginsambit sa parapo 1?

 IMADYINA ro sangka bataon nga eaki nga nagbahoe sa manggaranon nga pamilya. Sang adlaw may natabo nga trahedya; ro anang mga ginikanan hay namatay sa aksidente. Grabi gid ro anang kasubo. Pero, may maeain pa nga balita. Nasayran na nga ginwaldas it anang mga ginikanan ro andang kwarta ag nagkautang sanda it mabahoe. Ngani imbes manahon na ro andang manggad, ginmana na ro andang mga utang, ag gusto it mga nagpautang nga bayran na eagi sanda. Pero indi na gid ra kayang bayran.

² May pagkapareho man ro atong sitwasyon sa rayang bataon nga eaki. Ro atong unang ginikanan nga sanday Adan ag Eba hay perpekto ag nag-estar sa manami nga paraiso. (Gen. 1:27; 2:​7-9) Pwede kunta sandang mabuhi it masadya sa owa it katapusan. Pero nagbag-o ro tanan kat nagkasaea sanday Adan ag Eba. Indi eon sanda makaestar sa Paraiso ag owa eon sanda it pag-eaum nga mabuhi sa owa it katapusan. Ano ro ipamana nanda sa andang mangin mga inunga? Ginahambae katon it Biblia: “Ro saea nagsueod sa kalibutan paagi sa sambatong ka tawo, [nga si Adan] ag ro anang saea nagdaea it kamatayon. Tungod kara ro kamatayon nag-abot sa tanan nga mga tawo, ay ro tanan nga mga tawo hay nagpakasaea.” (Roma 5:12) Ro ginpamana katon ni Adan hay saea, nga nagaresulta sa kamatayon. Raya nga saea hay pareho sa mabahoe nga utang, nga owa it maskin sin-o katon ro makabayad kara.​—Sal. 49:8.

 3. Ham-an ginkumpara ro atong saea sa utang?

 ³ Sa Biblia, ro saea hay ginkumpara sa utang. (Mat. 18:​32-35) Kon nagakasaea kita, matsa nagakautang kita kay Jehova. Pwede na kunta nga pabayran eagi katon ra, pero indi gid kita kara makabayad. Mabayran eang naton ra kon mamatay kita.​—Roma 6:​7, 23.

 4. (a) Ano ro matabo sa tanan nga makasasaea kon owa it may magbulig? (Salmo 49:​7-9) (b) Sa Biblia, sa ano nagatukoy ro termino nga “saea”? (Tan-awa ro kahon nga “ Saea.”)

⁴ Kon sa aton eang nga sarili, imposible gid nga mabalik naton ro tanan nga naduea nanday Adan ag Eba. (Basaha ro Salmo 49:​7-9.) Kon owa it may magbulig, owa gid kita it pag-eaum nga mabuhi o mabanhaw sa paeaabuton. Ro matuod, ro atong kamatayon hay matsa pareho eang sa mga sapat nga indi eon mabuhi it uman.​—Man. 3:19; 2 Ped. 2:12.

 5. Paalin kita ginbuligan it atong mapinalanggaon nga Ama nga mabayran ro atong namana nga saea? (Tan-awa ro piktyur.)

⁵ Isipa ro bataon nga eaki nga ginsambit kaina, ano ro anang batyagon kon may manggaranon nga tawo nga gustong magbayad sa tanan na nga utang? Syempre, pasaeamatan gid ra it bataon nga eaki ag batunon na rayang bulig. Sa pareho nga paagi, ro atong mapinalanggaon nga Ama nga si Jehova hay nagtao man katon it regalo para mabayran ro atong saea nga namana kay Adan. Ginhambae ni Jesus: “Ginhigugma gid it Dyos ro kalibutan sa bagay nga gintao nana ro anang bugtong nga Unga, agud nga ro kada nagatuo kana indi eon mamatay, kundi may kabuhi nga owa it katapusan.” (Juan 3:16) Dugang pa, rayang regalo hay nagpaposible man nga mangin mayad ro atong relasyon kay Jehova.

 6. Ano ro mga termino sa Biblia nga atong pagatalakayon sa rayang artikulo, ag ham-an?

⁶ Paalin kita makabenepisyo sa rayang manami nga regalo nga nagpaposible agud mapatawad ro atong mga saea o utang? Ro sabat sa rayang pangutana hay makita sa gingamit nga mga termino sa Biblia pareho it pagpakig-ayos, pagbayad sa saea, pagtumbas, pangtubos, pagtubos, ag ginpahayag nga matarung. Sa rayang artikulo, pagatalakayon naton kon ano ro mga kahueogan kara. Habang ginapamaeandungan naton kon ano ro gin-obra ni Jehova para patawaron kita, mas pasaeamatan naton imaw.

RO KATUYUAN: PAGPAKIG-AYOS

 7. (a) Ano pa ro naduea nanday Adan ag Eba? (b) Ano ro kinahang-ean gid naton dahil mga inunga kita nanday Adan ag Eba? (Roma 5:​10, 11)

⁷ Euwas nga naduea nanday Adan ag Eba ro pag-eaum nga mabuhi sa owa’t katapusan, naduea man nanda ro andang manami nga  relasyon sa andang Ama nga si Jehova. Ku una, parte sanda ku pamilya it Dyos. (Luc. 3:38) Pero kat nagkasaea sanda, bukon eon sanda it parte ku pamilya ni Jehova. Natabo ra bago pa sanda magkaunga. (Gen. 3:​23, 24; 4:1) Bilang andang mga inunga, kinahang-ean natong makipag-ayos kay Jehova. (Basaha ro Roma 5:​10, 11.) Buot hambaeon, kinahang-ean natong paeambuon ro atong mayad nga relasyon kana. Base sa sangka reperensya, ro Griegong termino nga gingamit para sa “pagpakig-ayos” hay nagakahueogan nga “mangin amigo ro kaaway.” Daeayawon gid nga si Jehova mismo ro nag-obra it paagi para mangin posible ra. Paalin?

RO KAHIMUSAN: PAGBAYAD SA SAEA

 8. Ano ro (a) pagbayad sa saea? (b) pagtumbas?

⁸ Ro pagbayad sa saea hay kahimusan ni Jehova agud mabalik ro mayad nga relasyon it makasasaea nga mga tawo kana. Naeakip kara ro pagbaylo it sangka bagay nga may pareho nga bili. Sa rayang paagi, ro bagay nga naduea o nasamad hay pwedeng mabalik o maislan. Ro Cristyanong Griegong Kasueatan hay naggamit it termino nga may parehong kahueogan sa “pagbayad sa saea,” ro pagtumbas. (Roma 3:25) Ro pagtumbas hay sangka paagi agud may una kita katawhay sa Dyos ag may mayad nga relasyon kana.

 9. Ano ro temporaryo nga kahimusan ro gin-obra ni Jehova agud mapatawad ro saea it mga Israelinhon?

⁹ Para may mayad nga relasyon ro mga Israelinhon kana, nag-obra si Jehova it temporaryo nga kahimusan agud mapatawad ro andang mga saea. Sa Israel kato, ro Adlaw it Pagbayad sa Saea hay ginaobra kada dag-on. Sa ruyong adlaw, ro mataas nga saserdote hay magahaead it sapat para sa saea it katawhan. Syempre, ro paghaead it sapat hay indi gid makatumbas sa pagbayad sa saea it mga Israelinhon dahil ro mga sapat hay mas manaba kaysa sa mga tawo. Pero hasta nagatao it haead ro mahinuesueon nga mga Israelinhon base sa ginsugo ni Jehova, handa imaw nga magpatawad kanda. (Heb. 10:​1-4) Ngani, ruyong kahimusan ag ro andang regular nga paghaead hay nagapadumdom sa mga Israelinhon nga makasasaea sanda ag kinahang-ean nanda it permanente nga solusyon.

10. Ano ro permanente nga kahimusan ro gin-obra ni Jehova para mapatawad ro atong mga saea?

¹⁰ Nag-obra si Jehova it permanente nga kahimusan para mapatawad ro atong mga saea. Ginpadaea na ro anang pinalangga nga Unga para ‘ihaead it makaisaeang bes sa pagbuoe ku mga saea it mga tawo.’ (Heb. 9:28) Gintao ni Jesus ro “anang kabuhi sa pagtubos it abu nga mga tawo.” (Mat. 20:28) Ano ro pangtubos?

RO BILI: RO PANGTUBOS

11. (a) Base sa Biblia, ano ro pangtubos? (b)  Sin-o eang ro pwedeng makatubos?

¹¹ Base sa Biblia, ro pangtubos hay ro bili nga ginbayad para matabo ro pagbayad sa saea ag pagpakig-ayos. a Para kay Jehova, raya ro basehan para mabalik kon ano ro naduea. Sa anong paagi? Tandai nga naduea nanday Adan ag Eba ro andang perpekto nga kabuhi, eakip eon ro pag-eaum nga mabuhi sa owa’t katapusan. Ngani kinahang-ean it pangtubos nga may katumbas nga bili sa kon ano ro naduea. (1 Tim. 2:6) Mabayran eang ra it sangka adulto nga tawo nga (1) perpekto; (2) pwedeng mabuhi sa owa’t katapusan sa eugta; ag (3) handa nga itao o isakripisyo ro anang kabuhi para katon. Imaw eang ro pwedeng makabaylo, o makabayad sa kon ano ro naduea.

12. Ham-an si Jesus eang ro kwalipikado nga magbayad sa bili it pangtubos?

 ¹² Sayura ro tatlo nga rason kon ham-an si Jesus eang ro kwalipikado nga magbayad sa bili it pangtubos. (1) Perpekto imaw—“owa imaw nagpakasaea.” (1 Ped. 2:22) (2) Dahil karon, pwede imaw mabuhi sa owa’t katapusan iya sa eugta. (3) Handa imaw nga mamatay ag itao ro anang kabuhi para katon. (Heb. 10:​9, 10) Bilang perpekto nga tawo, si Jesus ro katumbas it una nga tawo nga si Adan, bago nagkasaea si Adan. (1 Cor. 15:45) Paagi sa kamatayon ni Jesus, nabayran na ro saea, ngani mabalik eon kon ano ro naduea ni Adan. (Roma 5:19) Si Jesus hay nangin “ulihi nga Adan.” Indi eon kinahang-ean it sambilog pa nga perpekto nga tawo para magbayad sa kon ano ro naduea ni Adan. Namatay si Jesus it “makaisaeang bes gid lang.”​—Heb. 7:27; 10:12.

13. Ano ro kinaiba ku kahimusan it pagbayad sa saea ag ku pangtubos?

¹³ Ano ro kinaiba ku kahimusan it pagbayad sa saea ag ku pangtubos? Ro kahimusan it pagbayad sa saea hay ro gin-obra it Dyos agud mabalik ro mayad nga relasyon it mga tawo kana. Ro pangtubos mat-a hay ro bili nga ginbayad agud mangin posible ro pagbayad sa saea para sa makasasaea nga mga tawo. Rayang bili hay nagarepresentar sa maeahaeon nga dugo ni Jesus nga gin-uea para katon.​—Efe. 1:7; Heb. 9:14.

RO MGA BENEPISYO: PAGTUBOS AG GINPAHAYAG NGA MATARUNG

14. Ano ro atong pagatalakayon makaron, ag ham-an?

¹⁴ Ano ro resulta ku kahimusan it pagbayad sa saea? Ro Biblia hay naggamit it iba-ibang termino para ipakita ro mga benepisyo. Maskin ro mga kahueogan kara hay haeos magkapareho, ro kada termino hay nagapabahoe it sangka aspekto ku kahimusan it pagbayad sa saea nga nangin paagi it pagpatawad ni Jehova. Paalin kita makabenepisyo sa gin-obra ni Jehova para katon? Para masabat ra, pagatalakayon naton ro daywang ka termino nga gingamit sa Biblia nga makabulig katon kon paalin kita makabenepisyo sa pagpatawad ni Jehova.

15-16. (a) Sa Biblia, sa ano nagatukoy ro “pagtubos”? (b) Paalin kita makabenepisyo kara?

¹⁵ Sa Biblia, ro pagtubos hay nagatukoy sa pagpalaya, o pag-abswelto nga resulta it pagbayad ku pangtubos. Ginhambae ni apostol Pedro: “Nakasayod kamo kon ano ro ginbayad agud mahilway kamo sa rayang owa it pueos nga pagkabuhi nga inyong ginmana sa inyong mga katigueangan. Ro gintubos kinyo bukon it mga butang nga nagakasamad ukon nga kon amat naganaba ro bili, pareho it bueawan ukon pilak, kundi ginhilway [o, gintubos] kamo paagi sa hamili nga dugo ni Cristo, nga nanginkaangay it isaeang ka kordero nga owa it kasawayan ukon dagta.”​—1 Ped. 1:​18, 19.

¹⁶ Dahil sa pangtubos, mapalaya kita sa saea ag kamatayon. (Roma 5:21) Ngani, nagapasaeamat gid kita kay Jehova ag kay Jesus dahil gintubos kita paagi sa maeahaeon nga dugo, o kabuhi ni Jesus.​—1 Cor. 15:22.

17-18. (a) Ano ro buot hambaeon nga ginpahayag nga matarung? (b) Paalin kita makabenepisyo kara?

¹⁷ Ro Biblia hay nagahambae nga ro mga alagad ni Jehova hay ginpahayag nga matarung. Nagakahueogan ra nga owa na kita ginaobligar nga bayran ro mga saea nga atong naobra. Maskin gin-obra na ra, owa gin-eapas ni Jehova ro anang pagsueondan sa katarungan. Ginpahayag na kita nga matarung bukon it dahil gintinguhaan naton ra, o dahil ginakunsinti na ro atong mga saea. Kundi, dahil sa pagtuo naton sa kahimusan it pagbayad sa saea ag  sa bili it pangtubos nga ginbayad, handa si Jehova nga patawaron ro atong mga saea.​—Roma 3:24; Gal. 2:16.

¹⁸ Paalin kita makabenepisyo kara? Ratong mga ginpili nga maggahum kaibahan ni Jesus sa eangit hay ginpahayag eon nga matarung bilang mga unga it Dyos. (Tito 3:7; 1 Juan 3:1) Ginpatawad eon ro andang mga saea. Matsa owa gid sanda nakaobra it saea, ngani kwalipikado sanda sa Ginharian. (Roma 8:​1, 2, 30) Ratong mga may pag-eaum sa eugta hay ginpahayag nga matarung bilang mga amigo it Dyos, ag ro andang mga saea hay ginpatawad. (Sant. 2:​21-23) Ro mabahoe nga grupo it mga tawo nga makaeuwas sa Armagedon hay may pag-eaum nga mabuhi sa owa it katapusan. (Juan 11:26) “Ro matarung” ag ro buko’t matarung nga namatay hay pagabanhawon. (Binu. 24:15; Juan 5:​28, 29) Sa ulihi, tanan nga matinumanon nga alagad ni Jehova sa eugta hay “magaambit . . . ku mahimayaon nga kahilwayan ku mga unga it Dyos.” (Roma 8:21) Excited gid kita sa panahon nga mangin perpekto kita nga mga unga it atong Ama nga si Jehova!

19. Paalin nagbag-o ro atong sitwasyon dahil sa gin-obra ni Jehova ag ni Jesus para katon? (Tan-awa man ro kahon nga “ Pagpatawad ni Jehova.”)

¹⁹ Ro matuod, ro atong sitwasyon hay owa eon gid it pag-eaum pareho sa bataon nga eaki nga ginsambit kaina. Naduea kana ro tanan ag ginpamanahan it mabahoe nga utang nga indi na gid mabayran. Pero ginbuligan kita ni Jehova. Ro atong sitwasyon hay nagbag-o dahil sa kahimusan it pagbayad sa saea ag sa ginbayad nga pangtubos. Ro atong pagtuo kay Jesu-Cristo hay nagpaposible katon nga matubos, o mapalaya sa saea ag kamatayon. Kon ginapatawad ni Jehova ro atong mga saea, matsa owa gid naton ra haobra. Ag ro pinakaimportante sa tanan, may una kita manami nga relasyon sa atong mapinalanggaon nga Ama sa eangit nga si Jehova.

20. Ano ro atong pagatalakayon sa masunod nga artikulo?

²⁰ Mabatyagan gid naton ro mabahoe nga pagpasaeamat kay Jehova ag kay Jesus kon pamaeandungan naton ro tanan nanda nga gin-obra para katon. (2 Cor. 5:15) Sa bulig nanda, may pag-eaum kita! Pero paalin makabenepisyo ro kada isaea katon sa pagpatawad ni Jehova? Pagatalakayon naton ra sa masunod nga artikulo.