TUEON-AN NGA ARTIKULO 8
KANTA 130 Mangin Mapinatawaron
Pagpatawad ni Jehova—Paalin Mo Ra Matuead?
“Magpinatawaran kamo pareho nga ro Ginuo [o, si Jehova] nagpatawad kinyo.”—COL. 3:13.
RO ATONG MATUN-AN
Tun-an naton sa rayang artikulo ro mga paagi nga atong obrahon para mapatawad ro nakasaea katon.
1-2. (a) Ham-an nalisdan kita magpatawad sa iba? (b) Paalin ginpakita ni Denise ro pagpatawad?
NALISDAN ka baea magpatawad sa iba? Abu katon ro nalisdan magpatawad, eabi eon kon may nakahambae o may nakaobra nga nakasakit gid katon. Pero, may maobra kita para indi kita padayon nga maakig ag mangin mapinatawaron. Halimbawa, tan-awa ro eksperyinsya it sister nga si Denise, a nga nagpakita it daeayawon nga halimbawa sa pagpatawad. Ku 2017, si Denise ag ro anang pamilya hay nagbisita sa bag-o eang nga bukas nga World Headquarters it mga Saksi ni Jehova. Kat pauli eon sanda, may sangka drayber nga nadueaan it kontrol sa anang saeakyan ag nagbunggo ra sa saeakyan nanday Denise. Dahil karon, nalipong si Denise. Pagbugtaw na, nasayran na nga ro anang mga unga hay napuruhan ag ro anang asawang si Brian hay namatay. Kon maisip ni Denise ro natabo, nagahambae imaw, “Nasakitan gid ang ag naguluhan.” Nasayran na rayon nga ro drayber hay owa man lang naalin, ngani nagpangamuyo imaw kay Jehova nga taw-an imaw it katawhay.
2 Ro drayber nga nakabunggo kanda hay gin-aresto ag ginkasuhan dahil aksidente nang napatay ro asawa ni Denise. Kon mapamatud-an sa korte nga nagkasaea imaw, pwede imaw mapriso. Pero, ginhambaean si Denise it sangka opisyal it korte nga nagadepende sa anang testimonya ro sentensya it drayber. Naghambae si Denise: “Pamatyag ko matsa may nagbukas sa ang nina ag ginbubuan ra it abu nga asin dahil kinahang-ean ko nga iistorya ra it uman.” Pagtaliwan it pilang domingo, nag-agto si Denise sa korte para magtao it anang testimonya sa drayber nga nangin dahilan it grabi nga kasakit sa anang pamilya. Ano ro ginhambae ni Denise? Ginpangabay na ro huwis nga kaeuoyan ro eaki. b Pagkatapos na maghambae, ro huwis hay nagtangis. Naghambae ro huwis: “Sa ang 25 nga dag-on bilang huwis, owa pa gid ako kabati it kapareho kara. Owa pa ako kabati nga ro pamilya it biktima hay nagapakit-euoy nga kaeuoyan ko ro akusado. Makara ko eang nakita ro makarayang klasi it pagpalangga ag pagpatawad.”
3. Ano ro nakabulig kay Denise nga magpatawad?
3 Ano ro nakabulig kay Denise nga magpatawad? Ginpamaeandungan na ro pagpatawad ni Jehova. (Miq. 7:18) Kon nagapasaeamat kita sa pagpatawad nga ginpakita katon ni Jehova, makabulig ra katon nga patawaron man ro iba.
4. Ano ro gusto ni Jehova nga obrahon naton? (Efeso 4:32)
4 Gusto ni Jehova nga patawaron naton ro iba pareho sa anang pagpatawad katon. (Basaha ro Efeso 4:32.) Ginapaabot na man nga mangin mapinatawaron kita sa nakasakit katon. (Sal. 86:5; Luc. 17:4) Sa rayang artikulo, pagatalakayon naton ro tatlong paagi nga makabulig katon nga mangin mas mapinatawaron.
INDI PAGBALEWALAA ING GINABATYAG
5. Base sa Hulubaton 12:18, ano ro posible natong batyagon kon may nakasakit katon?
5 Posibleng masakitan gid kita dahil sa nahambae o naobra it iba katon, eabi eon kon imaw hay atong maeapit nga amigo o kapamilya. (Sal. 55:12-14) Kon amat, ro kasakit nga atong nabatyagan hay matsa kapareho it ginbuno. (Basaha ro Hulubaton 12:18.) Posibleng taguon naton o balewalaon ro kasakit nga atong nabatyagan. Kon obrahon naton ron, matsa ginbuno kita ag owa ginbuoe ro kutsilyo sa nina. Pareho man karon, kon balewalaon naton ro kasakit nga atong ginabatyag, indi man ra magmayad.
6. Ano ro posible natong mangin reaksyon kon may nakasakit katon?
6 Kon may nakasakit katon, posible nga ro una natong reaksyon hay maakig. Ro Biblia hay nagahambae nga pwede kitang maakig. Pero, nagapaandam man ra nga indi naton pagpasugtan nga magpadayon ro atong kaakig. (Sal. 4:4; Efe. 4:26) Ham-an? Dahil ro atong ginabatyag hay makaapekto sa atong ginaobra. Ag ro kaakig hay owa gid it mayad nga resulta. (Sant. 1:20) Tandai nga ro kaakig hay sangka reaksyon, pero ro pagpabilin nga akig hay sangka desisyon.
Ro kaakig hay sangka reaksyon, pero ro pagpabilin nga akig hay sangka desisyon
7. Ano pa ro pwede natong mabatyagan kon may nakasakit katon?
7 Kon may nakaobra katon it buko’t manami, posibleng mabatyagan naton ro iba pang masakit nga baeatyagon. Halimbawa, ro sister nga si Ann hay naghambae: “Kat unga pa ako, ginbueagan ni papa si mama ag ginpakaslan na ro akong yaya. Pamatyag ko ginpabay-an ako. Kat nagkaunga eon sanda, nabatyagan ko nga ginbalewala ako ag bukon eon it importante.” Ginsugid man it sister nga si Georgette ro anang nabatyagan kat nangin buko’t matutom ro anang asawa kana: “Mag-amigo eon kami halin kat unga pa kami. Magkaibahan kami nga nagpayunir! Ngani nasakitan gid ang.” Naghambae mat-a ro sister nga si Naomi: “Indi ko maisip nga maobra ra it ang asawa kang. Ngani kat gin-amin na nga nagatan-aw imaw it pornograpiya ag ginatago na ra kang, pamatyag ko gindaya ako ag gintraidor.”
8. (a) Ano ro pila nga rason kon ham-an dapat natong patawaron ro iba? (b) Ano ro mga benepisyo kon magpatawad kita? (Tan-awa ro kahon nga “ Paalin Kon Na-trauma Kita Dahil sa Gin-obra it Iba?”)
8 Owa kita it kontrol kon ano ro hambaeon o obrahon katon it iba, pero pwede natong makontrol ro atong reaksyon. Ag ro manami pirmeng mangin reaksyon hay magpatawad. Ham-an? Dahil palangga naton si Jehova, ag gusto na nga mangin mapinatawaron kita. Kon padayon kita nga maakig ag indi magpatawad, posibleng makaobra kita it buko’t manami ag mahalitan ro atong sarili. (Hulu. 14:17, 29, 30) Tan-awa ro eksperyinsya it sister nga si Christine. Naghambae imaw: “Kat naakig ako, owa eon ako masyadong gahibayag. Buko’t masustansya ro akong ginakaon, indi ako makatueog, ag nalisdan ako nga kontrolon ro akong emosyon nga nakaapekto sa pagtratar ko sa ang asawa ag sa iba.”
9. Ham-an dapat natong dueaon ro kaakig?
9 Maskin ro tawo nga nakasakit katon hay owa gid nagpangayo it pasensya, pwede natong malikawan nga mahalitan kita it sobra. Paalin? Si Georgette nga ginsambit kaina hay naghambae: “Mga pilang dag-on man ro nagtaliwan, bago ko naduea ang kaugot ag kaakig sa ang dating asawa. Bilang resulta, nakabatyag gid ako it katawhay.” Kon dueaon naton ro kaakig, malikawan naton nga maapektuhan it kaugot ro atong pagtratar sa iba. Mataw-an man naton it regalo ro atong sarili—malikawan naton nga pag-inisipon ron ag ma-enjoy it uman ro atong kabuhi. (Hulu. 11:17) Pero ano ing obrahon kon bukon ka pa it handa magpatawad?
BATUNA ING GINABATYAG
10. Ham-an dapat natong taw-an ro atong sarili it panahon nga maduea ro kaakig? (Tan-awa man ro piktyur.)
10 Ano ro makabulig kimo nga maduea ro kaakig? Ro sangka paagi hay ro pagpataliwan anay it panahon. Pagkatapos makabaton it pagbueong, ro tawo nga nabalian hay nagakinahang-ean it panahon para magmayad sa pisikal. Sa pareho nga paagi, kinahang-ean man naton it panahon para magmayad ro atong emosyon bago kita mangin handa nga patawaron ro iba it sinsero.—Man. 3:3; 1 Ped. 1:22.
Kon nabalian kita, kinahang-ean naton it tama nga pagdipara ag panahon agud magmayad, makaruyon man kon may nakasakit katon (Tan-awa ro parapo 10)
11. Paalin ka mabuligan it pangamuyo nga mangin mapinatawaron?
11 Mangamuyo kay Jehova nga buligan ka nga mangin mapinatawaron. c Si Ann nga ginsambit kaina hay nagsugid kon paalin nakabulig kana ro pangamuyo. Naghambae imaw: “Ginpangabay ko si Jehova nga patawaron kami sa mga bagay nga among nahambae o naobra nga bukon it tama. Ginsueatan ko rayon si papa ag ro anang bag-ong asawa ag ginhambae kanda nga napatawad ko eon sanda.” Gin-aku ni Ann nga bukon ra it madali. Pero naghambae imaw: “Nagaeaum ako nga ro akong pagtinguha nga tuearon ro pagpatawad ni Jehova hay magpahueag kay papa ag sa anang asawa nga kilaeahon si Jehova.”
12. Ham-an dapat kita magsalig kay Jehova kaysa sa atong baeatyagon? (Hulubaton 3:5, 6)
12 Magsalig kay Jehova, buko’t sa ing baeatyagon. (Basaha ro Hulubaton 3:5, 6.) Sayod ni Jehova kon ano ro pinakamayad para katon. (Isa. 55:8, 9) Ag indi na kita pagpaobrahon it mga bagay nga makahalit katon. Ngani, kon ginapalig-on na kita nga mangin mapinatawaron, makasalig kita nga para ron sa atong ikamayad. (Sal. 40:4; Isa. 48:17, 18) Pero, kon magsalig kita sa atong baeatyagon, indi gid kita makapatawad. (Hulu. 14:12; Jer. 17:9) Si Naomi nga ginsambit kaina hay naghambae: “Ku una, nagapati ako nga indi ko kinahang-ean nga patawaron ang asawa dahil sa pagtan-aw na it pornograpiya. Nahadlok ako nga maobra na ra it uman o malipatan na kon mauno ra kang kasakit. Ag gin-isip ko nga naintindihan ni Jehova ang ginabatyag. Pero narealisar ko nga dahil eang naintindihan ni Jehova ang baeatyagon, owa ra nagakahueogan nga ginakunsinti na ra. Sayod na ang ginabatyag ag kinahang-ean ko it panahon para maduea ang kaakig, pero gusto na man nga mangin mapinatawaron ako.” d
PAUSWAGA ING POSITIBO NGA BAEATYAGON
13. Base sa Roma 12:18-21, ano ro kinahang-ean natong obrahon?
13 Kon ginapatawad naton ro nakasakit katon, bukon eang it basta nga indi naton pag-istoryahan kon ano ro natabo. Kon ro nakasakit katon hay ro atong isigka-Cristyano, ro atong goal hay makipag-ayos. (Mat. 5:23, 24) Gusto naton nga mabayluhan ro atong kaakig it kaeuoy ag ro atong kaugot it pagpatawad. (Basaha ro Roma 12:18-21; 1 Ped. 3:9) Ano ro makabulig katon nga maobra ron?
14. Ano dapat ro tinguhaan natong obrahon, ag ham-an?
14 Ginatan-aw ni Jehova ro mayad nga ugali it mga tawo. Dapat man natong tinguhaan nga tuearon si Jehova, ag tan-awon ro mayad nga ugali it tawo nga nakasakit katon. (2 Cron. 16:9; Sal. 130:3) Kon ano ro gusto natong makita nga ugali it tawo, ruyon man ro atong ginausoy—mayad man ra o maeain. Kon ginatan-aw naton ro mayad sa iba, mangin mas maeumo katon nga patawaron sanda. Halimbawa, ro brother nga si Jarrod hay naghambae, “Mas maeumo ko nga patawaron ro sangka igmanghod kon ginaisip ko ro mayad nga mga bagay nga nailaan ko parti kana, kaysa isipon ro anang haobrang saea.”
15. Ham-an it mas mayad nga hambaeon mo sa sangka tawo nga napatawad mo eon imaw?
15 Ro sambilog pa nga bagay nga kinahang-ean obrahon hay ro paghambae sa tawo nga nakasakit kimo nga napatawad mo eon imaw. Ham-an? Si Naomi nga ginsambit kaina hay naghambae: “Ginpangutana ako it ang asawa, ‘Napatawad mo eon ako?’ Kat hambaeon ko eon kunta nga, ‘Napatawad ta eon,’ indi ko ra mahambae. Narealisar ko nga owa ko pa gid gali imaw napatawad. Ku ulihi, nahambae ko gid man kana nga ‘Napatawad ta eon.’ Kat ginpatawad ko imaw, nagtueo ro euha it ang asawa. Nakibot ako kon paalin imaw haumpawan ag kon mauno man ro katawhay nga akong nabatyagan. Umpisa kato, ginbalik ko ang pagsalig kana ag nangin maeapit kami it uman.”
16. Ano ing hatun-an parti sa pagpatawad?
16 Gusto ni Jehova nga mangin mapinatawaron kita. (Col. 3:13) Basi nalisdan kita nga patawaron ro iba. Pero maobra naton ra kon indi naton pagbalewalaon ro atong ginabatyag ag tinguhaan nga batunon ra. Mapauswag rayon naton ro positibo nga baeatyagon.—Tan-awa ro kahon nga “ Tatlong Paagi Para Mangin Mapinatawaron.”
ISIPA RO MGA BENEPISYO KON MAPINATAWARON KA
17. Ham-an dapat kita mangin mapinatawaron?
17 Abu kitang rason para mangin mapinatawaron. Tan-awa ro pila kara. Una, matuead naton ag mapasadya ro atong maeueuy-on nga Ama nga si Jehova. (Luc. 6:36) Pangaywa, mapakita naton nga nagapasaeamat kita sa pagpatawad nga gintao katon ni Jehova. (Mat. 6:12) Ag pangatlo, may mayad kita nga pang-eawas ag padayon natong mapabakud ro atong relasyon sa atong mga amigo.
18-19. Ano ro posibleng mangin resulta kon mapinatawaron kita?
18 Kon nagapatawad kita, maeksperyinsyahan ta ro mga pagpakamayad nga owa naton ginapaabot. Halimbawa, tan-awa ro natabo kay Denise nga ginsambit kaina. Sa ratong panahon, owa kasayod si Denise nga may plano kunta nga magpakamatay ro drayber nga nakabunggo kanda pagkatapos it andang paghusay sa korte. Pero, nagapasaeamat gid imaw sa pagpatawad ni Denise kana ngani nag-umpisa imaw sa pagtuon it Biblia sa mga Saksi ni Jehova.
19 Posibleng mabatyagan naton nga ro pagpatawad sa iba ro pinakamalisud nga atong pagaobrahon—pero posibleng raya man ro pinakamasadya nga atong maeksperyinsyahan. (Mat. 5:7) Ngani, kabay nga obrahon naton ro atong pinakamayad agud matuead ro pagpatawad ni Jehova.
KANTA 125 “Malipayon ang mga Maluluy-on!”
a Gin-islan ro ibang pangaean.
b Sa rayang sitwasyon, ro kada Cristyano hay dapat mag-obra it personal nga desisyon kon ano ro anang obrahon.
c Tan-awa sa jw.org ro mga video it orihinal nga mga kanta nga “Forgive One Another,” “Magpatawad Na,” ag “Mag-abyan Na Liwat.”
d Maskin saea ag makasakit sa anang asawa ro pagpamantaw it pornograpiya, base sa Biblia, bukon ra it bastante nga rason para diborsyuhan imaw it anang inosenteng asawa.
