1-2. Paano kita makabenepisyo tungod gintuga kita ni Jehova nga mas makabatyag it kasadya sa pagtao kaysa sa pagbaton?

 KAT gintuga ni Jehova ro mga tawo, gindisenyo na sanda nga mas makabatyag it kasadya sa pagtao kaysa sa pagbaton. (Binu. 20:35) Nagakahueogan baea ra nga indi eon kita mangin masadya kon nagabaton? Bukon man. Sayod naton nga manami gid sa pamatyag kon makabaton it regalo. Pero, mas masadya gid kon kita ro nagatao. Ro matuod, makabenepisyo gid kita tungod gintuga na kita sa makarang paagi. Ham-an?

² Tungod makaraya ro pagtuga ni Jehova katon, nagabulig ra agud mangin mas masadya kita. Nagadugang ro atong kasadya kon nagausoy kita it mga tsansa nga makatao sa iba. Kanami gid ro pagkaobra katon!—Sal. 139:14.

3. Ham-an mahambae naton nga si Jehova hay masadya nga Dyos?

³ Ginapasalig kita it Kasueatan nga makapasadya katon ro pagtao sa iba, ngani owa kita nangawa kon ginahambae sa Biblia nga si Jehova hay “bulahan [o, masadya] nga Dyos.” (1 Tim. 1:11) Imaw ro pinakauna ag pinakamayad nga Manogtao. Ginhambae ni apostol Pablo nga tungod kay Jehova kita hay “nagakabuhi, nagahueag ag nanginmakara.” (Binu. 17:28) Ro matuod, “ro kada mayad nga regalo ag himpit nga grasya” nagahalin kay Jehova.​—Sant. 1:17.

4. Ano ro makabulig katon nga mangin mas masadya?

⁴ Tanan kita hay gustong makaeksperyinsya it kasadya halin sa pagtao. Maobra naton ra paagi sa pagtuead sa kaalwan o kaatag ni Jehova. (Efe. 5:1) Habang ginatalakay naton ra, tandaan naton ro mga pwede natong obrahon kon sa pamatyag naton hay owa ginaapresyar ro atong gintao. Rayang pahanumdom hay makabulig nga mapadayon naton ag madugangan pa ro atong kasadya kon nagatao.

 MANGIN MAALWAN PAREHO NI JEHOVA

5. Ano ro materyal nga mga bagay ro ginatao katon ni Jehova?

⁵ Ano ro pila sa mga paagi nga ginapakita ni Jehova ro anang kaalwan? Tan-awa ro mga halimbawa. Ginataw-an kita ni Jehova it materyal nga mga bagay. Owa man kita it maeahaeon nga mga bagay, pero nagapasaeamat gihapon kita kay Jehova nga ginatao na ro atong mga kinahang-eanon. Halimbawa, ginataw-an na kita it atong pagkaon, eambong, ag maestaran. (Sal. 4:8; Mat. 6:​31-33; 1 Tim. 6:​6-8) Ginatao baea ni Jehova ro atong pisikal nga mga kinahang-eanon tungod ana ra nga obligasyon? Bukon! Hay ham-an ginaobra ra ni Jehova para katon?

6. Ano ro atong matun-an sa Mateo 6:​25, 26?

⁶ Ginatao ni Jehova ro atong pisikal nga mga kinahang-eanon tungod palangga na kita. Tan-awa ro ginhambae ni Jesus sa Mateo 6:​25, 26. (Basaha.) Naggamit si Jesus it mga halimbawa halin sa mga tinuga. Nagsugid si Jesus parti sa mga pispis: “Owa sanda nagasabwag it binhi ukon nagaani, ukon nagatipon it andang mga patubas sa mga tambubo [o, bodega].” Pero, tan-awa ro masunod nana nga ginhambae: “Ro inyong Ama sa eangit nagapakaon kanda.” Nagpangutana rayon si Jesus: “Indi baea nga eabaw kamo nga mas mahaega kaysa kanda?” Ano ro ginaturo kara katon? Mas importante kay Jehova ro anang matutom nga mga alagad kaysa sa mga sapat. Ngani, kon ginatao ni Jehova ro kinahang-eanon it mga sapat, makasigurado kita nga itao na man ro atong mga kinahang-eanon! Pareho ku mapinalanggaon nga tatay, ginadipara ni Jehova ro anang pamilya tungod palangga na sanda.​—Sal. 145:16; Mat. 6:32.

7. Ano ro isaeang ka paagi nga matuead naton ro kaalwan ni Jehova? (Tan-awa man ro piktyur.)

⁷ Pareho kay Jehova, makatao man kita it materyal nga mga bagay tungod palangga naton sanda. Halimbawa, may kilaea ka baea nga igmanghod nga nagakinahang-ean it pagkaon o eambong? Pwede kang gamiton ni Jehova para buligan sanda. Kilaea gid ro mga alagad ni Jehova sa pagkamaalwan sa panahon it kalisdanan. Halimbawa, kat natabo ro COVID-19 nga pandemic, nagtao ro mga igmanghod it mga pagkaon, eambong, ag iba pang mga gamit sa mga nagakinahang-ean. Abu man ro maalwan nga nagtao it donasyon nga kwarta para sa bilog kalibutan nga ueobrahon nga nakabulig para suportahan ro  atong mga ueobrahon. Gin-aplikar gid nanda ro ginahambae sa Hebreo 13:16: “Indi kamo magkalipat sa paghimo it mayad ag sa pagbueoligan, ay raya ro mga haead nga nagapahamuot sa Dyos.”

8. Paano kita makabenepisyo sa kusog nga ginatao ni Jehova? (Filipos 2:13)

⁸ Nagatao si Jehova it kusog. Masadya gid si Jehova sa pagtao it anang owa’t limitasyon nga kusog sa anang matutom nga mga alagad. (Basaha ro Filipos 2:13.) Nakapangamuyo ka eon baea dati nga taw-an ka it kusog nga masuk-ean ro tentasyon o matiis ro malisud nga sitwasyon? Basi nagpangamuyo ka man nga taw-an ka it kusog para makapadayon sa ing mga ueobrahon sa ruyong adlaw. Kon nabatyagan mo nga ginsabat ro ing pangamuyo, makahambae ka man pareho kay apostol Pablo, nga nagsueat: “Makasarang ako sa pag-atubang ku tanan nga kahimtangan paagi sa gahum nga ginatao kakon ni Cristo.”​—Fil. 4:13.

9. Ano ro mga paagi nga matuead naton si Jehova sa paggamit it atong kusog sa pagbulig sa iba? (Tan-awa man ro piktyur.)

⁹ Matuead naton ro paggamit ni Jehova it anang kusog agud buligan na ro iba maskin bukon kita’t perpekto. Indi naton literal nga mapasa ro atong kusog o enerhiya sa iba. Pero, magamit naton ra para buligan sanda. Halimbawa, pwedeng kita ro magpanindahan o magbulig sa mga ueobrahon sa baeay it sangka magueang o nagamasakit nga igmanghod. Kon kaya it atong sitwasyon, pwede kitang magboluntaryo sa pagpanglimpyo ag pagmentinar it atong Kingdom Hall. Kon ginagamit naton ro atong kusog sa rayang mga paagi mabuligan naton ro atong mga igmanghod.

10. Paano makabenepisyo ro iba sa atong mga ginahambae?

¹⁰ Indi man it kalipati nga may epekto ro atong mga ginahambae. May naisip ka baea nga nagakihang-ean it sinsero nga komendasyon? May kilaea ka baea nga nagakihang-ean it pagpalig-on? Kon may una, ipabatyag nga may nagakabaeaka kana. Pwede mo imaw bisitahan, tawgan, padaehan it sueat, email o text. Indi masyadong mabaeaka kon ano ing ihambae. Sangkiri man ing mahambae, basta halin sa tagipusuon, basi raya ro makabulig sa ing igmanghod nga makapabilin nga matutom sa masunod nga mga inadlaw o makabulig kana nga mangin positibo.​—Hulu. 12:25; Efe. 4:29.

11. Paano ginatao ni Jehova ro anang kaaeam sa iba?

¹¹ Nagatao si Jehova it kaaeam. Nagsueat ro disipulo nga si Santiago: “Kon may una kinyo nga kueang sa kaaeam, dapat imaw magpangamuyo  sa Dyos, ag ro Dyos magatao kara kana. Ay ro Dyos maalwan ag nagatao nga owa it aligutgot sa tanan.” (Sant. 1:5.) Ginapakita kara nga owa nanugon si Jehova sa pagtao it anang kaaeam kundi maalwan na ra nga ginatao sa iba. Ginhambae man ni Santiago nga kon magtao si Jehova it kaaeam, ginatao na ra nga “owa it aligutgot.” Owa na katon ginapabatyag nga saea nga magpangayo it anang giya. Ro matuod, gusto na nga pangayuon naton ra.​—Hulu. 2:​1-6.

12. Ano ro mga paagi nga ma-share naton ro atong kaaeam sa iba?

¹² Kamusta kita? Matuead man baea naton si Jehova sa pagtao it kaaeam? (Sal. 32:8) Abu it paagi ro katawhan ni Jehova para ma-share ro andang mga natun-an. Halimbawa, ginasanay naton ro mga bag-uhan sa ministeryo. Mapinasensyahon man sa pagbulig ro mga elder sa ministeryal nga mga alagad ag bautismado nga mga brother para tur-an sanda kon paano obrahon ro mga asayment sa kongregasyon. Ag ratong mga igmanghod nga skilled o antiguhan sa konstruksyon ag pagmentinar hay ginasanay ro iba para magkaantiguhan sa pagpatindog it teokratikong mga pasilidad.

13. Paano naton matuead ro paagi ni Jehova sa pagtao it kaaeam kon ginasanay naton ro iba?

¹³ Mayad gid kon tuearon it ratong mga nagasanay sa iba ro paagi ni Jehova sa pagtao it kaaeam. Tandai nga maalwan si Jehova sa pagtao it kaaeam. Pareho man kara, gina-share naton ro atong mga nasayran ag mga eksperyinsya sa mga gustong magkaantiguhan. Owa kita nanugon nga tur-an sanda o nahadlok nga basi buslan kita nanda. Owa man kita nagaisip nga, ‘Owa it nagturo kakon! Bahala imaw nga magkaantiguhan.’ Indi dapat mag-isip it makaruyon ro mga alagad ni Jehova. Kundi, masadya naton nga gina-share sa iba ro atong mga natun-an, ag ginaobra naton ro tanan para sanayon ro iba. (1 Tes. 2:8) Nagaeaum kita nga sanda hay “sarang man makapanuro sa iba.” (2 Tim. 2:​1, 2) Ngani, kon maalwan naton nga ginatao ro atong kaaeam sa iba, mangin masadya kita pati man ro iba.

KON MATSA OWA NAAPRESYAR RO ATONG GINTAO

14. Ano ro ginaobra it iba kon pakitaan naton sanda it kaalwan?

¹⁴ Kon maalwan kita eabi eon gid sa atong mga igmanghod sa kongregasyon, posible nga pasaeamatan nanda kita. Pwedeng padaehan nanda kita it sueat o pasaeamatan sa iba nga paagi. (Col. 3:15) Masadya gid kita nga makabaton it ruyong mga pagpasaeamat.

15. Ano ro dapat natong tandaan kon owa kita ginpasaeamatan?

¹⁵ Ro matuod, ro pila hay owa nagapasaeamat kon ginataw-an sanda. Kon amat, matsa balewala eang sa iba ro atong ginatao nga oras, kusog o kwarta para mabuligan sanda. Kon matabo ron, paano naton malikawan nga indi maduea ro atong kasadya o madismaya? Tandaan naton ro tema nga teksto, ro Binuhatan 20:35. Owa nagadepende sa andang reaksyon ro atong kasadya sa pagtao. Pwede man gihapon kita mangin masadya maskin pa owa nagapasaeamat ro iba. Paano? Tun-an naton ro pila nga mga paagi.

16. Ano ro dapat natong dumdomon para makapadayon kita sa pagtao nga may kasadya?

¹⁶ Dumdomon naton kon nagatao kita sa iba, ginatuead naton si Jehova. Nagatao imaw it mayad nga mga bagay sa mga tawo, ginaapresyar man nanda ra o owa. (Mat. 5:​43-48) Nagapromisa si Jehova nga kon nagatao kita nga “owa nagapaabot nga bayaran,” magabaton kita it ‘mabahoe nga baeos.’ (Luc. 6:35) Ngani indi maeuyahan it buot kon owa ka pirme ginapasaeamatan. Tandai nga si Jehova  ro magabayad katon sa atong mayad nga mga gin-obra para buligan ro iba tungod kita hay “nagatao it malipayon.”​—Hulu. 19:17; 2 Cor. 9:7.

17. Ano ro pinakaimportanteng rason kon ham-an nga gusto natong magtao sa iba? (Lucas 14:​12-14)

¹⁷ Ro pinakaimportanteng rason kon ham-an nagatao kita sa iba hay mabasa naton sa Lucas 14:​12-14. (Basaha.) Bukon man it saea nga mangin maabiabihon o mangin maalwan sa iba nga makabaeos katon. Pero, paano kon mapan-uhan naton nga nagatao eang kita tungod nagapaabot kita it baeos? Kon hapan-uhan naton ron, tinguhaan naton nga obrahon ro gin-obra ni Jesus. Pwede kita mangin maabiabihon o maalwan sa tawo nga owa’t ikasarang nga magbaeos katon. Mangin masadya rayon kita tungod ginatuead naton si Jehova. Makabulig man ra katon nga padayon nga mangin masadya maskin owa ra ginaapresyar it iba.

18. Ano ro indi dapat natong obrahon, ag ham-an?

¹⁸ Likawi nga isipon nga bukon it mapinasaeamaton ro iba. (1 Cor. 13:7) Kon owa nagapasaeamat ro iba, pwede naton pangutan-on ro atong sarili: ‘Bukon gid baea sanda it mapinasaeamaton, o basi nalipatan eang nanda nga magpasaeamat?’ Basi may mga rason kon ham-an owa nanda hapakita ro ginapaabot naton nga obrahon nanda. Ro pila hay basi nagabatyag it pagpasaeamat pero nalisdan sanda nga ipakita ra. Basi nahuya man sanda nga magbaton it bulig, tungod dati hay sanda ro nagabulig sa iba. Pero kon matuod ro atong pagpalangga sa atong mga igmanghod, indi naton sanda pag-isipan it maeain ag padayon nga magtao nga may kasadya.​—Efe. 4:2.

19-20. Ano pa ro makabulig katon nga mangin masadya kon nagatao sa iba? (Tan-awa man ro piktyur.)

¹⁹ Mangin mapinasensyahon sa paghueat. Parti sa pagiging maalwan, ro maaeam nga si Haring Solomon nagsueat: “Habya ing tinapay sa tubi agud makita mo ra it uman pagtaliwan it mga inadlaw.” (Man. 11:1) Ginapakita kara nga ro pila hay magapakita it andang  pagpasaeamat—“pagtaliwan it mga inadlaw.” Tan-awon naton ro halimbawa it sangka sister nga nakaeksperyinsya kara.

²⁰ Mga pilang dag-on eon ro nagtaliwan, ginsueatan it asawa ku manogdipara it sirkito ro sangka sister nga bag-o paeang nabautismuhan. Ginpalig-on na imaw nga magpabilin nga matutom kay Jehova. Pagtaliwan it mga waeong dag-on, ginsueatan man imaw it sister nga nagahambae: “Owa ka eang kasayod, pero gusto ko gid nga masayran mo nga mabahoe gid ing nabulig kang ku nagtaliwan nga mga dinag-on.” Nagpadayon imaw: “Napalig-on gid ako sa ing ginsueat, ag nagtatak gid kakon ro teksto nga imong ginsueat. Indi ko gid ra malipatan.” a Pagkatapos nang isugid ro mga kalisdanan nga anang naagyan, ginhambae it sister: “Nag-abot sa punto nga gusto ko eon aywan ro kamatuoran ag magpundo sa pag-alagad kay Jehova. Pero pirme ko gid ginadumdom ro teksto nga imong ginsueat, ag nakabulig ra kakon nga magpadayon.” Naghambae pa gid imaw: “Sa sueod it waeong dag-on, owa gid it ibang nakabulig kakon kundi ing sueat eang.” Imadyina ro kasadya it asawa ku manogdipara it sirkito kat nabaton na ro sueat “pagtaliwan it mga inadlaw”! Pwede man kita makabaton it makarang klasi it pagpasaeamat maskin mabuhay eon kitang nakaobra it mayad sa iba.

21. Ham-an determinado kita nga padayon nga tuearon ro kaalwan ni Jehova?

²¹ Sa gintalakay eon, gintuga kita ni Jehova nga magbatyag nga mas masadya ro nagatao kaysa sa nagabaton. Kanami gid sa pamatyag nga nakabulig kita sa atong mga igmanghod sa kongregasyon ag masadya kita kon nagapasaeamat sanda. Pero, magpasaeamat man sanda o indi, masadya gihapon kita tungod gin-obra naton ro tama. Tandai nga maskin alin man ing gintao, “sobra pa karon ro itao kimo ni Jehova.” (2 Cron. 25:9) Mas abu ro matao katon ni Jehova! Ag owa eon it mas masadya pa kon imaw mismo ro magbaeos katon. Kabay nga mangin determinado kita nga padayon nga tuearon ro kaalwan it atong Ama sa eangit.