Si Mary ag ro anang asawa nga si John a hay nagaestar sa sangka nasyon kon siin abung Pilipino ro nagatrabaho igto nga masugiran nanda it mayad nga balita. Ku panahon it COVID-19 nga pandemic, nakaumpisa si Mary it mga Bible study bukon eang it sa andang nasyon nga ginaestaran, kundi pati man sa ibang mga nasyon. Paalin na ron naobra?

Ginapangutana ni Mary ro anang mga Bible study, “May kakilaea ka nga gusto man magtuon it Biblia?” Kon magsabat sanda it huo, mangutana rayon imaw kon pwede nandang ipakilaea imaw kanda. Rayang simpleng pangutana hay may mayad nga resulta. Ham-an? Dahil kon naapresyar it sangka tawo ro anang mga natun-an sa Biblia, gusto na man ra nga isugid sa anang mga pamilya ag mga amigo. Ano ro nangin resulta sa rayang gin-obra ni Mary?

Ginpakilaea kay Mary ku anang Bible study nga si Jasmin ro ap-at pa nga gusto mang magtuon it Biblia. Ro sambilog kanda hay si Kristine nga naila gid sa andang pag-study, ag naghambae imaw kay Mary nga magtuon sanda it daywang beses sa sang domingo. Kat ginpangutana imaw ni Mary kon may kakilaea pa imaw nga gustong magtuon it Biblia, nagsabat si Kristine, “Huo, ipakilaea ta sa ang mga amiga.” Pagtaliwan it pilang domingo, ginpakilaea ni Kristine kay Mary ro ap-at na nga amiga nga gustong magpa-Bible study. Ginpakilaea pa rayon ni Kristine kana ro iba pa nana nga mga amiga, ag ro pila kanda hay nagsugid man it mga pangaean nga posibleng interesado man magtuon it Biblia.

Gusto man ni Kristine nga ro anang pamilya sa Pilipinas hay magtuon it Biblia. Ngani, gin-istorya na ro anang unga nga bayi nga si Andrea. Ku una, naisip ni Andrea nga ‘Ro mga Saksi hay kulto, owa sanda nagapati kay Jesus, ag ro ginagamit eang nanda hay ro Luma nga Tipan.’ Pero, pagkatapos eang it una nandang pag-study, narealisar na nga bukon gali rato it matuod. Sa kada may matun-an imaw nga bag-o sa andang pag-Bible study, nagahambae imaw, “Dahil raya ro nakasueat sa Biblia, raya ro matuod!”

Ku ulihi, ginpakilaea ni Andrea kay Mary ro anang katrabaho ag daywang ka amiga nga nagpa-Bible study man rayon. Owa kasayod si Mary nga ro bulag nga ante ni Andrea nga si Angela hay nagapinamati gali kanda sa andang pag-Bible study. Rayon, ginpangabay ni Angela si Andrea nga ipakilaea imaw kay Mary ag kon pwede hay i-Bible study man imaw. Nanamian gid si Angela sa anang mga natun-an. Sa sueod it sang buean, abu eon nga teksto ro anang na-memorize ag gusto nang mag-Bible study sanda it ap-at nga beses sa sang domingo! Sa bulig ni Andrea, regular  eon nga naga-attend it mga miting si Angela paagi sa videoconference.

Kat nakita ni Mary nga ro asawa ni Kristine nga si Joshua hay una malang sa anang kilid kon naga-Bible study sanda, ginpangutana imaw ni Mary kon gusto nang mag-join kanda. Naghambae si Joshua: “Mamati eang ako, pero indi ako pagpangutan-a hay kon obrahon mo ron, mahalin lang ako.” Sa limang minuto paeang nga kaibahan nanda imaw sa pag-study, mas abu pa ro anang ginpangutana kaysa kay Kristine ag gusto na nga magpa-Bible study man.

Ro simpleng pangutana ni Mary hay nagresulta sa abu nga mga Bible study. Dahil abu eon ro anang study, ginpangabay na ro ibang mga igmanghod nga buligan imaw sa pag-Bible study kanda. Umabot sa 28 ro Bible study ni Mary sa ap-at nga nasyon.

Si Jasmin, ro unang Bible study nga ginsambit sa rayang eksperyinsya hay nabautismuhan ku Abril 2021. Si Kristine hay nabautismuhan man ku Mayo 2022 ag nag-uli imaw sa Pilipinas para makaibahan ro anang pamilya. Ro daywang Bible study mat-a nga ginpakilaea ni Kristine kay Mary hay nabautismuhan man. Si Angela hay nabautismuhan pagtaliwan it pilang buean ag regular pioneer eon makaron. Ro asawa ni Kristine nga si Joshua, ag ro andang unga nga bayi nga si Andrea, pati man ro iba pang mga Bible study hay padayon nga nagauswag.

Ku unang siglo, madasig nga nasugid it mga tawo ro mayad nga balita sa andang mga pamilya ag mga amigo. (Juan 1:​41, 42a; Binu. 10:​24, 27, 48; 16:​25-33) Pwede natong pangutan-on ro atong mga Bible study ag ro ibang mga interesado, “May kakilaea ka nga gusto man magtuon it Biblia?” Kon gamiton mo rayang simpleng pangutana, posibleng makakita ka it abu nga mga Bible study.